دمابەدمای ئانەیە کە جە شارو تەوێڵێ و دەوروبەریشەنە چەنڎین هاموڵاتیێ تێستو کۆرۆنا ڤایرۆسی کریێ و تێستەکێشان ئەرێنیێ بیێ، ژمارێو چالاکوانێ وێبەخشێ شارەکە پەی ڕووبەڕووبییەی ڤایرۆسەکەی و زیاتەر تەشەنە نەکەردەیش گرووپی وێبەخششان دروستکەردەن و هەڵمەتو دەرمان شانایشان دەست پنەکەردەن و تائیسە جە تەوێڵێ و دەوروبەرشنە چەنڎین یاگێ گردیێ و دامودەستگایێ حکومیێشان دەرمان شانی کەردێنێ.
ئارۆ دوە شەممە، جە بەردەوامی هەڵەمەتەکێنەشانە چالاکوانە وێبەخشەکێ ژمارێو دامودەستگایێ حکومیێ شارەکەیشان دەرمان شانی کەردێنێ کە بریتیێنێ جە: یاگە گردیەکان، بنکێ و بارەگایەکێ پۆلیس، ئاساییش، نشینگە، دەروازەو سنوری و بازگەکێ ناوچەکەی.

هامکات چالاکوانە وێبەخشەکێ سەبارەت بە ڕاکارەکێ وەرگیری و وێپارێزی جە کۆرۆنا ڤایرۆسی زانیارێ بە هاموڵاتیان مەڎانێ و جە مەتەرسیەکانو نەوەشیەکەی کە بییەن بە پەتا و بە خێرایی جە هەورامان و کوردستان و جیهانەنە وەڵاو مەبۆنەوە وشیارێشان مەکەرانێوە.