جیهاد هەورامی

بەدروشمو "جە عەفرین مدرامانا، هەڵەبجە و هەورامان پشتیوانا" بەئامادەبیەو بەشێ جە چینوتوێژەکاو شارو هەڵەبجە و هەورامانی، وەردەمو بانقە کۆنەکەی گلێرۆبیەی پەی پاڵپشتی کەردەو گەلو عەفرینی لوا ڕاواە.

جە گلێرۆبیەکەی حیکمەت فایەق بەنامێ چین و توێژەکاو هەڵەبجە و هەورامانی بەیاننامێوەش واناوە و واتش: ماوەو 36 ڕوێن عەفرین پێسەو ئەدێوە سەرو پایۆ مدران و دەرسو گیانبازی و مدرامانی پەی کوڕ و کناچەکاو گەلەکەیما مدۆوە و کەلتورو شیوەن و ڕۆحیەتو وێ بەدەسۆدایش وستەن چێرو قاچاش و جە وەراموەرەنە هەلهلەو سەرکەوتەی و مدرامانی مدۆ بە گۆشو تیرۆرستاو و جیهانیچ.

هەر چا بەیاننامەنە ئامابێ: ڕاسا مدرامان ئینا عەفرینەنە، وەلێ جە ڕاسیەنە ئا مدرامانە پەی ورشانایۆ پیلانێوە هەرێمایەتیا کە دژو پەرسو گەلو کوردی و ئا ئازادییەی کە خەریکا جە ڕۆژئاواو کوردستانینە ژیانو تاریک کریاو گەلاو سوریای و ناوچەکەش ڕووناک و ئاوەدڵن کەردەنۆ.

جە بەشو دمایینو بەیاننامەکەی باسو ئانەیچ کریابێ: عەفرین تەنیا داواو هامکاریما چەنە مەکەرۆ، بەڵکو داواو یەکڕیزیچما وەنە کەرۆ جە چوارچێوەو بەرژەوەندییە سەرینەکاو گەلەکەیما و دوور جە سەپناو دید و ئایدۆلۆژییەوی دیاری کریای، بەرخۆدانو عەفرینی دماییش ئارد بە سایکس بیکۆ و گرد ئا ڕێکەوتننامە ئیقلیمی و نێودەوڵەتیا.