جە پاوە دیوانو میرزا مەحمود موستەوفی چاپ و وەڵاو کریاوە
جە پاوە دیوانو میرزا مەحمود موستەوفی شاعری هەورامانی که کۆچکەردە غازی خەلیلی کۆکەردەبێوە و ئامادە کەردەبێ، بە هامکاری هامسەرێش و کۆڕەکەیش چاپ و وەڵاو کریاوە.
دیوانو میرزا مەحمودی موستەوفی شاعری هەورامانی کە ١٣٧ لاپەلێ جەوێ مەگێرۆن، چاپ و وەڵاو کریاوە و ڕەوانەو بازاری و کتێبخانەو هەورمانی کریا.
دیوانەکە وەڵتەر جەلاو نویسەر و پەیجۆرکاری کۆچکەردە غازی خەلیلی جە پاوە شار کۆکریابێوە، بەڵام مەرگ مەوداش نەڎابێ نامبریا وێش وینەرو چاپ و وەڵاوکەردەیش ببۆنە.
دمای کۆچی دمایی غازی خەلیلی، بە هامکاری هامسەرەکێش خاتوو (نسرت جەباری)یێ و کۆڕەکەیش کاروبارو تایپی و بەرگو کتێبەکەی تەمام کریا و دەرەنجام دەستگاو چاپەمەنی ئارۆی جە شارو پاوەی چاپ و وەڵاوش کەردەوە و ڕەوانە و بازاری و کتێبخانەو هەورامانیش کەرد.
کۆچکەردە غازی خەلیلی سەرەڕاو کۆکەردەی و شەیکەردەی، پاکنویسی و ڕێکوستەیش پەی شعرەکێ میرزا مەحمود موستەوفی کەردەن کە جە دەستنویسێ و بەیازێ جیێ جیێ کە جە میرزا مەحمود مستەوفی، میرزا عەبباس مستەوفی براو میرزا مەحمودی، میرزا تەقی کوڕیش جیا مەنێنێ.
شعرێ دیوانەکەی باس جە سروشت و زەریفی پاوەی و هەورامانی مەکەرانێ و بەشێویچشان پیوەستێنێ بە نامە ئەوەفاڕای چەنی شاعرانێ چوون، (میرزا ئولقادری پاوەیی، سەید بەهای شەمس قوڕەیشی پاوەیی، سەید فەسیح پاوەیی، کەریم بەگ، موحەمەد تاهر سوڵتانی). هاموەخت بەشێوشان ستاییش و ئەرمانای وەشەویسیەن پەی چەنڎین کەسایەتیێ ئاینیێ و دەسەڵاتدارێ هەورامانی چوون، (شێخ عومەرو بیارێ، جافر سان و موحەمەد ڕەشید بەگ).
هەرپاسە وەڵینە نویسی دیوانەکەی و دووبارە پۆرەلوای و دووبارە سەرڕاستکەردەی شعرەکانو دیوانەکەی جەلاو هونەمەند ئارام موستەوفی ئەنجام دریان و ئەرکش کێشیان.
