شاندێكی پزیشكانی باشووری كوردستان سه‌ردانی ناسر یاگز-ی كرد كه ١٨٤ ڕۆژه له نوێنه‌رایه‌تیی پارتیی دیموكراتیی گه‌لان (هه‌ده‌په) له هه‌ولێر له‌پێناو شكاندنی گۆشه‌گیریی سه‌ر عه‌بدوڵا ئۆجالان مانی له خواردن گرتووه.
له میانه‌ی سه‌ردانه‌كه، د. مه‌جید حه‌مه‌ئه‌مین به ناوی شاندی پزیشكان قسه‌ی كرد و ڕایگه‌یاند، «ئێمه وه‌ك شاندێكی پزیشكانی باشووری كوردستان هاتووین بۆ سه‌ردانی ناسر یاگز و چالاكانی دیكه كه ١٨٤ ڕۆژه له مانگرتندان. باری ته‌ندرووستیی ناسر زۆر تێكچووه به‌ڵام ئیراده و به‌رخۆدانه‌كه‌ی به‌هێزه. ئه‌م چالاكییه چالاكییه‌كی مه‌ده‌نییه بۆ ئازادیی به‌ڕێز ئۆجالان.»
ناوبراو له درێژه‌ی لێدوانه‌كه‌یدا گوتی، «پێویسته هه‌موو خه‌بات و تێكۆشانی سه‌رۆك ئاپۆ له‌به‌رچاو بگیرێت. چالاكییه‌كانی مانگرتن له خواردن له باكوور و باشووری كوردستان، توركیا و هه‌نده‌ران بێ پچڕان به به‌رخۆدانێكی گه‌وره به‌رده‌وامن. ئێمه له میانه‌ی سه‌ردانه‌كه‌ماندا پشكنینی پزیشكیمان بۆ هه‌ڤاڵ ناسر یاگز كرد. باری ته‌ندرووستیی هه‌ڤاڵ ناسر زۆر خراپه. هیوادارین داواكاری ئه‌و و هه‌موو چالاكان جێبه‌جێ بكرێت. به ده‌ستپێكردنی پڕۆسه‌یه‌كی نوێ له باكووری كوردستان و توركیا ئارامییه‌كی سیاسی بێته ئاراوه و به ئازادیی سه‌رۆك ئاپۆش ئه‌م دۆخه باشتر ده‌بێت. ئێمه هیوادارین هه‌موو چالاكانی مانگرتوو ته‌ندرووست بن.»
s.m
