چالاکیی دایکانی شەممە: دەبێت پێشوازی بکرێت لە داخوازییەکان بۆ ئاشتی
لە چالاکیی دایکانی شەممەدا، هاوسەرۆکی گشتی دەم پارتی، تونجەر باقرخان ڕایگەیاند دەبێت پێشوازی بکرێت لە داخوازییەکان بۆ ئاشتی.
دایکانی شەممە/مرۆڤانی شەممە ١٠٥١ هەمین چالاکی خۆیان لە گۆڕەپانی گەڵەتەسەرای ئەنجامدا، داوایان کرد چارەنووسی خزمە بێسەروشوێنەکان و کوژراوەکانیان، دادگایی بکرێت. لە چالاکی ئەم هەفتەیەدا، هاوسەرۆکی گشتی پارتی یەکسانی و دیموکراسیی گەلان (دەم پارتی) تونجەر باقرخان و ئەندامی شاندی ئیمراڵیی دەم پارتی پەروین بوڵدان و چەندین کەسوکاری بێسەرشوێنان و ئەندامانی پارتە سیاسییەکان بەشداربوون.
لە کەسوکاری بێسەروشوێنان ماسیدە ئۆجاک ڕایگەیاند دەبێت چارەنووسی ئەو کەسانەی بێسەروشوێنکراون، ئاشکرا بکرێت، بکەر و بەرپرسیاران دادگایی بکرێن و سزا بدرێن، دەربازبوون لە سزا کۆتایی بێت.
ئۆجاک ڕایگەیاند بەجێهێنانی داخوازییەکانیان بە ئاشتییەکی درێژخایەن دێتەدی، گوتی: "دەبێت دەرفەتی ئاشتی نەکرێتە قوربانی حیساباتی سیاسی؛ بۆ بەدیهێنانی ئاشتییەکی دادپەروەرانە و درێژخایەن دەبێت ئیرادەیەکی سیاسی بەهێز پیشان بدرێت".
لە کەسوکاری بێسەروشوێنان میکایل کربایەر، گوتی: "دژی ئەو کەسانەی بێڕێزی بە چارەنووسی کەسانی بێسەروشوێن دەکەن، دژی سیاسەتی پاکتاوکردن و نکۆڵیکردن، ئێمە وەک بنەماڵەی بێسەروشوێنان و هاوڕێیانمان تا بەدیهاتنی دادپەروەری و ڕاستی، درێژە بە تێکۆشان دەدەین".
هاوسەرۆکی گشتی دەم پارتی، تونجەر باقرخان وەڵامی پرسیاری ڕۆژنامەنووسانی دایەوە و گوتی، دەبێت پێشوازی بکرێت لە داخوازی کەسوکاری بێسەروشوێنان بۆ ئاشتییەکی کۆمەڵایەتی.
