جیهاد هەورامی

ئارۆ سەعات  10:00 وەڵێ نیمەڕۆی، جە باخچەو ڕاوەبەرایەتی گردینو ڕۆشنویری و هونەرو هەڵەبجەی، بەئامادەبیەو چن ئەندام پەرلەمانێ عێراق و هەرێمو کوردستانی، چەنی جەمێ جە چالاکوانو و هاموڵاتیاو هەورامانی بەسەرپەرشتی یانەو سیاوچەمانەی و بەهامکاری ڕاوەبەرایەتی گردینو ڕۆشنویری و هونەرو هەڵەبجەی گلێرۆبیەیشا ساز کەرد چن داواکارییەشا پەی لایەنو دەسەڵات و خەڵکو هەورامانی وست ڕوە.

 

سوبحان فەیرۆز، ڕاوەبەرو یانەو سیاوچەمانەی واتش:ئامانجما جە ڕێک وستەو ئی چالاکیا بەبۆنەو ڕۆ جەهانی زوانی ئەدایی بێ و هەوڵێوە پەی پارێزناو زوانەکەیما کە هەر جە سەرەتاو ئەرەمەرزناو یانەو سیاوچەمانەی هەوڵ و تێکۆشانما پەی ئی بابەتەیە دان.

 

د.ناجح گوڵپی، پەیامو هەورامییەکاش واناوە و واتش:

ئازیزا بەشدارا یادەوەری ڕوٙجەهانی زوانی ئەڎایی ، خیٛربەیدیٛ ، یاگیٛ وەشحاڵیمانە ئاروٙ ئیٛمەی هەورامی یادو زوانەکەیما کەرمیٛوە، زوانو ویٛم گیانو ویٛما ، گیانو ویٛم زوانو ویٛما

 

 

ڕوٙ جەهانی زوانی ئەڎایی پەی یەکەم جاری ساڵەو 1999 ی جە لاو یونسکۆی " ڕیٛکوزیاو ڕوٙشنویری و پەروەوردەی و زانیاری " کریا بە ڕوێ جەهانی ، شوٙنەو ئانەیرە نەتەوەیوٙگرتەکا ساڵە و 2008ی ئەشناسا و نیاشارە بە ساڵەو زوانەکا ، پەی پاڵپەشتی و هوٙشیاری و ڕوٙشنویری و پاریٛزنای زوانی .

 

 

ساڵەو 2000 یوە ، ئاهەنگو چالاکی ملوٙ ڕاوە پەی گەورەگیٛرتەی ئی ڕوٙیەو پاڵپەشتی ئاشتی و فرە زوانی .

 

 

دماو ئانەی مسیاریٛ زانکوٙ پزیشکی دەکای ساڵەو 1952 داواشاکەردیٛ بیٛ بە زوانی بەنگالی ویٛشا بوانا ، وەرپەرنگشا کەردیٛ و پەنج مسیاریٛشا چەنە کوشتیٛ ، ئاوەختە بەنگلادش چیٛردەسو پاکستانی بیٛ و زوانی سەردەس " ئوردو " ی پاکستانی بیٛ ، وەلێ بەنگالیەکیٛ داواو وانای بە زوانو ویٛشا کەریٛنیٛ ، دماو ئازدی بەنگلادیشی چیٛردەسو پاکستانینە ، دواشا کەرد نەتەوە یوٙگرتەکا هەکە ئی ڕوٙیە کەرا بە ڕوێ جەهانی پەی پاریٛزنای و گەشەدای بە زوانەکا سەرزەمینی ، کوٙشای سەرەمڕە بی تا یونسکۆی و نەتوەیوٙگرتەکا ئەژناسا .

 

 

ئاروٙ ڕوٙ ئاهەنگ و یادەوری زوانین ڕوٙ پاڵپەشتی فرە زوانین ، ڕوٙ کوٙشایا پەی ویرۆ ئاردەی ڕوٙڵو زوانی جە فاڕایەو زانیاری و خزمەت کەردەی ئانزانیەتی ، ڕوٙ بەرجەستە کەردەو مافە زوانیەکان.

 

 

ئیٛمەی هەورامی زوانەکەما ئینا ڕیزو ئا زوانانە هەکە هەڕەشیٛ فوٙتیاشا ئینا سەرەو، وەروئانەی ئەرکو سەرو شانەیمانە پاریٛزنمیٛش ، هەوڵو تەقەلا دەیمیٛ تا چینەی زیاتەر نەفوٙتیوٙ ، قسەکەردەی و وانای و نویستەی ، ئاهەنگو کوٙنیشتی زانستی چنڎ ڕاێوەنیٛ پەی پاریٛزنای زوانی ، وەرروئانەی داوا کەرمیٛ هەورامیەکا :

 

 

١- بە زوانو ویٛشا قسیٛ بکەرا و تابلوٙ و نویستەی سەرو یاگیٛ هەرمانیٛشاوە هەورامی بوٙ.

 

 

٢-داوا کەرمیٛ جە لایە پەیوەنی دارەکا حکومەتی چینەی زیاتەر داواکاریەکاو میللەتو هەورامانی نەوزا پەشتەو گوٙشا :

 

 

٣- با وانگاکاو هەورامانینە بە زوانی ئەڎایی وانیوٙ .

 

 

٤- ئەرکو حکومەتیا گلیٛرگایوە هەورامی پەی هوٙروشکنای بکەروٙوە .