کۆمەڵێک لە گەنجی کورد لە بەردەم بینای باڵیۆزخانەی هۆڵەندا لە لەندەن کۆبوونەوە و دەستگیرکردنی ٥٥ چالاکوانی کوردیان ئیدانە  کرد. گەنجانی کورد لە دژی بەکارهێنانی چەکی کیمیایی لەلایەن دەوڵەتی تورکی داگیرکەرەوە لە بەردەم رێکخراوی قەدەغەکردنی چەکە کیمیاییەکان (ئۆ پی سی دەبیلو - OPCW) لە شاری دێنهاگ (لاهای) هۆڵەندا چالاکییەکیان ئەنجامدابوو، بەڵام هێزێکی ئەمنیی هۆڵەندی هەڵیکوتایە سەریان و ٥٥ گەنجیانی دەستگیرکرد.

بۆ پشتیوانیکردن لەو گەنجانە و ئیدانەکردنی ئەو رەفتارەی دەوڵەتی هۆڵەندا، چالاکییەک لە بەردەم باڵیۆزخانەى هۆڵەندا لە شاری لەندەن بە پێشەنگایەتیی تێکۆژن (ژنانیگەنجی تێکۆشەر) و تەجەشە (بزووتنەوەى گەنجانی شۆڕشگێڕ) رێکخرا. لە چالاکییەکەدا بە  بەردەوامی دروشمەکانی "بژی سەرۆک ئاپۆ"، "بمرێ فاشیزم"، "بژی بەرخۆدانی شۆڕشگێڕی" و "ئەردۆغانی بکوژ" دەوترانەوە.

چالاکوانان داوایان لە هۆڵەندا کرد، کە دەستبەجێ چالاکوانە کوردە زیندانیکراوەکان ئازاد بکات و ڕایانگەیاند، هۆڵەندا بەو کارەی  پشتیوانی لە دەوڵەتی تورک دەکات، کە تاوانی دژ بە مرۆڤایەتی ئەنجام دەدات.

چالاکییەکە بە چەپڵە لێدان و دروشم کۆتایی پێهات.

ژ.ت