ئەرتوغروڵ کورکچو سەرۊکی فەخریی هەدەپەی و ئەندامی فەخریی دەسەو پەرلەمانتاراو ئەنجوومەنوو ئەورووپای، بارەو ورچنیەیەکاو ١٤و ئایاریوە پەی ئاژانسوو هەواڵوو فوراتی (ANF) قسێش کەرڎۍ.

 کورکچو واتش، ورچنیەیەکاو ١٤و ئایاری جە ئاستوو ستراتیژینە گرنگێنۍ و واتیچش، "چونکوم ئێمە، ڕاگێری جە حەوڵەکا پەی بنیاتنیایی دیکتاتۊریەتێوە فاشیستی کەرمۍ، یان ئێمە بەرەو ئا حەوڵا ملمۍ. مەبۊ ئێمە ڕا بە شکسی دەیمۍ. پەنەوازا ئێمە چی کۊشیاینە سەرۍ گنمۍ، چونکوم دماو ساڵەکاو ٢٠١٥ – ٢٠١٦، دماو سەرکەوتەی گەورەو هەدەپەی، ئێمە حەوڵەکێما پەی زەنگۊڵپەنەدایرەی بە گەلوو کورد، بە دیموکراسی جە تورکیا و دیموکراتەکاو تورکیاینە مردنۍ. ئێساتێچ ئێمە چی ورچنیەینە فرسەتێوە خاسما دەس کەوتەن پەی لابەرڎەی و دووروستەیۊ تەیب ئەرڎۊغانی، مەهەپەی هامکاری، ئەرگەنەکۊنی و هامپەیمانێتییەکەیشا جە دەسەڵاتی."

'پڕۊسێوە تازە پەی چارەسەرکەرڎەی مشکیلەو کورڎی دەس پەنە کەرۊ'

کورکچو واتش، شکسپەنەئارڎەی ئاکەپەی بۊ بایسوو چارەسەرکەرڎەی مشکیلەو کورڎی و واتیچش، "هامسەنگیی ئیسەی جە دژوو دەسەڵاتین و ڕووەش کەرڎێنە ئۊپۊزسیۊنی. ئێمە ئینایمۍ نزیکوو ورچنیەینە و گەرەکما ئەرەیاونووش، دماو ئی ورچنیەینە ڕاستەوخۊ و بەزووی جە لایەنی کۊمەڵایەتی و ئابوورییوە تورکیانە حیچ مەفاڕیۊ، وەلێم ڕەوایبییەی ڕژێمی تاکەکەسی دلێنە بریۊ. ئینە فرسەتوو ئانەی بە گەلوو کورڎی، دیموکراتەکا، هەژاراو تورکیای، زەحمەتکێشا و کرێکاراو تورکیای و گردوو بەشەکاو گلێرگەی بەخشۊ، کە مافوو ئانەیشا بۊ جە کۊشیای وێشانە ئازادیی ڕابەروستەی، هەرمانەی ڕێکوزیاییە و پەشتیوانی و هامپشتیێوە گەورە بەدەس بارا، بەڵام سنووروو ڕژێمی هەن. گرنگتەرین چێو، کە ئێمە چی ورچنیەینە چەمەڕوانییش کەرمۍ ئانەن، کە ڕا پەی سەرڎەمۍ و قۊناغێوە تازەو خەباتی و کۊشیای کەرمێوە. سەبارەت بە چارەسەرکەرڎەی مشکیلەو کورڎی، گەرەکمانە وەرڎەنگ و موخاتەبی تازە وێزمێوە، پڕۊسێوە تازە دەس پەنە کەرمۍ و پا یاسایا، کە جە پەرلەماننە ئامادێشا کەرمۍ، بە حەوڵوو دەستووری تازەی، دەرفەتوو ئانەیما پەی مەیسەر بۊ، کە قسۍ و بەروستەیەکێما بەبەقووەتی باس کەرمۍ و وەڵاشا کەرمێوە. ئێمە خەبات پەی هەلومەرجی تازەی و گونجیاتەری کەرمۍ. ڕزگاری بەندا پا ئەنجاماوە، وەرپەرسبییەی ئێمە ئانەن، کە مشۊم ئی پڕۊسەیە سەر وزمێ".

کورکچو ئەرەیاوناش، ئاکەپە گەرەکشا پڕۊسەو ورچنیەی تێک بدۊ، وەلێم حەرحەوڵێوە چی چوارچووەنە وەرڎەموو حەز و ئیرادەو گەلینە شکس مارۊ.

'بەدڵنیاییوە فاشیزم وڕۊ'

کورکچو جە قسەکاشنە ئاماژەش بە گرنگیی دەنگدای جە ئەورووپانە کەرد و واتش، حەر دەنگداێوە جە ئەورووپانە بە پارتوو چەپی سەوزی بدریۊ بۊ بایسوو وڕنای فاشیزمی و کەرڎەیۊ بەرەکاو تورکیای."

 کورکچو ئەرەیاونایچش، کەمیی ڕێژەو بەشداریکەرڎەی دەنگداینە قازانج بە دەسەڵاتدارا یاونۊ و ئانەیچش وات، "هەدەپە جە سەیەو دەنگینە جە ئەورووپا ٢ پەرلەمانتارۍ زیاڎتەرێش ڕوانەو پەرلەمانی کەرڎۍ. نزیکەو ٣ ملوێن دەنگدەرا جە ئەورووپانە هەنۍ. فرەو ئا دەنگا هینۍ  پارتی دەسەڵاتداری نیەنۍ، وەلێم کەمتەرخەمی و خەمسەرڎی پێسە 'بە دەنگێوە حیچ مەبۊ'ی دلۍ ئۊپۊزسیۊنینە، قازانج بە دیکتاتۊریەتی میاونۊ، پەنەوازا ئینەی پێچەوانە کەرمێوە، متاومۍ تەنیا بە یەک دەنگیچ ڕاو ورشانایۊ و وڕیای فاشیزمی دیارییە کەرمۍ."

س.ز