بە پێی ئەو ئامارانەی ڕۆژنیوز بڵاوی کردوونەتەوە، لە مانگی ئاداری ئەمساڵدا لە شارە جیاجیاکانی باشووی کوردستان ژنێک کوژراوە و دوو ژنی دیکەش بە شێوەی گوماناویی گیانیان لەدەستدا.
لە ئامارەکەدا ڕێژەی گیان لەدەستدانی ژنان لە مانگی ئاداردا لە شارە جیاوازەکانی باشووری کوردستاندا بڵاوکراوەتەوە و تێیدا بە دڕندەترین شێوە کوژرانی ژنێک دەرخراوە کە بە دەست و پێ بەستراوی خراوەتە زێی گەورەوە.
لە ئامارەکەدا هاتووە:
- لە ٤ـی ئاداردا لە سنووری ئیدارەی سۆران مامۆستایەک بە ناوی ئاوات محەمەد کەریم خەڵکی دەڤەری برادۆست و دانیشتووی شارۆچکەی چۆمان دوای چوار ڕۆژ مانەوە لە نەخۆشخانە بە هۆی زۆری ڕێژەی سووتانەوە گیانی لەدەستدا.
- لە ١٣ـی ئاداردا لە کاتژمێر ١١:٠٠دا لە زێى گەورە سەر بە گوندى زەنگل لە سنووری ئاکرێ تەرمی ژنێک دۆزرایەوە كە تەلى ئاسن لە قاچ و ملى ژنەکە گرێدراوە و پێى خنکێنراوە و دواتر خراوەتە زێى گەورەوە.
- لە ١٧ـی ئاداردا لە نەخۆشخانەیەکی شاری هەولێر ژنێکی تەمەن ٥٢ ساڵ و دانیشتووی ڕانیە کە بوتڵی غاز لە ماڵەکەیان تەقییەوە لە دوای چوار ڕۆژ مانەوە لە نەخۆشخانە بە هۆی سەختی بڕینەکەی گیانی لەدەستدا.
ئاماری مانگەکانی کانوونی دووەم و شوبات
هەر لە ئامارەکەدا سەرنج خراوەتەسەر ئاماری کوژرانی ژنان لە مانگی کانوونی دووەم و شوباتدا و ئەمە هاتووە: "لە مانگی شوباتی ئەمساڵدا لە شارەکانی سنووری سلێمانی و هەولێر سێ ژن کوژراون، هەروەها ژنێکیش بە شێوەی گوماناویی گیانی لەدەستداوە. لە مانگی کانوونی دووەمی ئەمساڵدا لە سنووری سلێمانی و پێنجوێن و هەولێر سێ ژن کوژراون، هەروەها دوو ژنی دیکەش بە شێوەی گوماناوی گیانی لەدەستداوە."
