زەینەب جەلالیانە جە ساڵڕۆو باڵبەسکەردەیشەنە جە زینانو یەزدیۆ بەنامنیشانو" دەسەکێم بووەو گوڵیشا ونە ئێ، بە تاوانەو گۆڵچنییەی سزاشادانی"، ئاماژەش بە ئێشو ١٧ ساڵەو زینان کەردەو وێش کەرد و داواش کەردە پەنەوازا دژو سزاو جەقەنارەدای، زینانی و فەقیری بیمی.
زەینەب جەلالیانە جە ٢٥ـو شووباتو ٢٠٠٨ ینە جە لایەنو هێزە ئەمنیەکا ئێرانیۆ باڵبەسە کریا و د،اتەر بە تۆمەتی جوراجۆر سزاو زینای کەردەی هەتاهەتایش سەرەرە سەپیا و ماوەو ئی ١٧ ساڵەینە سەرەراو ئانەی بوارو تەندروستینە دۆخش خاس نییا، ڕووبەڕووو فشاری و ئەشکەنجەی بەردەوام بیێنۆ، نامبریێ بۆنۆ ١٧هەمین ساڵەو باڵبەسکەردەیش و زینای کەردەیش نامێوەش وەڵاکەردۆ.
دەقو نامەکەو زەینەب جەلالیانێ پی جۆرەنە:-
“دەسەکێم بووەو گوڵیشا ونە ئێ، بە تاوانەو گوڵچنییەی سزاشا دانی. بەڵام کەس ویرش چانەیە نەکەردۆ کە ڕەنگە گوڵێوەم نییابۆ. ستەم زامێ قووڵش وست دلێ دڵیم کە تا هەتان فکرم مەشۆوە. من کولانێ بێنا، هورگێرەو پەیامێوە گۆرەی پەی ئازادیی و ئازاد ژەنا. ڕۆو ٢٥ـو شووباتی ٢٠٠٨ سەفەرو وێم پەی شارو شیرینو کرماشانی دەس پنەکەرد، بەڵام بەکرێگیریێ ستەمی ڕانە بڕفانانیشا و بەردانیشا یاگێوە نامۆ و غەریبە.
پاسەوانێ سیاو پۆشێ دابوونەریتێوە سەیرشا بێ. جا یاگە تۆقێنەرێ کەس پەیش نەبێ ئەوی تەری وینۆنە. چەمێشا بەستێبێنا و پەرسێنی: “نامێت چێشا؟”، واتم: “نامێم زەینەبەنە”، دێنێم ونە و دیسان پەرسێنێ: “نامێت چێشا؟”، دیسان واچێنا: “نامێم زەینەبەنە”، دیسان دێنێم ونە، ئەشکەنجەم کەرێنێ و دیسان پەرسێنێ: “نامێت چێشا؟”. چنە ها جارێ پرسیارەم ونە واوەی کەرێنێ. جوابم دێنێ یان بێدەنگە بییەنا، حیچ نەفاڕیێ؛ ئەشکەنجەکێ درێژەشا بێ. جا مەشکە نەوەشەیشا نەیاوێنانە. جا یاگە تاریکێنە هیچ ڕۆشنای نەبێ، چونکە پاسەوانێ ستەمی پێسەو شەمشەمەکۆرەی جە ڕۆشنای تەرسێنێ.
چن مانگێ دماتەر ڕەوانەو زینانیشا کەردانی. زینانکەرەکێ ژەنێ بێنێ، بەڵام هەڵسوکەوتشا جە پیایا خراپتەر بێ و ئیشو ئانەی لام فرە قورستەر بێ. دماو چن مانگێ چەمەڕا نەکریا و هورپەسنریا پەڕ ئێش و تاقەت پڕووکێن، ڕوێ جە سپیکەرو زینانیۆ بە ئاوازێوە پەڕ جە قینی و نەفرەتی چڕیانیشا. زنجیرەشا کەردە دەس و قام و بەلکێشەو وەردەوم دادگاو فۆرمالیتەیشا کەردانی. یەرێ دەقێ بە زوانو ئەڏیێم چنی دادوەرەکەی قسێم کەردێ، نەشناسێم، تەنانەت گۆشش پەی قسەکام نەگێرت. خاسا پەشتیش بە چێش بەست که سزاو جەقەنارەدایش سەرەرە سەپنانی؟ مەزانو!
دماتەر دورشا وستانیۆ پەی تارانی، شش مانگێ جە ژوورە تاکەکەسییەکا ئیتلاعاتینە بە مەبەسو ناچارکەردەیم دان نییا پۆرەی بە تاوانێ زۆرەملێ وستانیشا چێرو فشارێ پڕووکێنەری، دماو چن ساڵێ پاسەوانێ حکومەتی ئەیامشا بە هەڕەشێ ئاردە پەی تارانی، هاوارەکێ ئەڏیێم یاوانیشانە و جە وێناکەردەی نمێ، پەی ئەڏێم فرە سەخت بێ و هەڵای حەر ئینانی بارێ سەخت و دژوارەنە، ئێشو ئەڏێم جە سەبوورییەکەیش فرە زیاتەر بێ، بەڵام جە وەراوەرو ستەم و ستەمکارانە سەرەش نەنامنارە، ئەڏێام وێنەو خەمێوە گۆرەیش دڵەنە بێ؛ بێگومان وشەکێ من تواناو وێناکەردەو ئا خەفەتە گۆرەیە نییەنە باسش بکەرو.
دماو شش مانگا گێڵنانیشاوە پەی کرماشانی، چن جارێ داوام کەردە فاڕامۆ پەی پارێزگاکەو وێم، بەڵام حۆت ساڵێ جە زینانو کرماشانینە مەنانیۆ، دماتەر دوورەشا وستانیۆ پەی زینانو شارەکەو وێم و چوار ساڵێ چاکە بێنا و چێرو فشاری ڕۆحی و دەروونینە بەردم سەر. شەوێ کە کاتو وتەیشا ئەرەیاونابێ و بێدەنگیێ مەرگاوی زیندانەکەش گێرتەبێرە، پاسەوانێ ستەمی دیسان ئامێوە، زنجیرەشا ونە بەستانیو و دوورەشا وستانیۆ پەی زینانو قەرچەکی، جە بەندی کاتینە مدرنانیشا و چاکە تووشو ڤایرۆسو کۆرۆنای بییانی، حیچ چەمدێریێ پزیشکیم هورنەگێرت، سییەکێم زەرەرێ گۆرەشا وەر کەوت. چنەها جارێ داواو فاڕایۆم کەرد بەڵام حیچ جوابێشا نەرانیۆ. بە ناچار ماەم جە واردەی گێرتە.
دماو چن ڕوێ چەمەڕای، نیمەشەوێ کە زینانییەکێ وەرمەنە بێنێ و تەنیا دەنگو قۆزەو من بێ بێدەنگییەکەی ماڕێ، پاسەوانا ستەمی دیسان ئامێوە، بە زۆر و بە کەلەپچۆ دورشا وستانیۆ پەی کرمانی، نە چەمێ بێ داواکارییەکەیم وانۆوە، نە گۆشێ بێ کە قسەکام بشنەوۆ، نە دڵێ کە هاودڵی و هاوخەمیم چنیش بکەرو. دماو چن مانگێ تەنیایی و گۆشەگیری، قەدەغەکەردەو تەلەفۆنی و دیداری و تەنانەت نەبییەو کارتی بانکی، جە وێرەگێوە خەمبار و تەمگێرتەینە جە کرمانەنە، هێزەکێ زینانی بە قەسەمێ دروێ و پەنابەردەی بە زۆر سەر جەنۆ دوورەشا وستانیۆ پەی کرماشانی.
