لەتیف فاتح فەرەج نوسەر و چاودێری سیاسی دەربارەی ڕەوشی عێراق لە دوای هەڵبژاردنەکان و هێرشە کیمیاییەکانی دەوڵەتی تورک بۆ سەر خاکی باشوری کوردستان بۆ ئاژانسی هەواڵی فورات قسەی کرد.

ئەو نوسەرە لە سەرەتای قسەکانی نرخاندنی بۆ دۆخی دوای هەڵبژاردنەکانی عێراق کرد و وتی:" من پێم وایە دۆخی عێراق بە هەڵبژاردن چاک ناىێت دۆخی پێش هەڵبژاردن و دوای هەڵبژاردن هیچی وا نە گۆراوە، دەمووچاوە سیاسیەکان هەر ئەو دەمووچاوانەن کە لە ٢٠٠٣ فەرمانڕەوایی عێراق دەکەن ئەوە بۆ شیعە، سونە و کوردیش وایە، ئاواز و ئەقڵیان هەمان ئەو لۆژیکەیە کە پێشتر مامەڵەیان پێکردوە،  لە عێراقدا شوناسی سیاسەتی عێراقی نیە، سیاسیە عیراقیەکان ئەوەندەی سەر بە تورکیا، ئێران، ئەمریکا، ئوردن و سعودیان کەمتر سەر بە عێراقن. بۆ عیراق سیاسەت ناکەن، بۆیە باوەرم وایە مەرج نیە ئەم هەڵبژاردنە شتێک بگۆرێت."

 "تورکیا وەک داگیرکەر لە عێراق مامەڵە دەکات"

هاوکات تاوانەکانی تورکیاشی شرۆڤە کرد کە بەرامبەر گەلی کورد دەیکات  وتی:" ئەوەی پەیوەستە بە تورکیاشەوە ئەوەیە کە تورکیا وەک داگیرکەر لەگەڵ ئەم ناوچەیە مامەڵە دەکات، لەبەر ئەوەی عێراق سەروەری نیە و لەسەر پێ خۆی نەوەستاوە،  خەڵکانێک هەن لە عێراقدا ئەو دۆخەیان پێ خۆشە، پێان باشە کە سوپای تورک نەک لە قەندیل، ئاڤاشین و بەعشیقە بێت بەڵکوو پیان خۆشە بێتە کەرکوکیش، بەشێک لە سیاسیەکانی عێراق لە تێروانینی بەرژەوەندی گیرفانی خۆیانەوە مامەڵە لەگەڵ دۆخە دەکەن، بۆیە بەشێک لە سیاسیەکانی کوردستان و عێراق ئەجیندای تورکیا جێبەجێدەکەن."

لەبارەی بەکار هێنانی  چەکی کیمیاوی فەرج تاوانەکانی بە بێر هێنایەوە کە بەرامبەر گەلی کورد کراوە و ئاماژەی بەوەکرد کە گەلی کورد لەبەردەم ئەزموونێکی تاڵدایە  لە ساڵی ١٩٨٧-١٩٨٨ عێراق بەرامبەر گەلی کورد  چەکی کیمیای بەکاری هێنا و دواتریش دەوڵەتی تورک زۆر جار بەرامبەر کورد بەکاری هێناوە، هەورەها وتیشی:" ئێمە جگە لەوەی داوا دەکەین کە لیژنەیەکی نێودەوڵەتی بێت لێکۆلێنەوە بکات، دەبێت ئێمە خۆشمان وەک گەلی کورد ئەو  وێنانە بە دونیادا بڵاو بکەینەوە، من هەندێک وێنەم لایە  کە خۆشم ناوێرم تەماشایان بکەم ئەوەندە کارێکی دڕندەیی بەرامبەر گەلی کورد کراوە، دەبێت ئەو وێنانە بگاتە جیهان."

"تۆرە کۆمەڵاتیەکانیش لە پێناو بەرژەوەندەیەکانیان تاوانەکان پەردە پۆش دەکەن"

کاتێک ئەم وێنانە لە تورە کۆمەڵاتیەکان بڵاو دەکەینەوە یەکسەر سزا دەدرێن لە لایەن تۆرە کۆمەڵایتیەکانەوە، بەداخەوە بەشێک لە تۆرە کۆمەڵایتیەکانیش بۆنەتە بەشێک لەو تاوانە لە دژی گەلی کورد لە پێناو بەرژەوەندیەکانیان.

ناوبراو ڕۆڵی ناتۆی بیر هێنایەوە وتی :" لەبارەی ئەو تاوانەی کە دەوڵەتی تورکیا دەیکات بەرامبەر گەلی کورد دەبێت ناتۆ لێکۆڵینەوە بکات، چونکە تورکیا بەشێکە لە هێزی ناتۆ، ئەوەی تورکیا بە ناوی ناتۆوە  دەیکات تاوانی جەنگە کە لە جارنامەی مافەکانی مرۆڤ قەدەغە کراوە و وەک تاوانی جەنگ مامەڵەی لەگەڵ دەکرێت، بەڵام بەرامبەر گەلی کورد بێدەنگیان هەڵبژاردوە. "

"دەبێت یەکێتی ئەورپا لێکۆڵینەوە لە تاوانەکانی تورکیا بکات"

ئەوەشی هێنایە زمان کە دەبێت یەكێتی ئەورپاش لێکۆڵینەوە  بکات لەو تاوانە چونکە تورکیا ماوەێکی درێژە بەر بژێرە بۆ ئەندامبوون لە یەکێتی ئەورپا، جەختی لەوەش کردەوە کە:" بە داخەوە یەکێتی ئەوروپاش لە بەینی سۆز و بەرژەوەندی هەمیشە بەرژەوەندی هەڵبژاردوە، هەرچەندە لە نێوان دەوڵەتانی ئەورپا جیاوازی هەیە، بەڵام بە شێوەیکی گەشتی وەک یەکێتی ئەورپا بێدەنگن. "

لە کۆتای قسەکانی ئەو نوسەرە وتیشی:" مێژوو پڕە لە کەوتنی زاڵم و دیکتاتۆرەکان، مێژوو، هیتلەر، ماسۆلۆنی، جەنگیزخان، سەدام  و ئەسکەندەری خست، بۆیە بە هیچ شێوەیەک ئەو ڕەوشە بەردەوام نابێت. ئەرۆدغانیش دەکەوێت، کاتێک بتەکەی ئەردۆغان کەوت بتە بچووکەکانی دەورەبەریشی دەکەون کە لە دەوربەری ئەردۆغان کۆبوونەتەوە. "

ف.ق