پەژاک بە بۆنەى ١٠هەمین ساڵیادی لەسێدارەدانى شیرین عەلەم هولی، فەرزاد کەمانگەر، عەلی حەیدەریان و فەرهاد وەکێڵی راگەیاندراوێکى بڵاوکردەوە، کە ٩ی گوڵانی ٢٠١٠ لەلایەن کۆماری ئیسلامیی ئێرانەوە لە زیندانى ئێوینی تاران لە سێدارەدران.
مەجلیسی پارتی ژیانی ئازادی کوردستان (پەژاک) بە بۆنەى دەهەمین ساڵیادی لەسێدارەدانى شیرین عەلەم هولی، فەرزاد کەمانگەر، عەلی حەیدەریان، فەرهاد وەکێڵی و مەهدی ئیسلامییان راگەیاندراوێکى بڵاوکردەوە.
دەقی راگەیاندراوەکەى پەژاک
دەوڵەتى ئێران هەرگیز بە نکۆڵیکردن لە زیندانیانی سیاسی و لەسێدارەدانیان ناتوانێت کێشەکان چارەسەر بکات
١٩ی بانەمەڕ بۆ بزووتنەوەى ئازادیخوازیی رۆژهەڵاتی کوردستان رۆژی بەریەککەوتنی رەشبیری و ئازادبوونە. رژێمی ملهوڕی ئێران لەو رۆژەدا چوار تێکۆشەر و شۆڕشگێڕی کوردی بەبێ بڕیارێکى دادپەروەرانە و لە دواى ساڵەها ئەشکەنجەدانی قورس و دژوار لەسێدارەدا. فەرزاد کەمانگەر، شیرین عەلەم هولی، عەلی حەیدەریان، فەرهاد وەکێڵی و مەهدی ئیسلامییان بوونە هێمای دژە ملهوڕی و تێکۆشان بۆ مرۆڤی ئازاد و بەرخودان و تێکۆشانیان لە یادگەى مێژوویی کوردا دەمێنێتەوە و هەموو کاتێک یاد و ناویان بە نەمری دەمێنێتەوە. جارێکیتر یادی شەهیدانی زیندان و هەموو شەهیدانی مانگی ئایار (گوڵان) بەرز رادەگرین و پەیمانی بەردەوامیدان بە تێکۆشانمان لە پێناو ئامانجی شەهیدەکانمان نوێ دەکەینەوە.
یەکێک لە شێوازەکانى رژێمە هیرارشی و دەسەڵات تەوەرەکان دروستکردنی شێوازەکانی کۆنترۆڵ و سزادانى کۆمەڵگەیە تاوەکو لەو رێگەیەوە مرۆڤەکان و بە گشتیش کۆمەڵگە بە تەواوەتی بکەنە ملکەچی بێ ئەملاولای خۆیان، کە ناچاریان بکەن پەیڕەوی لە یاسا و رێساکانیان بکەن. یەکێک لەو شێوازانە ئەشکەنجەدانە. رژێمی ملهوڕی ئێرانیش لە ریزی ئەو حکومەتانەدایە، کە بەشێوەى نامرۆیانە و بە دەر لە هەموو نۆرم و بەها ئەخلاقی و حقوقییەکان سوود لە ئەشکەنجەدان و لەسێدارەدان بۆ سەرکوت و سڕینەوەی بەرهەڵستکاران و رەخنەگرانی وەردەگرێت و دۆسیەى لەسێدارەدان، ئەشکەنجە و سەرکوت هەموو کات لە رژێمی دیکتاتۆریی ویلایەتى فەقێ دا کرابووە و کراوەشە. رژێمێک، کە بەرهەڵستکارانی بەپێی یاساکانی بە تاوانبار دەزانێت و لە ئەنجامدا بۆ ئەدەبکردن و تۆقاندن، سێدارە و ئەشکەنجە وەک شێوازێک لە پێناو زاڵبوون و باڵادەستیی خۆی بەسەر کۆمەڵگەدا بەکاردەهێنێت. حکومەتى ئێران سەبارەت بە مافی ئازادی گەلان لە ئێران هیچ هەنگاوێکى بۆ چارەسەرکردنی کێشەکە هەڵنەگرتووە و بە پێچەوانەوە کێشەکەى بەشێوەیەکى توندوتیژانە و نکۆڵیکەرانە سڕیوەتەوە. مێژووی رژێمی خوسرەوانی شایەتی کوشتاری بەربڵاوەى شۆڕشگێڕان و تێکۆشەرانی رێگای ئازادییە لە ئێراندا.
ئێران یەکێک لەو وڵاتانەیە، کە زۆرترین ئاماری زیندانیی سیاسیی هەیە و زیاتر لە نیوەى زیندانییەکانیش کوردن. هەر چەند لە ئێران پێناسەیەکى روون لەبارەى زیندانیی سیاسییەوە بوونی نییە و ئێران هەمیشە نکۆڵی لە بوونی زیندانیانی سیاسی دەکات و بەرهەڵستکاران و رەخنەگرانی بە تێکدەرانی ئاسایشی نەتەوەیی خۆی دەزانێت، لە ژێر ناوی جۆراجۆری وەک موحارب (دوژمنی خودا)، جودایخواز، شەڕانگێز و لە ژێر دەیان ناو و ناتۆرەی تردا تێکۆشەرانی سیاسی لەسێدارە دەدات. سیستمی سزاکانى ئێران ئامڕازێکە بۆ دروستکردنی کەشی تۆقاندن و ترسنانەوە و تیایدا ژیانی ئازاد بوونی نییە و رەتکراوەتەوە.
تێڕوانینی رژێمی ئێران بەرامبەر بە بەرهەڵستکاران هەمیشە لەسێدارەدان و ئەشکەنجە بووە و لە بەرامبەر کوردیشدا تێڕوانینکێکى زۆر توندوتیژانەتری هەبووە و دوژمنیی خۆی لەگەڵ کوردەکان بە هەموو شێوەیەک و لەژێر هەموو پاساو و بیانویەکدا خستووەتەڕوو. گەلی کرد لە ئێران رووبەڕووی سەرکوتی چەندلایەنە بووەتەوە. ئەو تێڕوانینە، سنووردار نییە بە رژێمی داگیرکەری ئێرانەوە و لە مێژووی هاوچەرخدا لەگەڵ ئەو سیاسەتەدا رووبەڕوو بووە، بەڵام ئەم گەلە لە هەموو ئەو سەردەمانەدا بۆ گەیشتن بە ئازادی و یەکسانی درێژەی بە تێکۆشان داوە. لە لەسێدارەدان و ئەشکەنجەى رۆڵە شۆڕشگێڕەکانی کورد تاوەکو کوشتاری کۆڵبەرانی کورد هەموو دیوی دراوی دوژمنایەتی حکومەتى ویلایەتی فەقێیە بەرامبەر بە کورد و تاوانەکانى ئەو رژێمە بەرامبەر بە کورد لە پێناو بێدەنگکردنی دەنگی ئازادیخوازییان هیچ سنوورێکى نییە. سەرباری هەوڵەکانی رژێم بۆ وەرگرتنی دانپیادانانی زۆرەملێیانە و تێکشکاندنی ورە و کەسایەتیی زیندانیانی سیاسی، بەڵام گۆڕەپانی زیندان هەمیشە گۆڕەپانی تۆکمە و هەمیشەیی و گرتنەبەری هێڵی بەرخودان بووە. ئەو هەڵوێست و بەرەنگارییە هەمیشە لە ژوورە ترسناکەکانى زیندانەکانی رژێمی ئێراندا لە کەسایەتیی تێکۆشەرانی رێگای ئازادیدا بینیومانە. بێگومان لە پشت ئەو ئیرادە و ورە و خۆبەدەستەوەنەدانە هۆشیاری و ئاگایی و تێگەیشتنی قوڵ بۆ ئازادی و راستی بوونی هەبووە. دواى تێپەڕبوونی زیاتر لە سێ دەیە لە شێوەیەکى نوێی دەسەڵاتی دڕندانەى دەوڵەت – نەتەوە، بەرخودانی تێکۆشەران و هەڵسوڕاوانی سیاسی بێ هاوتا بووە و سیستمی دادوەریی ئێران لە تێکشکاندنی بەرخودانی زیندانیانی سیاسیدا دەستوەستان ماوەتەوە و لە ئەنجامدا بە پەتی سێدارە هەڵیواسیون. زیندان لە کوردستان لە نێو بزووتنەوەى ئازادیخوازیی کوردا بوەتە چەقی تێکۆشان و بووەتە دیمەن و وێنایەکى راستى ژیانی راستەقینە و شکۆمەندانە و بە کەرامەت.
پارتی ژیانی ئازادی کوردستان (پەژاک) لە کاتێکدا بە پیری دەهەمین ساڵیادی لەسێدارەدانی هەڤاڵە تێکۆشەرەکانییەوە دەڕوات، کە جاریکیتر دژایەتیی رژێم بەرامبەر بە کورد توندتر بووەتەوە و شەپۆلێکى تر لە لەسێدارەدانی زیندانیانی سیاسیی کورد دەستپێکردووەتەوە و لە چارەنووسی بەشێکشیشان هیچ هەواڵێک لە بەردەستدا نییە. رژێمی ئێران هەموو کات پشتی بە کوشتنی رۆڵە ئازادەکانى کورد بەستووە و لەو چوارچێوەیەدا دەستی لە هیچ تاوان و توندوتیژییەک نەگەڕاندووەتەوە. لە روانگەى پەژاکەوە ئێران بە نکۆڵیکردن لە زیندانیانی سیاسی و لە سێدارەدانیان هەرگیز ناتوانێت کێشەکان چارەسەر بکات. رەفتاری توندوتیژانە بەرامبەر بە دەوڵەمەندی و فرەیی شوناس و ناسنامە و گوێ نەدان بە بیر و باوەڕەکانیان ناتوانێت دیموکراسی و ئازادی لە ئێران بەدی بهێنێت. پەژاک جارێکیتر لەسێدارەدان و سڕینەوەى شۆڕشگێڕان لە ئێران بە تایبەتی کوردان ئیدانە دەکات و لە کەسایەتیی شەهیدانی ١٩ی بانەمەڕدا پەیمانی خۆی بۆ بەردەوامیدان بە تێکۆشان و گەیشتن بە ئامانجی شۆڕشگێڕیی شەهیدان تاوەکو دوا هەناسە نوێ دەکاتەوە و رایدەگەیەنێت، کە سێدارە و سەرکەوت هیچ درز و دابڕانێک لەسەر پێداگری و بەردەوامیدان بە تێکۆشان لە دژی نادادی دروست ناکات.
ژ.ت
