کۆمەڵەی مافەکانی مرۆڤ (ئیهادە) بۆ زیندانیانی نەخۆش لە ٣٠ شار دەستی بە ئیشکگری 'ژیان بپارێزین' کرد.

چالاکیەکە کاتژمێر ٢١:٠٠ کۆتایی دێت. لە چالاکیەکەدا داوا لە رای گشتی کرا کە لەبارەی دۆخی زیندانیانی نەخۆش هەستیار بن.

ئەنقەرە

لە باڵەخانەی ئیهادەی ئەنقەرە پانکارتی 'ژیان بپارێزین و زیندانیا نەخۆشەکان پێویستە ئازاد بکرێن' هەڵواسرا. ئوزتورک تورکدۆغان هاوسەرۆکی گشتی ئیهادە، عومەر فاروق گەرگەریئۆغلۆ پەرلەمانتاری هەدەپە بەشداریان لە ئیشکگریەکەدا کرد. لە چالاکیەکەدا یادی غەریبە گەزە و وەدات ئەرکمەنکرایەوە کە لە زیندانەکاندا بە شێوەیەکی گۆماناوی گیانیان لەدەستدا هەروەها وێنەی زیندانیانی نەخۆش بەرزکرایەوە.

ئامەد

لقی ئامەد ئیهادە بۆ ئازادی زیندانیانی نەخۆش لەبەردەم کۆمەڵەکەیان دەستی بە ئیشکگری 'ژیان بپارێزین ' کرد. دەرسیم داغ و پیرۆ پایلان پەرلەمانتارانی دەرسیم بەشداریان لە چالاکیەکەدا کرد. ئەرجان یڵماز هاووتەبێژی ئیهادە داوای کرد زیندانیە نەخۆشەکان بە زوترین کات ئازاد بکرێن.

ناهید ئەرەن سەرۆکی سەندیکای پارێزەرانی ئامەد و شاندێک سەردانی چالاکوانانی کرد.

ئیزمیر

لقی ئیزمیری ئیهادە لەبەردەم کۆمەڵەکەیان دەستی بە ئیشکگری کرد. پانکارتی 'ژیان بپارێزین' لە هۆڵی کۆمەڵەکە هەڵواسرا. ژمارەیەکی زۆر کەسایەتی و چالاکوانان بەشداریان کرد. ئاماژە بە دۆخی زیندانیانی نەخۆش کرا.

مێردین

لقی مێردینی ئیهادەش لە باڵەخانەی هەدەپە دەستیان بە چالاکی کرد. دواتر راگەیەنراوێک خوێندرایەوە و ئاماژە بەوەکرا کە لەم مانگەی دواییدا ٧ زیندانی لە زیندانەکاندا گیانیان لەدەستداوە و زیندانیان بە تابوت هێنرانە دەرەوە و ویژدانی هەموومان چووە ناو ئەو تابوتانە.

بەڕێوەبەرانی هەدەپە لە مێردین و ناوچەکانی و بەرپرسانی سەندیکای پارێزەرانی مێردین بەشداریان لە چالاکیەکەدا کرد.

وان

چالاکی 'با ژیان بپارێزین' لە وان لە بەردەم باڵەخانەی ئیهادە ئەنجامدرا. نوێنەرانی دەزگا مەدەنی و جەماوەریەکان بەشداریان کرد. چالاکیەکە تاوەکو کاتژمێر ٩ بەردەوام دەبێت. لە چالاکیەکەدا راگەیەنراوی هاوبەشی ناوەندی گشتی ئیهادە خوێندرایەوە.

جۆلەمیرگ

لە لقی جۆلەمێرگی ئیهادە بۆ چالاکیەکان دەست بە ئیشکگری کرا. نوێنەرانی زۆر رێکخراوی جەماوەی سەردانی ئیشکگریەکان کرد و راگەیەنراوی هاوبەش خوێنرایەوە.

ئەدەنە

لی ئیهادەی ئەدەنە لە باڵەخانەی هەدەپە دەستی بە چالاکیەکە کرد. ئەندامانی دەبەپە، هەدەپە، تەژەئا، تۆپ، ئایکای، ئائاتوهای – دەر و زۆر کەسی دیکە بەشدار بوون.

هاتای

لقی هاتای ئیهادە لەبەردەم کۆمەڵەکەیان کۆبونەوە و دەستیان بە ئیشکگری 'ژیان بپارێزین' کرد.

ئانتاڵیا

لقی ئانتاڵیای ئیهادە لە بەردەم باڵەخانەکەیان دەستیان بە ئیشکگریەکە کرد.

مێرسین

لە مێرسینیش بە هەمان مەبەست ئەندامانی کۆمەڵەکە کۆبونەوە و ئاماژەیان بە دۆخی مەترسیداری زیندانیانی نەخۆش کرد.

ف.ق