هێرش و داگیركاریی سوپای تورك له باشووری كوردستان به‌تایبه‌ت له شوێنی هاوڵاتییانی سیڤیل بێ ناوبڕ به‌رده‌وامه. له‌و دیمه‌نانه‌ی كه بڵاوبوونه‌ته‌وه ده‌رده‌كه‌وێت كه ئاگر له شوێنه مه‌ده‌نییه‌كان به‌ردراوه.
ئه‌م دیمه‌نه‌ی ده‌یبینن، دیمه‌نی سووتانی گوندنی بێدۆهێی ده‌ڤه‌ری كانی ماسی-یه له باشووری كوردستان. دوای ئه‌وه‌ی چیاكانی ئه‌و ده‌ڤه‌ره له لایه‌ن سوپای توركه‌وه داگیركران، تۆپبارانی كێڵگه و دارستانه‌كانی ناوچه‌كه كرا.
به‌و هۆیه‌وه ئاگر له كێڵگه و ڕه‌ز و باخی هاوڵاتییانی سیڤیل كه‌وته‌وه. هه‌روه‌ها هاتووچۆ بۆ گونده‌كانی سه‌ر سنووری باشوور - باكووری كوردستان قه‌ده‌غه كراوه. به‌گوێره‌ی زانیارییه‌كان هه‌ر كه‌سێك بچێته ئه‌و ناوچانه ده‌بێته ئامانجی هێرشی داگیركه‌ران و به به‌رپرس داده‌نرێت له هه‌ر ڕووداوێك كه بێته ئاراوه.
دانیشتوانی گوندی میكدادا بۆ چوونه گونده‌كه‌یان مۆڵه‌ت له په‌ده‌كه وه‌رده‌گرن. هه‌روه‌ها دانیشتوانی گونده‌كانی سپیندارێ، كری، بێدۆهێ، به‌ڕۆژێ كانیماسی و دێریشكێ لێیان قه‌ده‌غه كراوه بچنه‌وه گونده‌كانیان. هاوكات له‌گه‌ڵ ئه‌و ڕێگرییانه، سوپای تورك به كۆپته‌ر چه‌ك و ته‌قه‌مه‌نی بۆ سه‌ربازان ده‌باته ناوچه‌كه.
s.m
