شەوێ ویەردێ تورکیا سیدەکان-ش بۆردومان کەردەبێ و جە ئاکامشەنە هاموڵاتی ”عەباس مەغدید“ کە پێشمەرگەو هێزو ٨٠و پەدەکە-یەن شەهید بیەبێ و سەرسەبای ئارۆی تەرمەکەش جە هەریر ئەسپەردە کریا.
شەوێ ویەردێ، باڵەپڕە جەنگیەکێ تورکیای ئەرگێری کویسانەکێ سیدەکان-یشان بۆردومان کەردەبێنێ و جە ئاکامشەنە هاموڵاتیوی شەهید بیەبێ.
زانیان، هاموڵاتیەکە نامێش ”عەباس مەغدید“ەن و تەمەنش ٣٧ ساڵێن و پیشەش پێشمەرگیایەتی بیەن جە هێزو ٨٠و پەدەکە-یەنە و جە فەرماندەیی سپیلک-ی دەوامش کەردەن.
سەرسەبای ئارۆی تەرمو نامبریا جە سیدەکانەوە بریانەوە شارچەو هەریری و ئەسپەردە کریان.
بەڵام ئانە کە سەمەرەن پەدەکە و دەزگا یاونەریەکێش ”عەباس مەغدید“شان چوون کەسێوی شوانکارە نامێ بەردەن و تا ئیسەیچ نە پەدەکە و نە هێزو ٨٠ی سەرکۆنەو بۆردومانەکەی و شەهیدبیەی نامبریاشان نەکەردەن.
ئینە یەکەم جار نییەن بە هێرشێ و بۆردومانێ تورکیا پێشمەرگە شەهید بکریۆنە و جە ویەردەنە چەنڎین پێشمەرگێ پەدەکە-ی شەهیدێ بینێ و پەدەکە وەرانوەر بەشەهیدبیەکەیشان و هێرشێ و بۆردومانەکێ تورکیا نەک هەڵوێستش نەبیەن، بەڵکو پاساوێش پەی ئاوردێنەوە و پەردەپۆشێش کەردێنێ.
