قائیمقام و قەیومی ناوچەی رێیا ئارموشی وان عەبدولقادر یومود کاسمان کە ساڵی رابردوو قایمقام و قەیومی ناوچەی کارازای ئامەد بوو و لە مانگی ئابی رابردوودا ئەرکە نوێکەی وەرگرت، لە رۆژانی رابردوودا جێگۆڕکێی بە کارمەندانی قایمقامیەت کرد.

بەپێی ئەو گۆڕانکارییە ٤ کارمەندێکی بەشی هاوکاری و پشتیوانی کۆمەڵایەتی بۆ رایی کردنی کارەکانی ماڵی قائیمقام ئەرکدار کراون. لەو چوار کەسە یەکیان بۆ چاودێری کردنی منداڵەکانی قائیمقام و سێ کارمەندەکەی دیکەش بۆ پاککردنەوەی ماڵی قائیمقام دەستنیشان کراون.

بەگوێرەی زانیارییەکان ئەو کارمەندانە هەفتانە ٥ رۆژ دەچنە ماڵی قائیمقام-قەیوم و کارە تایبەتیەکانی رادەپەڕێنن. ئەوەش زانراوە کە قائیمقام هەڕەشەی لە کارمەندەکانی کردووە کە ئەگەر بە باشی کارنەکەن، کۆتایی بە راژەکانیان دەهێنێت.