لە شاری ڕانیە لە پارێزگای سلێمانی لە دژی هێرشە کیمیاییەکانی دەوڵەتی تورک رێپێوانێک ڕێکخرا. دوای رێپێوانەکە ئیدریس عەبدوڵا راگەیاندراوێکی خوێندەوە لە ڕاگەیەندراوەکەدا هاتووە: "دەوڵەتی تورک لەسەر عەقڵییەتی ڕەگەزپەرستی و شۆڤێنیزم دامەزراوە و نکۆڵی لە بوون و ناسنامەی گەلی کورد دەکات. دەیان ساڵە بۆ لەناوبردن و سڕینەوەی گەلی کورد هێرش دەکاتە سەر گەلی کورد.  دەوڵەتی تورک بە هەموو شێوەیەک لە هەوڵدایە گەلی کورد لە رووی سیاسی و کلتوری و جەستەییەوە لە ناو ببات. لە چەند ناوچەیەکی کوردستان بە هێزی سەربازی و چەکی کیمیایی قەدەغەکراو کۆمەڵکوژ و کاولکاری و تاوانی شەڕ ئەنجام دەدات".

لە ڕاگەیەندراوەکەدا ڕەخنە لە بێدەنگیی یەکێتی ئەوروپا و نەتەوە یەکگرتووەکان و ڕێکخراوەکانی مافی مرۆڤ گیراوە و داوا لە ڕای گشتیی کوردستان، عێراق و نێونەتەوەیی، لایەنە پەیوەندیدارەکان، یەکێتیی ئەوروپا و نەتەوە یەکگرتووەکان کرد، کە دژی بەکارهێنانی چەکی کیمیایی هەڵوێستیان هەبێت.

هەروەها بانگەوازێک بۆ لێکۆڵینەوە و سزادانی دەوڵەتی تورک کرا.

ژ.ت