فەرمانداریەتی یەبەشە ڕایگەیاند، کە هەڕەشەکانی دەوڵەتی تورکیا  ڕێگە لەبەردەم هەوڵەکانی فاشیزمێکی نوێ دەکاتەوە و بۆ گەلانی ناوچەکە،و ئەمە بە واتای فەرمانێکی نوێ دێت.

ئێوارەی ئەمڕۆ، فەرماندەیی گشتیی یەکینەکانی بەرخۆدانی شەنگال-یەبەشە، دەربارەی هەڕەشەکانی دەوڵەتی تورک لەسەر شەنگال، ڕاگەیەندراوێکی ئاراستەی ڕایگشتیی کرد.

لە ڕاگەیەندراوەکەدا، هاتووە: یەبەشە لە یەکەم ڕۆژی دروستبوونییەوە لەدژی چەتەکانی داعش شەڕی کردووە و سەدان شەهیدی داوە، بەو هەنگاوانەی کە دژی چەتەکانی داعش گرتوویەتییەبەر، سەلماندوویەتی کە تاکە هێزی پاراستنی کۆمەڵگای ئێزدییە.

یەپەژە، ئاماژەی بەوەشکردووە: هێزەکانی ئێمە ناوچەکانی ژێر دەسەڵاتی چەتەکانی داعشیان ڕزگارکردووە و ڕەنجێکی زۆریداوە لەپێناو جێگیرکردنی ئارامیی ناوچە مەدەنییەکاندا، بێ ئەوەی بکەوێتە ژێر کاریگەریی هیچ هێزێکی سیاسیی، بووەتە یەکێک لەو هێزانەی کە ڕەنگی جیاوازی نەتەوەکانی لەخۆگرتووە.

لەبەردەوامی ڕاگەیەندراوەکەدا هاتووە: یەبەشە هەر لە سەرەتای دروستبوونییەوە، بۆ چارەسەرکردنی کێشەکانی کۆمەڵگای ئێزدی، لە گفتوگۆدابووە لەگەڵ حکومەتی ناوەندی عێراق و هاوپەیمانی نێودەوڵەتیی، چەندنین دیدارمان لەچوارچێوەی پاراستنی سنوورەکانی خاکی عێراق لەگەڵ هێزە عێراقییەکان ئەنجامداوە، لەچوارچێوەی دیدارەکانیشدا پاراستنی سنوورەکانی عێراق-ڕۆژئاوا ڕادەستی عێراق کراوەتەوە.

یەبەشەئاماژە بەوە دەکات کە هەتا ئێستا ئەو ڕەنجەی کە داومانە فیڕۆ نەچووە، بەپێچەوانەوە بەهێزێکی زیاترەوە پێمان ناوەتە قۆناغێکی نوێوە، سوپاسی خۆشمان ئاراستەی گەلەکەمان، هێزە دیموکراسیی و ئازادیخوازەکان دەکەین، کە لەم قۆناغەدا پشتگیرییان کردووین، تێکۆشانمان هەتا سەرکەوتن بەردەوام دەبێت.

لە کۆتایی ڕاگەیەندراوەکەی یەکینەکانی بەرخۆدانی شەنگال-یەبەشە، ئاماژە بە هەڕەشەکانی دەوڵەتی تورکیا کراوە بۆ سەر شەنگال و هاتووە: هەڕەشەکانی دەوڵەتی تورکیا ڕێگە لەبەردەم هەوڵەکانی فاشیزمێکی نوێ دەکاتەوە و بۆ گەلانی ناوچەکە،و ئەمە بە واتای فەرمانێکی نوێ دێت، ئێمە ئەو لێدوانانەی کە هیچ پەیوەندییەکیان بە سەروەریی و یەکپارچەیی خاکی عێراق-ەوە نییە قبوڵناکەین، پێویستە هەموو جیهان و ڕایگشتیی لەبارەی تورکیاوە دەنگ بەرزبکەنەوە، بۆ ئەوەی ڕووداوی هاوشێوەی پێشوو لە شەنگال دووبارەنەبێتەوە.

ک-ش