لە راگەیاندراوەکەى پەژاکدا هاتووە، گروپە توندڕەوە ئیسلامییەکان و داعش بە هاوکاریی هێزە ئەمنییەکانی رژێمی ئێران هێرش دەکەنە سەر گەل، بەڵام گەلی ئێمە لە رۆژهەڵاتی کوردستان، هێزی بەربەرەکانی لە گەڵ داعشی سونە و شیعە هەیە.

پەژاک راشیگەیاندوە، کۆماری ئیسلامیی ئێران هەر وەک تورکیا دەیەوێت گروپە چەتەکان و توندڕەوەکان لە دژی گەل بۆ خواستەکانی خۆی بەکار بهێنێت و دەوڵەتانی ئێران تورکیا بە شێوازی جیاجیا پشتیوانی لەو گروپە دژە مرۆی و دژە دیموکراسییانە دەکەن.

پەژاک ئەوەشی راگەیاندوە، داعش لە عێراق و سوریا چەندین ناوچەى داگیرکرد و تاکە هێز و گەل توانیی رووبەڕووی داعش بێتەوە تێکی بشکێنێت گەلی کورد بوو، بەڵام ئێستا کۆماری ئیسلامیی ئێران دەیهەوێ لە رۆژهەڵاتی کوردستان ئەم تاقم و گروپە بەکار بهێنێت و لە ژێر حمایە و پشتیوانی هیزە ئەمنیەکاندا، ئاژاوە دروست بکات کە لە هەل و مەرجی قەیراناوی دا ئەم تاقمە روبەڕوی گەل و رەوتی شۆڕشگێڕی گەلەکەمان بکاتەوە.

دەقی راگەیاندراوەکەى پەژاک

 بەیانیە دژی دەستێوردانی توندئاژۆیانی رۆژهەڵات

داعش و ئیسلامی سیاسی توندئاژۆ، رومەتی دزێو و دژەمرۆڤی خۆیان بە جیهانیان نیشان داوە و گەلی ئێمەش زەرەرمەندی سەرەکی کردەوەی ئەم گروپە تێرۆریستیانەن و بە خوێن و گۆشت لە بەرامبەر ئەم گروپە تێرۆریستانەدا بەربەرەکانی کردوە.

 داعش و ئیسلامی سیاسی توندئاژۆ دەستکردی سیاسەتی کۆنەپەرەستانە و پاکتاوکردن و دژە دێمۆکڕاسین، ئاکتەرانی ناوچەکە و دەوڵەتانی ئێران و تورکیە بە شێوازی جیاواز پاڵپشتی ئەم تەیفە کۆنەپەرەستە دەکەن و لە داهاتوشدا بە شێوازی جیاواز بە دژی گەلی ئێمە و روحی دێمۆکڕاسی لە ناوچەکە بە کاریان دەهێنن.

لەم رۆژانەدا گەلی ئێمە لە رۆژهەڵاتی کوردستان روبەڕوی هێرشی تاقمێکی توندئاژوی ئیسلامی سیاسی بونەتەوە، هاوکات لە شارەکانی مەریوان سەقز و سنە هێرشی ناڕەوایان بە بیانوی جیاواز کردۆتە سەر خەڵکی مەدەنی، کات و شێوەی ئەو هەجمانە نیشان دەدات کە پلانێکی بەڕێکخستن کراو و بە پشتیوانی دەستەڵاتدارانی کۆماری ئیسلامی ئێران بەڕێوە چوە و ئامانجی تایبەتی لە پشتە.

وەک چۆن داعش لە لایەن تورکیەوە لە ناوچەکە پشتیوانی لێدەکرێت بۆ ئامانجی تایبەت، بە هەمان سیاسەت کۆماری ئیسلامی ئێرانیش دەیهەوێ لە رۆژهەڵاتی کوردستان ئەم تاقم و گروپە بەکار بهێنێت و لە ژێر حمایە و پشتیوانی هیزە ئەمنیەکاندا، ئاژاوە دروست بکات کە لە هەل و مەرجی قەیراناوی دا ئەم تاقمە روبەڕوی گەل و رەوتی شۆڕشگێڕی گەلەکەمان بکاتەوە.

لە هێرشی داعش بۆ سەر موسڵ و شەنگال و بەشێک لە سوریە، دەوڵەتانی سوریە و ئێڕاق هێزی بەربەرەکانی داعشیان نەبوو و داعش بە پلان و ئاجندایەکی تایبەت توانی بەشێکی زۆر لە خاکی ئێڕاق و سوریە بگرێت، بەڵام هەر کەس باش ئەوە دەزانێت کە چۆن گەلی شۆڕشگێڕی کورد لە بەرامبەر داعشدا راوەستان و شکستیان بەم گروپە دژەمرۆڤیە هێنا، بە هەمان شێواز گەلی ئێمە لە رۆژهەڵاتی کوردستان، هێزی بەربەرەکانی لە گەڵ داعشی سونە و شیعە هەیە، و ئەم بیرۆکە کۆنەپەرەستانە کە لە لایەن گروپێکی دیاریکراو بەڕێوە دەچێت، لە گەڵ روحی گەلی ئێمە نامۆیە و شوێنی ئەوانە لە ناو خەڵکی ئێمەدا نابێتەوە.

گەلی ئێمە لە رۆژهەڵاتی کوردستان چۆن بە پشتیوانی بەرینی خۆیان لە کوبانی و شەنگال و هەمو شار و شارۆچکەکان دژ بەم رێکخراوە توندئاژۆیە دەرکەوت و شکستیان پێ هێنا، ئێستاش گەنجان، ماموستایانی ئاینی، هەمو تەیفەکانی کۆمەڵگا لە بەرامبەریان رادەوەستنەوە و جێگای ئەم ئەم جۆرە بیرکردنەوە کۆنەپەرەستانە لە کوردستان رێگەپێدراو نابێت.

ژ.ت