هامسەرۆکەو کۆنگرەو نەتەوەو کوردسانی (کەنەکە)ی پەیوەس بە هجوومەکاو دەوڵەتوو تورکی پەی ئاژانسوو هەواڵوو (ANF)ی قسێش کەردۍ و پی جۊرە هۊرسەنگنایش کەرد:

"موینمۍ جە هەرچوارپارچەو کوردسانینە هجووم و سەروو گەلەکەیما بەردەواما. دەوڵەتوو تورکی بە هێزێوە فرەی سەروازییوە سەروو خاکوو کوردسانیۆ ئۆپراسیۆن مکەرۆ. پېسە کۆنگرەو نەتەوەی کوردسانی سەروو ئی مژاریە گلېرۆبیەی ٢٢ەمینما جە ٢٠ و ٢١ ئی مانگېنە ڕێکوست و سەروو ئی ئاژەیە مردایما کەرد. چونکی مزانمۍ دوژمنما تەخسیر مەکەرۆ چانەی کە بە قۊستەیۆ پشێوییەکا هجووم و سەروو کوردسانی بکەرۆ. پۊکاتی ئەرک و ۋەرپرسیاریی گرڎیمانە دژوو ئی هجووما مردمېوە. پۊکاتی ئی ئەرکە نەتەوەییە ئینا ئەستۆو گردیمانە. جە گلېرۆبیەو گرڎیی کەنەکەینە جەختما چانەی کەردۆ کە هیچ وەختۍ ئی هجووما قبوڵ مەکەرمۍ. دیارا دوژمنما قەراروو ئی هجوومەیشە دان، پۊکای پێویسا پېسە گەلوو کوردی ۋەرا ۋەر پی هجووما خاوەن قەرارۍ بیمۍ.

داوام ئانێنە کەس نەبۆ بە بەشێوە چی پیلانگێڵنیە

چێگۆ داوا جە گرڎ لایەن و پارتێوە سیاسی مکەروو کە نەبانۍ بە بەشۍ و هامکارۍ ئی پیلانگێڵنییەو سەروو گەلەکەیما. چوونکی تاریخ سەلەمنانش نیەتوو دوژمناما دلېنەبەردەو گەلوو کوردین.

جە هەمان وەختەنە موینمۍ گەلەکەما بەگرڎیی و بەتایبەت پانیشتوو کوردسانی تووش و ئاژێوە نیگەرانی و قەیراناوی بیەنۆ. پانیشتەنە جیای ئانەی زاموو گەلەکەیما ساڕێژ بکریۆ حۊڵ مڎریۆ زامش قوڵتەربکریۆوە و کوردسانی وزا مەترسیۆ. دەوڵەتا ئەرەگیری چمېشا پی ئاستەو کوردسانی هۊرنمۍ. جە گلېرۆبیەکەیمانە باسما چانەی کەرد دەوڵەتوو تورکی چنی گەرەکشا بێنە پانیشتوو کوردسانی و ئەرەگیرش بکەرۆ. هەرچەنڎە ناکۆکی بەینوو دوژمانامانە، بەڵام سەروو ئاستوو کوردی گرڎشا کۆکێنۍ سەروو دلېنەبەردەو کوردی.

حەقەتینەکا بۋینمۍ و پلانگێڵنی قبوڵ نەکەرمۍ

داواما ئانێنە گرڎوو لایەن و پارتە سیاسەکا ئی حەقەتینە تاریخیە بۋینا و جە ئاستوو گەلەکەیمانە بە‌هەڵوێسۍ با. هەڵوێس ئەرماناو گەلەکەیما یاگۍ دڵوەشینە، جە گرڎ توێژەکا حۊڵمڎا ڕا چی پلانگێڵنییە بگېرا. بەڵام ئینە گڕد چێوۍ نیا، پێویسا بە قەرارێوە سیاسی ڕا چی ئەرەگیریە بگېرمۍ، کوشتەو کوردا قبوڵ نەکەرمۍ. پروپاگەنەڎەو دەوڵەتوو تورکی کە ماچۆ گوایە ئی هجوومە دژوو تەڤگەری ئازاڎییا، درووێوە فرە گەورێنە، ئی هجوومە پلانگێڵنیێوە گۊرەن دژوو کوردی و کوردسانی.

دوژمنێما فرېنۍ، بەڵام ئینۍ شکس و لاوازینە. موینمۍ دەسەڵاتوو ئاکەپە-مەهەپەی جە هۊرچنیە دلېینەییەکانە چنی تاڵاوەو شکسیشا جە تەرەفوو گەلەکەیماوە دەرخوارد دریا. ئینەیچ پا مەعنۍ مۍ جە هەر ئاژېوەنە بیمۍ متاومۍ شکس بە دووژمناما بارمۍ. ئی ئیرادەیچە بە یەکڕیزی و یۊبیەی بەینوو گەلا و لایەنە سیاسی و پێکئامایەکا گلېرگەی پێکمۍ."