کەنەکە بە پەیامێک پیرۆزبایی لە هەڵبژاردنی پارێزگاری کەرکوک ڕێبوار تەها و یەنەکە کرد و گوتی: "بەهیواین ئەم قۆناغە نوێیە ببێتە قۆناغی پێکەوەژیانی ئاشتیانە و یەکترقبووڵکردن و کردنەوەی لاپەڕەیەکی نوێی خزمەتکردن".
کۆنسەی بەڕێوەبەری کۆنگرەی نەتەوەیی کوردستان پەیوەست بە هەڵبژاردنی پارێزگاری کەرکوک ڕێبوار تەها پەیامێکی پیرۆزبایی بڵاوکردەوە.
ڕاگەیاندراوەکەی کەنەکە بەم جۆرەیە:
کەنەکە پیرۆزبایی لە یەنەکە و پارێزگاری نوێی کەرکوک دەکات و دەڵێت: "بەهیواین ئەم قۆناغە نوێیە ببێتە قۆناغی پێکەوەژیانی ئاشتیانە و یەکترقبووڵکردن و کردنەوەی لاپەڕەیەکی نوێی خزمەتکردن بۆ شارێک کە زیاتر لە سەد ساڵە لەلایەن دەسەڵاتەوە هەوڵدەدرێت دیمۆگرافیاکەی بگۆڕدرێت. بە پیلانگێڕیی جۆر بە جۆری ناوخۆیی و دەرەکی هەوڵدەدرێت لە بەشاربوون دووربخرێتەوە و هەڵبوەشێنرێتەوە.
کەنەکە هیواخوازە ڕێبوار تەها بتوانێت برینەکانی کەرکوک ساڕێژ بکات، دەڵێت: "بانگەواز هەموو گەلی کەرکوک و گەلی کوردستان دەکەین هاوکار و پشتیوانی بکەن".
کەنەکە بە گرنگی دەزانێت پارتە کوردستانییەکان هاوکاربن بۆ مسۆگەرکردنی داهاتوویەکی باشتر بۆ کەرکوک، دەڵێت: "بە جێبەجێکردنی ماددەی ١٤٠ ی دەستوور ستەمی ڕژێمی بەعس بە تەواوی بسڕنەوە".
هەروەها دەڵێت: "کەرکوک شارێکی مێژوویی پێکەوەژیان و یەکترقبووڵکردنە. بەهۆی پێگە ستراتیژییەکەی و سەرچاوەکانی ژێرزەوی و شارستانییەتە دێرینەکەی، وڵاتانی هەرێمەکە هەردەم هەوڵدەدەن دەستوەردانی تێدا بکەن و ناهێڵن گەلی کەرکوک بە ئارامی بژی. بۆیە دژی ئەم دەستوەردانە خەباتێکی هاوبەش گرنگە.
جارێکی تر پیرۆزبایی لە هەموو دانیشتووانی کەرکوک دەکەین و هیوای ئایندەیەکی گەشیان بۆ دەخوازین".
