لە ڤییەنا چالاکییەک بۆ ناڕەزایەتی بەرامبەر بە دەستگیرکردنی ٥٥ گەنج بەڕێوەچوو. ئەو گەنجانە لە دژی بەکارهێنانی چەکی کیمیایی لەلایەن دەوڵەتی تورکەوە، لە بەردەم رێکخراوی قەدەغەکردنی چەکە کیمیاییەکان (ئۆ پی سی دەبیلو - OPCW) لە لاهای چالاکییان ئەنجامدابوو.
ڕۆژی ٣ی کانوونی یەکەم دژی بەکارهێنانی چەکی کیمیایی لەلایەن دەوڵەتی تورکەوە لە بەردەم رێکخراوی قەدەغەکردنی چەکە کیمیاییەکان (ئۆ پی سی دەبیلو - OPCW) لە شاری دێنهاگ (لاهای) هۆڵەندا چالاکییەک ئەنجامدرا، بەڵام هێزە ئەمنییەکانی هۆڵەندا هێرشیان کردە سەر چالاکوانان و ٥٥ کەسیان دەستگیرکرد. بۆ ئیدانەکردنی دەستگیرکردنی ئەو ٥٥ گەنجە چالاکوانە لەبەردەم باڵوێزخانەی هۆڵەندا لە شاری ڤیەننای نەمسا گردبوونەوەیەک رێکخرا.
چالاکییەکە لەلایەن کۆمەڵەی ڕۆشنبیریی کوردەوە ڕێکخرابوو و پۆستەرێکی تیادا بەرزکرابووە، کە لەسەری نووسرابوو "تورکیا بە کیمیایی کوشتار دەکات" و "هێرشەکانی دەوڵەتی تورک بۆ سەر ناوچە کوردییەکان بوەستێنن".
هەروەها لەو چالاکییەدا داوای ئازادکردنی ٥٥ گەنجی دەستگیرکراوەکە کرا.
ژ.ت
