هامسەرۆکایەتی کۆنسەو ڕاۋەبەری کۆما جڤاکێن کوردستان-کەجەکە، بەبۆنەو  ۱۹و تەمووزی ساڵیادو بەرپابییەی شۆڕشو ڕۆژئاڤا(وەرنیشت)و کوردستانی جە ۲۰۱۲ بەیاننامەش دان و دلێشەنە سەرەڕاو پیرۆزبایی جە شۆڕشەکەی و دەسکەوتەکاش و یادکەردەی جە شەهیدەکاش، شۆڕشەکەی بە قۆناغێۋی نوو و گرنگ پەی ڕۆژئاڤا و سوریا بە تایبەتی و کوردستان و وەرکەوتی دلین و پێۋەرە ژیۋای بەگردی مزانۆنە.

کەجەکە ئاماژەش پانەیە دان کە شۆڕشو ۱۹و تەمووزی شۆڕشێۋی کۆمەڵایەتیەن سەرو بنەما فەلسەفەو ڕێبەر ئاپۆی و ڕێبازو ۋێسەر و کۆنفەدراڵیزمی دیموکراتی ئەنجام دریان و بیەن بە نموونەو ئازادی و دیموکراسی. هەر جە سەرەتا شۆڕشی کانتۆنەکێ ڕۆژئاڤای و فەدراسیۆنو سەرنیشتو سوریای، بەقارەمانی ڕووبەڕوو هەر چەشنە هێرشێۋی بیێۋە و شۆڕشەکەشا پارێزنا و بناغەکەشا پتەوتەر کەرد و ئاڵتەرناتیڤو ژیۋای ئازاد و دیموکراتی گەلاش جە سوریانە مسۆگەر کەرد و شۆڕش سەلەمناچش کە تورکیا نەک تەنیا دوژمنو کوردی، بەڵکو دوژمنو سەرجەم گەلالەکا وەرکەوتی دلین-یەن.

کەجەکە باسش چانەیە کەردەن، کە ئارۆ جە وەرکەوتی دلین-ـەنە، شۆڕشو و دەسکەوتەکێ ڕۆژئاڤای تاکە یاگێنە کە ئازادی و دیموکراسیشا پارێزنان و پیادە کەردەن و گەل و باوەڕی و چینە جیاجیای گلێرگەی پێۋەر ئازادانە و ئاشتیانە مژیۋانە و با بە داینەمۆ فاڕای چارەنویسو وەرکەوتی دلینی. هەر پۆکەی دەسەڵاتی فاشیست و نەژاردپەرەستەکەو ئاکەپەی دژایەتیشا مەکەرۆنە. 

کەجەکە ئاماژەش بە ڕۆڵ و جایگاو ژەنێ و پیادەکەردەی دیموکراسی ڕاسەقینە جە شۆڕشەکە دان و ئاشکراش کەردەن، بەشداری کارا و بێوێنەو ژەنێ سەرجەم جیهانش شۆک کەرد، کارێش کەرد کە جیهان شۆڕشو ڕۆژئاڤای بەی شۆڕشو ژەنێ بژناسۆنە. شۆڕش سەلەمناش کە دیموکراس ڕاسەقینە ئانەنە کە بەهاکا گلێرگەی پارێزنۆنە. ژەنی و شۆشگێڵێ جە سەرتاسەرو جیهانی پەی ئەزموون هۆرگێرتەی جە شۆڕشی بە تاسە و سەرسامی ڕووەشا جە ڕۆژئاڤای نیێنە. 

هامسەرۆکایەتی کۆنسەو ڕاۋەبەری کەجەکەی دەسنیشانش کەردەن: بەهۆکارو فراۋان بیەی شۆڕشەکەی و دەسکەوتە فرێ و فراوانەکاش و کۆبیەی گەلا و باوەڕیە جیاجیاکا دۆرشەنە، هێرشە هەمەلایەنەکێ دوژمنی دژش ئەنجامێ دریێنێ و جەختش جە پەشتیۋانی وێشا و کوردستانی و وەرکەوتی دلینی پەی شۆڕشی و ڕۆژئاڤای و باکورو سوریای کەردەنەۋە.