کۆمیتەی پەیوەندییەکانی دەرەوەی کەجەکە داوای لە هێزەکانی عێراق و باشووری کوردستان کرد کە نەبنە هاوبەشی بانگەوازەکانی جینۆسایدی دەوڵەتی تورکی داگیرکەر و رایگەیاند، "دەوڵەتی تورک بە سەرکێشی سەردەستەی فاشیست ئەردۆغان، گەورەترین هەڕەشەی ئەمنییە لە سەر عێراق".
کۆمیتەی پەیوەندییەکانی دەرەوەی کەجەکە سەبارەت بە سەردانی کاربەدەستانی دەوڵەتی تورکی داگیرکەر بۆ بەغدا راگەیەندراوێکی بڵاوکردەوە . کەجەکە رایگەیاندووە، "سێ وەزیری دەوڵەتی تورکی داگیرکەر ئەمڕۆ سەردانی پایتەختی عێراقیان کرد و لە گەڵ کاربەدەستانی دەوڵەتی عێراق کۆدەبنەوە. بەر لەو سەردانە سەردەستەی فاشیست ئەردۆغان و کاربەدەستانی دیکەی دەوڵەتی تورک لێدوانیان دا و بە گوێرەی ئەو لێدوانانە، هەروەها ئەو تاوانانەی کە سوپای تورکی داگیرکەر لە مانگی رابردوو لە بەرامبەر هاوڵاتیانی عێراق ئەنجامی داوە، رۆژەڤی کۆبوونەوەکە دیارە کە چییە و لە ئێستا بەدواوە چی دەکرێت".
لە راگەیەندراوەکەدا هاتووە، "دەوڵەتی تورک سیاسەتی ناوخۆ و دەرەوەی لە سەر بنەمای جینۆساید و قڕکردنی گەلی کورد بەڕێوەدەبات". راگەیەندراوەکە بەم جۆرە بەردەوام بووە، "بۆ ئەوەش لە ناوخۆ نکۆڵی لە هەبوونی گەلی کورد دەکات، سیاسەتی قڕکردنی کولتوری لە دژی کوردەکان بەڕێوەدەبات، پێوانە ئەخلاقی و مرۆییە بنچینەییە نەتەوەیی، نێونەتەوەیی و گەردوونییەکان پێشێل دەکات و بە نەبوویان دادەنێت و لە دژی رێبەری گەلی کورد عەبدوڵا ئۆجالان سیاسەتی گۆشەگیری دژوار پەیڕەو دەکات. سیاسەتی دەرەوەی خۆیشی بە شێوەیەک کە خزمەت بەو سیاسەتەی جینۆساید لە ناوخۆ بکات، رێکدەخات و بەڕێوەی دەبات. لەبەر ئەوە لە هەر شوێنێکی جیهان دەبێت، باببێت، لەگەڵ کێ کۆدەبێتەوە و دیدار دەکات، رۆژەڤ و داواکاری سەردەستەی فاشیست ئەردۆغان و کاربەدەستانی دیکەی دەوڵەت، وەرگرتنی پشتیوانی نێونەتەوەییە بۆ شەڕی قڕکردن لە دژی کورد. لە دیدارەکانی نەتەوەیەکگرتووەکان تا کۆبوونەوەی باڵای ناتۆ، لە داڤوسەوە تا میونشن تا ئاستانا و سوچی، رۆژەڤ و ئەجیندای سەرەکی ئەردۆغان دۆزینەوە و بەدەستهێنانی پشتیوانییە بۆ سیاسەتی قڕکردنی کوردان و هاوبەشیپێکردنی هێز و دەوڵەتان لەو تاوانی قڕکردنەدا. سیاسەتی تورکیا لە رۆژهەڵاتی ناوەڕاست لە هەمان چوارچێوەدایە. بە تایبەتی لە چەند مانگی رابردوودا لە بەرامبەر دەوڵەتی عێراق سیاسەتی سەرانەسەندن و چاوسوورکردنەوە و هەڕەشە پەیڕەو دەکات و دەیەوێت دەوڵەتی عێراق لە سیاسەتی قڕکردنی خۆیدا بەشداری پێبکات".
رژێمی ئەردۆغان رژێمی سەدامی نوێیە، هەمان جەوهەر و ناوەرۆکی هەیە
لە راگەیەندراوەکەی کۆمیتەی پەیوەندییەکانی دەرەوەی کەجەکەدا ئاماژە بە ئەم بابەتانە کراون:
"دەوڵەتی عێراق لە رووی دەستووری بنچینەییەوە ناسنامە و مافەکانی کوردی بە فەرمی ناسیوە و بۆ چارەسەری پرسی کورد هەنگاوی گرنگی ناوە. دەوڵەتی ئێستای عێراق سیاسەتی قڕکردن، نکۆڵی و سڕینەوەی رژێمەکانی پێشووی تێپەڕاندووە و بەرەو دیموکراتیکبوون هەنگاو دەنێت. ئەگەر دەوڵەتی عێراق بە ئاراستەی دیموکراتیکبوون بە شێوەیەکی ئازایانەتر هەنگاو بنێت، لە رۆژهەڵآتی ناوەڕاست دەبێتە پێشەنگ و پشتیوانی کورد و سەرجەم هێزە دیموکراتیکەکان بەدەست دەهێنێت. دەوڵەتی تورک کە ئەمە دەبینێت، بە پێداگرییەوە دەیەوێت عێراق لە رێچکەی دیموکراتیکبوون دووربخاتەوە، لە سیاسەتی سڕینەوە و جینۆسایدی خۆیدا بەشداری بکات و تێوەیبگلێنێت و بیگەڕێنێتەوە بۆ سیاسەتی سەد ساڵی رابردوو. بەو ئامانجەوە بە هەموو جۆرێک هەڕەشە دەکات، سەرانەی لێدەستێنێت. ئێستاش گوایە لەگەڵ کاربەدەستانی عێراق کۆبوونەوەی ئەمنی ساز دەکات.
بەر لە هەموو شتێک دەبێت ئەو راستیە دەستنیشان بکرێت کە گەورەترین هەڕەشەی ئەمنی لەسەر عێراق دەوڵەتی تورکی فاشیستە. دەوڵەتی تورک بە سەرکێشی سەردەستەی فاشیست ئەردۆغان بۆ عێراق گەورەترین مەترسی ئەمنیە. ئەوەی هەمووکات باس لە عوسمانی نوێ و میساقی میللی دەکات، ئەوەی دەڵێت موسڵ و کەرکوک بەشێکن لە ئێمە و دەڵێت کە بەشێک لە خاکی عێراق داگیرکەر دەکات، سەردەستەی فاشیستەکان ئەردۆغانە. ئەوەی گەلانی عێراقی لە دژوارترین کاتەکاندا پاراست، لە دژی هێرشە قڕکارییەکانی داعش پارێزگاری لێکردن، بزوتنەوەی ئازادیی کورد و پەکەکەن. هەربۆیە ئەگەر کۆبوونەوەیەکی باڵای ئەمنی راستەقینە سازبکرێت، ئەوە دەبێت نەک لە دژی پەکەکە، بەڵکوو لە دژی دەوڵەتی تورکی داگیرکەر بێت. لەبەر ئەوەی ئەو دەووڵەتە خاکی عێراقی داگیرکردووە، لەسەر خاکی عێراق بە سەدان بارەگا کاتی و هەمیشەیی دروست کردووە، بە دەیان هەزار سەربازی خۆی لەسەر خاکی عێراق جێگیرکردووە؛ لە شەنگالەوە تا کەلار، دهۆک و زاخۆ هەموو رۆژێک هێرش دەکاتە سەر بەشێکی جیای خاکی عێراق، دەکرێنە ئامانجی هێرشی فڕۆکە و درۆنەکانی دەوڵەتی تورک. لە ئەنجامی ئەو هێرشانەدا تائێستا ١٦٥ هاوڵاتی عێراق شەهیدبوون، بە سەدان کەسیش برینداربوون و هەموو رۆژێک ژمارەکانیان زیاتر دەبن. گەلانی رۆژهەڵاتی ناوەڕاست و عێراق بە هەزاران ساڵە بە دەوری رووبارەکانی فورات و دیجلەوە ژیانی ئابووری خۆیان بونیادناوە. ئەوەی ئاوی رووبارەکانی دیجلە و فورات دەبڕێت و لە دژی عێراق و وڵاتانی رۆژهەڵاتی ناوەڕاست وەک ئامرازێکی قڕکردنی ئابوری و ئیکۆلۆژیک بەکاری دەهێنێت تورکیایە. لە وەها دۆخێکدا دیداری کاربەدەستانی عێراق و بەرپرسانی باڵای سەربازی و هەواڵگری تورکیا کە تیرۆریست هاکان فیدانیشی تێدایە، بە گوێرەی بەرژەوەندییەکانی دەوڵەت و گەلانی عێراق نییە. کاربەدەستانی دەوڵەتێک چۆن دەتوانن رێگە و رێبازی داگیرکردنی خاکی وڵاتەکەیان و گەلەکەیان لەگەڵ دەوڵەتێکی داگیرکەر و بیانی تاوتوێ بکەن؟ ئەمە لە بەردەم گەل و مێژوودا هیچ پاساوێک هەڵناگرێت. دەستێکی هاکان فیدان بە خوێنی هاووڵاتیانی عێراق سوورە، نابێت دەستەکەی دیکەی لەناو دەستی ئێوەدا بێت. دەبێت ئەوە بزانرێت، بۆ گەلانی عێراق و رۆژهەڵاتی ناوەڕاست سەدام و رژێمی بەعس بە چ واتایەک بوون، فاشیزمی ئاکەپە-مەهەپە و ئەردۆغانیش هەمان واتایان هەیە. رژێمی ئەردۆغان رژێمی نوێکراوە و بە شێوەی جیاواز رەنگکراوی رژێمی سەدامە، یەک جەوهەر و ناوەرۆکیان هەیە.
لە رووی ئەمنی و ئاسایشەوە هیچ شتێک بوونی نییە تا تورکیا بە عێراقی بدات. ئەگەر شتێکیش هەبێت ئەوە داگیرکەری، تیرۆر، تاڵان، کۆمەڵکوژی و رشتنی فرمێسکی چاوەکانە. ئەگەر دەوڵەتی تورک بیری لە ئاسایشی عێراق بکردایە، بە هەزاران چەتەی داعشی لە ناو سنوورەکانی پەروەردە نەدەکرد و نەیدەناردنە سەر موسڵ، کەرکوک و ئەنبار. ئەگەر تورکیا پەرۆشی ئاسایش و دۆخی ئەمنی عێراق بووایە، لە بەرامبەر داعش تێدەکۆشا، لە بری ئەو دەیان هەزار هێرشەی بە درۆن و فرۆکە ئێستا لەسەر کوردان ئەنجامی دەدات، ئەوە لە دژی داعش ئەنجامی دەدا. بەڵام دەوڵەتی تورک تاکە دەوڵەتە کە هەوڵیدا لە دەوڵەتی چەتەکانی داعش کونسوڵخانە بکاتەوە. ئێستاش دەوڵەتێکی داگیرکەر کە داعش وەک هەڕەشە لە دژی عێراق بەکاردەهێنێت، بۆ ئەوەی لە دژی گەلانی عێراق چالاکی تیرۆریستی بکەن، بە تواناکانی دەوڵەتی خۆیان چەتەکانی داعش پروەردە و پڕچەک دەکەن. ئەوانەی بە هەزاران شەهیدیان بەخشی و گەلانی عێراق و رۆژهەڵاتی ناوەڕاستیان لە دژی چەتەکانی داعش پاراست پەکەکە و بزوتنەوەی ئازادی کوردبوون.
بانگەواز: مەبنە هاوبەشی هێرشە قڕکارییەکانی دەوڵەتی تورکی داگیرکەر
لەسەر ئەو بنەمایە بانگەوازی ئێمە بۆ کاربەدەستانی دەوڵەتی عێڕاق ئەوەیە کە نەبنە هاوبەشی هێرشە قڕکارییەکانی دەوڵەتی تورکی داگیرکەر، کە بە سەرکێشی سەردەستەی فاشیست ئەردۆغان لە دژی کوردان ئەنجامیان دەدات. ئاڵای دەوڵەتی عێراق کە هەبوون و مافەکانی کوردانی بە دەستوری بنچینەیی خۆی پاراستووە، مەهێڵن کە دەوڵەتی تورکی داگیرکەر بۆ پەردەپۆشکردن و شاردنەوەی تاوانەکانی شەڕی خۆی بەکاریبهێنێت.
بانگەوازمان بۆ هەموو لایەنە سیاسییەکان، وڵاتپارێزان، رۆشنبیران، نوسەران، کەسایەتی و رێکخراوەکانی کۆمەڵی مەدەنی لە عێراق و باشووری کوردستان ئەوەیە: لە دژی ئەو هەڕەشانەی دەستبەسەرداگرتنی خاک و داگیرکەری دەوڵەتی تورک، لە دژی شەڕ و تیرۆری سەر شار و ئاسمانی عێراق، ئێوەش دەنگ هەڵبڕن، رێگە مەدەن کە داهاتووتان ببێتە قوربانی بەرژەوەندی تەسکی گروپێکی بچووک".
هـ . ب
