جە دەگاو دارا-ی سەر بە خانەقین-ی جارێوتەر هێرش کریا سەرو کاکایەکان و جە ئاکامشەنە ٥ هاموڵاتیێ و ٢ جە هێزە ئەمنیەکان شەهیدێ بینێ و چەنڎین هاموڵاتیێ و ئەندامێ هێزە ئەمنیەکان بریندارێ بیێنێ.
شەوێ ویەردێ ژمارێو چەکدارێ کە گومان هەن چەتەکێ داعشی بیبانە هێرشان کەردەن سەرو دەگاو دارا-ی سەر بە شارو خانەقین-ی. جە هێرشەکەنە کۆمەڵکوشی ئەنجام دریان و جە میانشەنە ٥ هاموڵاتییێ و ٢ جە هێزە ئەمنیەکێ ئێراقی شەهیدێ بینێ و هامکات ٣ هاموڵاتیێ کاکەیێ و ٢ ئەندامێ هێزە ئەمنیەکان بریندارێ بیێنێ کە برینێ ٤یشان سەختێ بیێنێ و پەی چارەسەری ڕەوانێ نەوشخانەکێ خانەقینی و شارو باقوبە-ی کریێنێ.
نامێ ٦ جە شەهیدەکان و ٣ جە بریندارەکان بە ئی جۆرەنێ:
(شەهیدەکێ)
١- غەسان عەزیز کاکەیی
٢- تارق عەزیز کاکەیی
٣- سەید سەفا عەبدوڵا کاکەیی
٤- سەید شەهاب کاکەیی
٥- یەزان جەمال کاکەیی
٦- حسێن عاسم (سەر بە هێزە ئەمنیەکان)
(بریندارەکێ)
١- سەید محەمەد شەهاب کاکەیی
٢- سەید عەلی شەهاب کاکەیی
٣- موئەیەد خەلیل کاکەیی
کاکەیەکێ کە بە (یارسان)یچ ئەشناسیێنێ جە پانیشتو کوردستانی بە تایبەتی موسڵ (نەینەوا)، کەرکوک، داقوق، خانەقین و مەندەلی و هەورامان نیشتەجانێ و جە دمای وڕای ڕژێمو سەددام حوسێنێ جە ٢٠٠٣نە بە بەردەوامی ڕووبەڕووێ هێرش و کۆمەڵکوشیێ بیێنێوە و جە ئاکامەنە دەیان هاموڵاتیێ شەهیدێ و بریندارێ بیێنێ و هەزاران کاکەیێ ناچارێ کۆچبەری و ئاستەجیای ناوچەکانشان کریێنێ.
هەم دەسەڵاتدری هەرێمو کوردستانی و هەم دەسەڵاتداری ئێراقی وەرانوەر بە کاکەییەکان کەمتەرخەمێ بیێنێ و ١٧ ساڵێن نەتاوانشان ناوچە کاکەیۍنشینەکان پارێزنانە.
