ئیکۆلۆژیستەکانی هەرێمەکە: DEDAŞ هۆکاری ئاگرەکەیە
ئەو ئیکۆلۆژیستانەی سەردانی هەرێمی ئاگرەکەی نێوان چنار و شەمرەخیان کرد، تیشکیان خستەسەر سیاسەتی تاڵانکردنی سرووشت لەلایەن دەسەڵاتەوە و گوتیان "هۆکاری ئاگرەکە DEDAŞ بووە".
بزووتنەوە ئیکۆلۆژیستەکانی کوردستان و تورکیا بە پێشەنگایەتی تەڤگەری ئیکۆلۆژیای میزۆپۆتامیا سەردانی هەرێمی ئاگرەکەیان کرد کە ٢٠ ی حوزەیران لەنێوان ناوچەی چناری ئامەد و ناوچەی شەمرەخی مێردین کەوتەوە و بەهۆیەوە ١٥ کەس گیانیان لەدەستدا. شاندەکە سەردانی گوندی کەلەکی شەمرەخ و گوندی تۆبینی سەر بە ناوچەی چناری ئامەدیان کرد و لێکۆڵینەوەیان کرد، پاشان ڕاگەیاندراویان خوێندەوە.
" DEDAŞ هۆکاری ئاگرەکەیە"
هاووتەبێژی تەڤگەری ئیکۆلۆژی میزۆپۆتامیا گۆکهان ساران ڕایگەیاند هۆکاری ئاگرەکە ناوەندی کرێخۆری کۆمپانیای دابەشکردنی کارەبای دیجلە (DEDAŞ) و دەسەڵاتە کە دەستوەردانی لە ئاگرەکە نەکرد، گوتی: "ئاگرەکە زیانی بە گیان و ماڵی گەل گەیاندووە، هەروەها وێرانکارییەکی لە ئیکۆسیستەمدا خوڵقاندووە".
هەروەها ڕایگەیاند ساڵانێکە دژی گەلی کوردستان و جوگرافیای کوردستان لەڕووی ئابووری و ئیکۆلۆژی و چاندییەوە قڕکردن بەڕێوەدەچێت و بواری ژیان تێکدەدرێت.
ئاماژەی بەوە کرد بەپێی ڕاپۆرتەکانیان ئاگرەکە بەهۆی کارەباوە بووە.
پاشان هاووتەبێژی کۆمیسیۆنی ئیکۆلۆژی و کشتوکاڵی دەم پارتی مەلیس تانتان داوای کرد ڕێکخراوە جەماوەرییەکان بەرپرسیارێتی خۆیان جێبەجێ بکەن، هەروەها هەرێمی ئاگرەکە وەک هەرێمی کارەسات ڕابگەیەنرێت.
هاووتەبێژی یەکێتی ئیکۆلۆژی سولەیمان سولەیمان ئەریلماز گوتی: "ئاگرەکە بەهۆی کارەباوە بووە. ئێمە ڕووبەڕووی ڕووخاندنێکی مەزن بووینەتەوە. بەڵێن دەدەین لە هەموو جێیەکی تورکیا پشتیوانی بەهێز بکەین".
پاشان شاندەکە درێژە بە لێکۆڵینەوەکانیان دەدەن. پاشان ڕاپۆرتێک ئامادە دەکەن و بۆ ڕای گشتی بڵاوی دەکەنەوە.
