ئارۆ ٤ شەممە، جە دەگاو زەنقری سەر بە ناوچەو داقوق-ی، خەلە و خەرمان و کاڵگە کشتوکاڵیەکێ هیتیارە کوردەکان بە ئەنقەست ئێر دریێۋە و سۆچنیێۋە. ئێرەکە تا ئیسە خامۆش نەکریان و هەوڵ پەی کوشنایش بەردەۋامەن.
جە لایێ تەرەۋە شەۋێ ۋیەردێ، جە دەگاو یەنگیجەو تاڵەبانی کە سەر بەهەمان ناوچەیەنە کاڵگە کشتوکاڵیەکێ و خەلە و خەرمانو هیتیارە کوردەکان ئێر دریێ بێنێ و خەڵکی و تیمەکێ ئێرکوشنای ئێرەکەشان خامۆش کەردەنەۋە، بەڵام دیسان ئێرەکە زیانی ماددی فرەش بە هیتیارەکان یاونان.

هەرمانگەو ئێرکوشنای کەرکوکی ئاشکراش کەرد: "جە ٨/٥/٢٠١٩ی تا ئیسە، ٤٤ حاڵەتێ ئێرکەوتەی و سۆچنای خەلە و خەرمانی و کاڵگە کشتوکاڵیەکێ جە پارێزگاو کەرکوکی تۆمارێ کریێنێ کە جە ئاکامشانە ۳ هەزارێ و ٧١٩ دۆنمێ جە زەمینە کشتوکاڵییەکان سۆچنیێنێ و ئانێچە زیانی فرەی ماددیش شۆنیەرە ئومان.

ماۋێۋەن جە مەخمور، کەرکوک، خانەقین، خورماتوو، داقوق سەر بە کوردستانی وارینی و جە حەسەکە و عەفرین و کۆبانێ و ناوچە جیا جیاکێ سەر بە ڕۆژئاڤاو کوردستانی، دارستانێ و خەلە و خەرمان و کاڵگە کشتوکاڵیەکێ هیتیارە کوردەکان بە ئەنقەست ئێر دریانە سۆچنیانە.  ئێردای و سۆچناکەی جەلاو داعشی، هێزەکێ سوپا و چەتەکێ تورکیای و عەرەبە شۆڤینیەکێ ئێراقی ئەنجام دریان. جە ڕۆژئاڤاو کوردستانی بڕیا دریان تا قەرەبوو زیانۋنەریاکان بکریۆۋە، بەڵام جە کوردستانی وارین و ناوچە کوردستانیەکێ چێرو دەسەڵاتداری ئێراقی تا ئیسە هیچ باسێ جە قەرەبووکەردەی نییەن و ئانێچە هیتیارە کوردەکێش نیگەرانێ کەردێنێ.