ناوەندی ڕاگەیاندن و چاپەمەنی هەپەگە لەوبارەیەوە ڕاگەیەنراوێکی بڵاوکردەوە کە بەم شێویەیە:

"کەسێک بە ناوی جۆتیار موحسین، تاوانی سیخوڕی ئەنجامداوە و زانیاری لەبارەی جێگەی گەریلاکانمانی داوەتە دەوڵەتی تورک و فڕۆکەکانیش هەرێمەکەیان بۆردومان کردووە و لە لایەن گەریلاکانمانەوە دەستگیرکراوە. ئێمە وەک پەکەکە هێزی فیدایی گەلی کوردستان بۆ پاراستنی ئازادی، دیموکراسی، دادپەروەری و بەها بنەڕەتیەکان تێدەکۆشین. با گەلە هێژاکەمان لە باشووری کوردستان باش بزانێت کە ئێمە کەسە بێتاوانەکان دەستگیرناکەین و بێهۆکار زیان بە کەس ناگەیەنین. هەڵوێستمان هەموو کاتێک بە گوێڕەی دڵسۆزی و ڕاستی گەلی کوردە.

بەڵام هەندێک کەسی لاوازی وەک جۆتیار موحسین بۆ چەند قوڕوشێک دەستیان بە خوێنی گەریلا سوور دەکەن و ڕاستیەکانی پێچەوانە دەکەنەوە. بەرپرسیاری ئەو دۆخەی جۆتیار موحسین دەکەوێتە ئەستووی ئەو کەسانەی کە کاری سیخۆڕیان بەسەردا سەپاندووە و خستوویانەتە ناو ئەم کارە قێزەونە. خانەوادەی جۆتیار و کەسوکاری و گەلی هێژای بەهدینان کە لەم دۆخە نیگەرانن، پێویستە لێپرسینەوە لەو کەسانە بکەن کە جۆتیاریان خستووەتە ناو ئەم دۆخە و یەخەی ئەوان بگرن. جۆتیار حسێن لە هۆزی بەرواریە. چەندین ساڵە ئێمە و هۆزی بەرواری لەناو یەکتریداین و هیچ کاتێک خرابەمان لەوان نەبینیەوە. بەڵام هەندێک کەس کە لەگەڵ میتی تورک کار دەکەن، هەوڵ دەدەن گەنجان بکەنە سیخوڕ. گەلی هێژای بەهدینان و هۆزی بەرواری پێویستە بەو کەسانە هەڵنەخەڵەتێن و خاوەنداری لە گەنجەکانیان بکەن. ئەو ڕاوکەرانەی مرۆڤ لەبەرانبەر پارە، دەستیان بە خوێنی گەنجانی کورد سوور دەکەن. گەلی بەهدینانمان کە لە خەبات و تێکۆشانی ئازادی کورددا باجی گەورەیان داوە، پێویستە ئاگاداری ئەو کەسانە بن و ڕۆڵەکانیان لەناو چنگی ئەو کەسانە ڕزگار بکەن.

پێویستە گەلی هێژای باشووری کوردستان لەدژی ئەو کەسانەی هاوکاری دوژمنی داگیرکەر و قڕکەر دەکەن، کاری هەواڵگیریان لەگەڵدا دەکەن، لە بەرانبەر پارە خۆیان دەفرۆشن و سیخۆڕی لەسەر ڕۆڵەکانی ئەم گەلە دەکەن و کورد بە دەستی کورد بە کوشتن دەدەن، خاوەن هەڵوێست بن."

ف.ق