کۆمەڵەی ژنانی زەنوبیا حکوومەتی نوێی دەسەڵاتی دیمەشق ڕەت دەكەنەوە و دەڵێن، حکوومەت بەردەوامە لە پەراوێزخستنی ڕۆڵی ژنان، دەشڵێن، بەدەستهێنانی تواناسازی ژنان مەرجە بۆ بنیاتنانی کۆمەڵگەیەکی دادپەروەر.
کۆمەڵەی ژنانی زەنوبیا سەبارەت بە پێكهێنانی دەسەڵاتی دیمەشق ڕاگەیاندراوێکی بڵاوکردەوە.
لە ڕاگەیاندراوەکەدا کۆمەڵەی ژنانی زەنوبیا هەموو گرتنەبەرەکانی حکومەتی نوێی دیمەشقی لە دژی ژنان ڕەتکردووەتەوە و هاتووە: "حکوومەتی نوێ لە دیمەشق و پەراوێزخستنی بەردەوامی ڕۆڵی ژنان لە ژیانی سیاسیدا ڕەت دەکەینەوە و بە حکوومەتێکی ناشەرعی دەزانین، کە نوێنەرایەتی ئیرادەی گەلی سووریا ناکات."
لە ڕاگەیاندراوەکەدا جەخت لە کۆدەنگی نیشتیمانی کراوەتەوە و دەڵێت: "هەر چارەسەرێکی سیاسی لە سووریا دەبێت لەسەر بنەمای کۆدەنگییەکی نیشتمانی گشتگیر بێت و نوێنەرایەتی هەموو پێکهاتەکانی گەلی سووریا بکات بە شێوەیەکی دادپەروەرانە و ڕاستەقینە بە ژنانیشەوە."
هەر لە ڕاگەیاندراوەکەدا جەخت لەسەر بەشداریی کارگەرییانەی ژنان کراوەتەوە لە بەشەکانی حکومەتی نوێدا و هاتووە: "داوا دەکەین ژنان نوێنەرایەتی ڕاستەقینە و کاریگەرییان هەبێت لە هەموو دامودەزگاکانی دەوڵەت، جەخت لەسەر ئەوە دەکەینەوە بەدەستهێنانی یەکسانی جێندەر و تواناسازی ژنان مەرجە بۆ بنیاتنانی کۆمەڵگەیەکی دیموکراتی و دادپەروەر."
