هاوسەرۆکی گشتی پارتی هەرێمە دیموکراتیکەکان (دەبەپە) کەسکین بایندەر لە ئێلح چەند سەردانێکی ئەنجامدا، لەم چوارچێوەیەدا سەردانی ڕێکخستنەکانی دەم پارتی لە حەزرۆ و قابلجەوز کرد.

لە سەردانەکەدا بایندەر ڕایگەیاند سیستەمی دەوڵەت هەمیشە کاردەکات بۆ لەناوبردنی تێکۆشانی گەلی کورد، بەڵام لە ئێلح و ڕۆژئاوا و تەواوی کوردستان تێکۆشانی ئازادیی کورد تا دێت مەزنتر دەبێت.  

"بەرخۆدان سەرکەوتن دەهێنێت"

بایندەر تیشکی خستەسەر سەرکەوتنەکانی گەلی کورد، گوتی: "لە ١٣ ی تشرینی یەکەم بۆ ئازادی ڕێبەری گەلی کورد عەبدوڵا ئۆجالان و چارەسەری دیموکراتیکی پرسی کورد، گردبوونەوەمان ئەنجامدا. لە ٧ تا ٧٠ ساڵی بەڕوونی ئیرادەی خۆیان نیشاندا. ئەردۆگان و باخچەلی ئەمەیان بینی بۆیە دەیانەوێت پرۆسەیەکی نوێ دەست پێ بکەن".

بایندەر ڕایگەیاند هەرگیز پاشەکشە لە ئازادی ڕێبەری گەلی کورد عەبدوڵا ئۆجالان ناکەن، گوتی: "بڕوامان وایە پرسی کورد لەم چوارچێوەیەدا چارەسەر دەکرێت. ئەوان دەڵێن ئەگەر ئەم پرسە چارەسەر نەکەین لەناودەچین. باوەڕیان وا بوو تا ساڵی ٢٠٢٤ کۆتایی بە تێکۆشانمان دەهێنن و یەکێتی کوردان لەناودەبەن. بەڵام ئیدی چارەیان نەماوە. ئێمە لێرەین و بەپێوەین و درێژە بە تێکۆشان دەدەین. ئەم گفتوگۆیانەی لەم ڕۆژانەی دوایی دەکرێن، بەرئەنجامی تێکۆشانی ڕەوای کوردانە".