ئەمڕۆ، ۰۱ی مانگێ خاکەلێوەی ساڵی ۲۷۱٨ی کوردەواری، بەرامبەر بە ۲۱/۰۳/۲۰۱٨ی کرسیتانی،بە هەزار هاوڵاتی شار وشارۆچکەکانی باشور، ڕۆژهەڵات و باکوری کوردستان، بۆ پیرۆزکردنی جەژنی نەورۆز و سەری ساڵی نوێی کوردی و پشتیوانی لە بەرخۆدانی عەفرین  ڕوویان کردە بناری قەندیل و لەگەڵ گەریلا بەجۆش و خرۆشی بەرخۆدانی سەردەمی عەفرین نەورۆزیان پیرۆز کرد .

لە ئاهەنگی نەورۆزی  قەندیلدا، وێڕای چڕینی سرود و گۆرانی شۆڕشگێڕی و بەرهەمی دیکەی هونەری، وتاری چەندین  پارت و لایەنی سیاسی خوێندرایەوە و هاوڵاتیانیش بۆ ئاژانسەکەمان فورات نیوز دوان و گوزارەیان دید و بۆچوونیان کرد.

لە پیرۆزبایەکەدا، سەرەتا وتار و پەیامی کۆنسەی گشتی و هاوسەرۆکایەتی کۆما جڤاکێن کوردستان-کەجەکە، لە لایەن ڕێوار ئاودانان، ئەندامی کۆنسەی گشتی کەجەکەوە خوێندرایەوە، کە تێیدا هاتبوو:

پاشان، ئەوین زیلان، ئەندامی کۆمەڵەی ژنانی کوردستان-کەژەکە، وتاری کۆمەڵەکەیانی پێشکەشکرد و وتی: ئەگەر  بەرامبەر بەم قۆناغەی هاتووەتە ئاراوە، هۆشیار و خاوەن هەڵوێست نەبین، ئەوا دەبێت چاوەڕوانی کۆمەڵکوژییەکی دیکە بین، هەموو گەل و بەتایبەتیش ژنان، لەئاستی ڕۆژهەڵاتی ناوەڕاستی و جیهانیشدا، پێویستیان بە یەکێتی و ئاشتەوایی هەیە و بەوەش دەتوانین مەترسیەکان تێپەڕێنین و سەرکەوین.

دواتر محەمەد عەبدوڵا، هاوسەرۆکی تەڤگەری ئازادیی کۆمەڵگەی کوردستان، وتەی تەڤگەرەکەیانی پێشکەشکرد و وتی: ئەم جۆش و خرۆش و گەرمییەی لە ئاهەنگی پیرۆزکردنی نەورۆزدا دەیبینن، بەردەوامیی دانە بەو بەرخۆدانەی کە لە عەفرین هەیە و جەختی کردوە، کە عەفرین نەکەوتووە بەڵکو سەرکەوتووە. پێشی وابوو، وێڕای کەمی هێز، ئەوەی عەفرینی سەرخست، ئیرادەیەکی زۆری گەل و شەڕڤانان بوو.

موحەمەد عەبدوڵا ڕاشیگەیاند: هێرشکردنە سەر عەفرین، هێرشەکردنە  سەر هەر چوار پارچەی کوردستانە، شکاندنی پەیکەری کاوەی ئاسنگەریش لە عەفرین، هەوڵدانی شکاندنی ئیرادەی گەلی کوردە.

پاشان ، ئارێز عەبدوڵا، سەرۆکی فراکسیۆنی یەکێتی نیشتمانی کوردستان لە پارلەمانی عێراق، ئاخاوت و وتی: داگیرکەران لە ناویاندا تورکیاش، پێیان وا بوو کورد لەسەر خاک و زێدی خۆی دەسڕنەوە و دەیکەنە ئێرانی و عێراقی و تورکی و سوری.  بەڵام بینیمان ئەوان تەنها ڕسوا بوونیان بۆ مایەوە و ئەو خەونەیان بەدی نەهات، دەبێت تورکیاش بزانێت داگیرکەرانی دیکە، لە دژی گەلی کورد چییان پێکرا، ئەو سوپای داگیرکەری تورکیش ئەوەندەی پێدەکرێت.

ئارێز عەبدوڵا، داوای ئازادی سەرجەم زیندانییەکانی باکوری کوردستانی کرد و وتی: ئازادیی زیندانە سیاسییەکان لە تورکیا، بەتایبەت بەڕێزان، عەبدوڵا ئۆجالان و دەمیرتاش و یوکسەکداغ، دەبێتە مایەی پێکەوەژیان و کەمبوونەوەی خوێنڕشتن و هێنانە ئارای ئاشتی و چارەسەری.

دوای ئەویش، ئەمین بەکر، سەرۆکی فراکسیۆنی گۆڕان، لە پارلەمانی ئێراق، وتەیەکی پێشکەشکرد و وتی: دەستدرێژییەکانی سوپای تورک بۆ سەر ڕۆژئاوای کورستان و جوڵاندنی هێز بۆ سەر خاکی باشوری کوردستان و  لەبەرامەردا بێدەنگی نەتەوە یەکگرتووەکان و ئەنجومەنی ئاساییشی نێودەوڵەتی و ڕێکخراوەکانی مافی مرۆڤ جێی ڕەخنەیە و ، ڕاستگۆیی ئەو ڕێکخراوانە دەخاتە ژێر پرسیارەوە.

دواتر، دوو مامۆستای ئاینیی، سامان سەنگاوی و نادر عەلی، کە بە شاندێک سەردانی عەفرینیان کرد بوو و چەند ڕۆژێکە گەڕاونەتەوە باشوری وڵات، وتەی خۆیان پێشکەش کرد و پەیامی عەفرینی و ڕۆژئاوایان گەیاندە گەلی باشور و ڕایانگەیاند: وێڕای ئەوەی جەژنی نەورۆز لە گەلی کورد و گەلانی ناوچەکە پیرۆز دەکەین، بە ئەردۆغانی تیرۆریستیش دەڵێین، کە گەلی کورد و عەفرن تا ئێستا نەکەوتوون و ناشکەون و عەفرین و گەلەکەمان سەردەکەون.

هەروەها، بە توندی ڕەخنەیان ئاڕاستەی ئەو مامۆستا ئایینیانە گرت، کە لەبەرامبەر هێرش و تاوانەکانی سوپای تورک لە عەفرین بێدەنگن و بێهەڵوێستن و جەختیان کردەوە: دەوڵەتی تورکیا بە سورەتی فەتح هێرشی کردوەتە سەر عەفرین، بەڵام کورد بە سورەتی تەوبە دەینێرێتەوە. داواشیان لە هەمووان کرد، هەمووان یەکڕیز و یەکدەنگ بن و پشتیونی زیاتری عەفرین بکەن، چونکە ئەوە خواست و پەیامی عەفینیەکانە.

هەر لە پیرۆزبایەکەد، شادی نەوزاد، ئەندامی ئەنجومەنی باڵای جوڵانەوەی نەوەی نوێ، وتاری جوڵانەوەکەیانی پێشکەشکرد و وتی: ئێمە لە هەر کوێیەک بین درێژە بە بەرخودان دەدەین و دەبینە هاوکار و پشتیوانی بەرخۆدانی عەفرین.

لە ئێستاشدا، پیرۆزبایی نەورۆز و سەری ساڵی نوێی کوردی بە چڕینی سرود و گۆرانی شۆڕشگێڕی  و پێشکەشکردنی بەرهەمی هونەریی درێژەی هەیە و بەشێوەیەکی زیندووش لەلایەن چەندین تلەفزیۆنی کوردییەوە ڕووماڵ و پەخش دەکرێت.

هـ.هـ