دەستپێشخەری پشتیوانی لە زیندانیان بەرامبەر دواخستنی ئازادکردنی ١٠ زیندانی ژن لە زیندانی باکرکۆی لەلایەن دەستەی چاودێری و ئیدارەی زیندانەوە بۆ ماوەی ساڵێک، شەرمەزار کرد.

لە بەردەم زیندانی باکرکوی بە پاڵپشتی وهاوکاری بە بنەماڵەی زیندانیان، نوێنەری شار و شارۆچکەکانی دەم پارتی ئەستەنبوڵ، کەسوکاری زیندانیان و زۆرێک لە ڕێکخراوەکانی کۆمەڵگای مەدەنی بەخوێندنەوەی راگەیەندراوێک دواخستنی ئازادکردنی زیندانیان شەرمەزارکرد. لە چالاکییەکەدا دروشمی "با زیندانەکان بڕووخێن، زیندانیان ئازاد بکرێن" و "ژن، ژیان، ئازادی" بەرزکرانەوە.

جێی ئاماژەیە لە چەند ساڵی ڕابردوودا دواخستنی ئازادکردنی زیندانیان بووەتە گەورەترین کێشەی زیندانەکان و زیندانیانی وڵاتپارێز و شۆڕشگێڕ. ئەو زیندانیانەی کە سزاکانیان تەواو کردووە، بە هۆکاری جۆراوجۆر لە زیندانەکاندا بە بارمتە دەگیرێن و ئازادکردنەکانیان دوادەخرێت.

دواخستنی ئازادکردنەکان لە زیندانی ژنانی باکرکۆی بووە بە دۆخێکی سیستماتیک و ئازادکردنی ١٠ زیندانی ژن بۆ ماوەی ساڵێک دواخراوە. ئەم دواخستنە بە ڕێبازی هەڕەمەکی دەکرێت و وەک ناوەندەکانی مافی مرۆڤ ئاماژەی پێدەکەن هیچ بنەمایەکی یاسایی نییە.

لە راگەیەندراوەکەدا دایکی ئاشتی سەبیحە بۆزان ڕایگەیاند، رێگری لە ئازادکردنی زیندانیان تاوانە و وتی: "ئێمە بە هیچ شێوەیەک ئەمە قبوڵ ناکەین. ئەمڕۆ لە زیندانەکاندا گۆشەگیرییەکی مەزن لەئارادایە. داوا لە وەزیری داد، وەزیری ناوخۆ و سەرۆککۆمار دەکەین. کۆتایی بەم تاوانانە بهێنن. ئیتر بەسە."