هاینز بیرباوم سەرۆکی پارتی چەپی ئەوروپا  (European Left Party EL) داوایکرد ناوی پەکەکە لە "لیستی ڕێکخستنە  تیرۆریستییەکان" دەربهێنرێت.

بیرباوم وتیشی، قەدەغەی سەر پەکەکە گەورەترین بەربەستە بۆ ئاشتی لە تورکیا و کوردستان و ناوچەکە و وتیشی، پەکەکە لە شەڕی دژی داعشدا بەرگریی لە بەها مرۆییەکان کردووە و بەها مرۆییەکانی پاراستووە.

بیرباوم ئەوەشی وت: "هەڵگرتنی قەدەغەی سەر پەکەکە و لابردنی ناوی پەکەکە لە لیستی تیرۆری یەکێتی ئەوروپا بۆ تورکیا و تەواوی ناوچەکە دەبێتە هۆی گرتنەبەری هەنگاوێکی ڕاست بۆ پرۆسەی ئاشتی. لەبەر ڕۆشنایی تێکۆشانی پەکەکە و هاوپەیمانەکانی لە دژی داعش و ڕزگارکردنی سەدان هەزار ئەندامی کەمینە نەتەوەیی و کەمینە ئاینییەکان، دەبێتە نیشانەی گرنگیی پشتگیری و داننان بە بزووتنەوەی ڕزگاریخوازی کورد دا".

بیرباوم وتیشی: بەهۆی قەدەغەی سەر پەکەکە کورد نەک تەنها لە تورکیا، بەڵکو لە ئەوروپاش مافەکانیان دەستبەسەر و زەوت دەکرێت و کوردانی ئەوروپاش لە ژیانی سیاسی دادەبڕێندرێن و دوور دەخرێنەوە.

بیرباوم لە بەردەوامیی وتەکانیدا ئەوەشی وت: "بە هۆی قەدەغەی سەر پەکەکە و گوشار و کۆنترۆڵی ئەمنی رێگا نادرێت کوردانی دانیشتووی یەکێتیی ئەوروپا و بزووتنەوە سیاسیی کورد چالاکانە کار و رۆڵی خۆیان ئەنجام بدەن. لە ئەنجامی ئەو قەدەغەکارییەدا دەیان هەزار مرۆڤی کورد لە ئازادیی ڕادەربڕین، رێکخستنی کۆڕ و کۆبوونەوە، کاری ڕۆژنامەگەری و مافە بنەڕەتییەکانیان بێبەشکراون و ئەوەش رێگرە لە بەردەم ئاوێتەبوونی کورد و ئینتیگراسیۆنیان لەگەڵ کۆمەڵگەى ئەوروپی".

بیرباوم لە کۆتایی وتەکانیدا ڕایگەیاند، هاوکارییە سەربازییەکانی دەوڵەتانی ئەوروپا بۆ دەوڵەتی تورک ئیدانە دەکەن و نایانەوێت وڵاتانی ئەوروپا چەک ڕەوانەی تورکیا و وڵاتانی دیکەی ناوچەکە بکەن.

ژ.ت