کوردستان و گەل کورد نزیک وە سەد ساڵە ک ئەڕا رەسین وە دموکراسی و ئازادی هەزینە دەن. فرەتر لە چوارچوەی حزبی، گەل کورد، ئەزیزتەرین مناڵەیل خوەیان ئەڕا رەسین وە ئازادی بەخشینە و رابەرەیل فرەیگ لە ئی رێیە گیانیان بەخت بیە.
لە ئی وەختە چ لە بوار سیاسی و چ لە بوار نزامی، کوردستان سەربار بیێن فرە رخنە و کەم کوریەیل، سیاسی‌تەرین، وەرێکخریاگتەرین، زنێتەرین و چالاکتەرین جوغرافیای سیاسی ئیرانە. سەربار ئیانە دەسەوەر و ناوەند گوڕانکاری بانان ئێران و دڵ ئی گوڕانکاریەیلەسە. کوردەیل وە شوون کەفتێ وە یا کارتێک سیاسی لە هاوسەنگیەیل ئێران و معادلەیل هەرێمەیل ئەوە نیەن و ناونیش. ئەوان دەسەوەر تێکۆشان بینه، چ لە وەرین و چ لە بانان هەزینەی ئەسلی کەفێدە سەر شانیان. لە سەر ئی ئەساسە رەوشەگە ئەوە توای کوردەیل و رێکخراوەیلیان ناوەند جەم بین هێزەیل سیاسی ئێران بوون نە ئەوەیکە حزبەیل کوردی بکەفنە شوون سازمانەیلێگ ک لە کردار چالاک نیەن یا ک هاز سیاسی و کرداری لە ناو ئێران نەیرن. ئیمە ئەوە نەبایەد لە هویر بوەیم ک ئەڕا ئازادی گەل خوەمان خاون پرۆژە و بەرنامەیم. لە نوڕین دیپلوماتیک و نزامی ئیە سازمانەیل و حزبەیل ترەکن ک ئحتیاج وە هاوکاری وەگەرد کوردەیلن. بەڵام ئی کارە وە بێ دورس کریان بەڕەیگ نەتەوەیی_دموکراتیک و یەکیەتی گشت حزبەیل و سازمانەیل و گشت گەل کورد ئەنجام ناگرێ. هاوکاری و یەکگردن وەگەرد هێزەیل ترەک سیاسی ئیرانی لازمە، بەڵام ئەگەر ئی هاوکاریه لە چوارچوەی بەڕەیک نەتەوەیی و هاوبەش نەود، کوردەیل بونە وەسیلەیگ ئەڕا قانجاز سیاسی ئەوان و خوەیان لە قانجاز نەتەوەیی بێ‌بەش مەنن. ئیمە لە وەرانوەر گەل خوەمان راس و دورس بیمنە و هەیمن. هاوەر چەو گەل کورد نگەران ئەوەسە ک هاوشیوەی باشوور کوردستان قانجاز نەتەوەیی لە رووژهەڵات کوردستانیش بوودە قوروانی قانجاز حزبی و بکەفێدە قورخ حزبەیل.
گەل کورد خوازیار یەکیەتی گشت حزبەیل کوردی و هاوردنە ئارای یەک بەڕەی نەتەوەیی_دموکراتیک لە کوردستانن. بەڕەیک ک روی وە جەهان و دەسەوەر راسی ئازادی و دموکراسی لە ئێران بوود. ئەگەر هەر حزب، لایەن و جەریان سیاسی لە ژێر ئی مەسئولیەتە شان خالی بکەی، فرە دیارە ک داخوازی و داواکاری رەوای گەل کورد نادیدە گردیە و بانان سیاسی کوردستان، لە ئەگەر هەرجوورە گوڕانکاری لە ئێران وە خەتەر فرەجدی و نەوەخشیدەنی روی وەروی کردیە.
کلیل دموکراسی لە ئێران و ئازادی کوردستان، هاودەنگی و یەکگردن گەل کورد و گشت سازمانەیل و حزبەیل کوردیە. گەل کورد لە ژێر نەزەر گردن رەوش قەیرانی ئیسەیی لە رووژهەڵات ناوەراس و ئێران لە ئەگەر هاتنە ئارای هەرجوورە شەڕ داخلی لە بەین کوردەیل لە باوەت بانان نگەرانە. ئەگەر جوور هێزەیل سیاسی کوردستان خوەمان وە هێز گەل زانیم، ناچاریم نگەرانیەگان ئەوان چارەسەر بکەیم. گەل کورد نگەرانە ک قوروانەیل گوڕانکاریەیل ناو ئێران مناڵەیل ئەوان بوون و لە بانان ئێران گشت چشتێک لە سەر میز کۆبینەوە وەگەرد هێزەیل ئێران لە ئەگەر لە یەک دویر کەفتن و یەکترقەبول نەکردن لە دەس بیەن. ئیمە تەجروبەی هاوشیوەی لە شۆڕش گەلان سال ۱۳٥۷ هەتاوی و لە کۆبینەوە وەگەرد دەوڵەت ناوەندی داشتیمە. کەسایەتیەیل سیاسی، روشنهویرەیل، ژنەیل و جوانەیل و رێکخراوەیل مەدەنی بایەد وە ئەنجام دان رۆڵ چالاک لە ئی رەوش حەساس ئیسەییە، جەریانەیل سیاسی، حزبەیل و لایەنەیل سیاسی مەجبور وە یەکدەنگی بکەن. رێ ئازادی ئیمە لە یەکیەتی و یەکگردن لە بەین گشت جەریانەیل سیاسی کورد و پاڵ دایین وە پوتانسیل و تەوانایی خوەی قەرار دەید. وە بێ گومان ئی یەکیەتیە سایەڕ قورس خوەی لە سەر میز کۆبینەوە لە واشەنگتون و فەرانسە وەگەرد هێزەیل ترەک ئێرانی، هەروەیجوورە وەگەرد زڵهێزەیل جەهانی دانەی. پژاک باوەر وە سیاسەتێک ئاشکار، دیار و واز ئەڕا جواو دایین وە خەڵک کورد دێرێ و داوای بەشداری گشت حزبەیل رووژهەڵات کوردستان وە بێ جیاوازی لە ئی کار موهمە کەی.
پژاک و کۆدار وە شیوەی گشتی و لە چوارچوەی گشتی ئەڕا ئێران نەخشەڕێ خوەی پێشکش کردن. ئیمە هایمە سەر ئەو باوەرە ک مەسئەلەی کورد وە بێ چارەسەری مەسئەلەیل ئازەربایجان، بەلوچستان، ئەحواز و گشت باوەری و مەزهەبەیل جیاوازترەک چارەسەر ناود. نەیاشتن سیاسەت دموکراتیک توانێ بانان ئی هەمکە گوناگونی و جیاوازیە لە رەوشێگ نادیار قەرار بیەد، لە لایترەک باوەرێک سفت وە دەسەوەری ژنەیل لە گشت جەوڵانگایەیل تێکۆشان دێریم، بایەد وە جورئەت ئەوە بویشیم ک هویچکام لە رێ‌چارەیل ئازادیخوازانە و بەرانبەری خواز ک ژنەیل لە ناوەند خوەی جێ نەیەد، ناتوانێ بەرانبەری و ئازادی دابمەزرنێ.
لە مەرحەلەی حەساس ئیسەیی پژاک خاڵەیل ژێر وە لازم دوینێ و لە روشنهویرەیل و حزبەیل کوردی داوا کەی ک وە شیوەی فرە رەنگی بنوڕنە چارەنویس بانان کومەڵگای خوەیان و ئەڕا کۆمەڵگایک دموکراتیک و سکولار هاوکار و هاوڕێ بوون، هەروەیجوورە ئەڕا هاوردنە ئارای کوردستانێک ئازاد و دموکراتیک رۆڵ تاریخی خوەیان وە جێ بارن.
۱. دورس کردن کومسیون هاوبەش ئەڕا لاوردن ئختلافەیل بەین هێزەیل سیاسی و حزبەیل کورد ک لە ناوێ رۆل ئەسلی خریاویە سەر شان روشنهویرەیل و ئاکادمیسکارەیل.
۲. دورس کردن مەجلس نەتەوەیی و دموکراتیک و فەراحزبی، وە بەشداری نمایەندەیل حزبەیل و غەیر حزبی رووژهەڵات کوردستان، ئەڕا لە ژێر نەزەر گردن کردار حزبەیل ک گشت جەریانەیل و حزبەیل کوردی جواوگو بن.
۳. دورس کردن هێزێگ نزامی و ئەرتش فەراحزبی و هاوبەش لە چوارچوەی پارێزین رەوا.
٤. دورس کردن شەورایک نزامی ئەڕا جواو داین وە مەجلس چەودێر.
٥. دورس کردن شەورای دیپلوماتیک هاوبەش، ئەڕا نمایەندەگی کوردەیل لە کۆمەڵگایەیل جەهانی و ناوچەیی، لە ژێر نەزەر مەجلس نەتەوەیی.
٦. دامەزراندن خەوەررەسانی و تلویزن هاوبەش ئەڕا بڵاو کردن سیاسەتەیل مەجلس نەتەوەیی لە گشت ئێران و کوردستان.
۷. دورس کردن ناوەندێک مینەوانیکەر ئەڕا مینەوانی ستراتژیک کوردستان لە ئروپا وە بەشداری کوردەیل دەیشت وڵات و مینەوانەیل داخلی، ئەڕا مشاورە دایێن وە مەجلس نەتەوەیی، حزبەیل و رێکخراوەیل سیاسی .
٨. دورس کردن ناوەند راهبوردی ئەڕا وەڕێکخستن چالاکیەیل هاوبەش (کونفرانسەیل، کۆبینەوەیل ناڕەزایانە، مانگردنەیل کارگەری و ناڕەزایەتیەیل مەدەنی) ئەڕا یەکگردن کۆمەڵگای رووژهەڵات کوردستان.
۹.دورس کردن نەهاد و سازمانەیل فەرا حزبی تایوەت وە ژنەیل لە سەر ئەساس لەتمە ناسی و رێ‌چارەی مەسئەلەیل بوار ژنەیل ئەڕا جەخت کردن لە سەر بڕیار هاوبەش و کردار هاو دەنگ(عملکرد همسو) ئەڕا چارەسەری قەیران کۆمەڵگای ژنەیل رووژهەڵات کوردستان.
۱۰. دورس کردن کۆمیتەی هاوبەش ئەڕا لە ژێر نەزەر گردن رووژانە و چالاک رەوش زندانییەیل سیاسی کورد لە زندانەیل جمهوری ئسلامی ئێران.
مەجلس پارت ژیان ئازاد کوردستان-پژاک
