سەرلەبەیانی ئەمڕۆ، پارلەمانی کانتۆنی نوشتالی سویسرا کۆبوویەوە و تێیدا،  مژاری عەفرین و هێرشەکانی سەری خستە بەرباس و گفتوگۆ. پارلەمانەکە بە زۆرینەی دەنگ وێڕای ئەوەی پشتیوانی خۆی بۆ عەفرین و  گەلەکەی و بەرخۆدانەکەی دەربڕی، بەتوندی هێرشە داگیرکاریەکەی تورکیاشی بۆ سەر عەفرین و بە ئامانج گرتنی هاوڵاتیانی مەدەنی سەرکۆنە کرد. 

هاوکات بۆ ئەوەی پارلەمانی فەدراڵی سویسرا لە دژی هێرشی تورکیا بۆ سەر عەفرین کۆببێتەوە و بکەوێتە نێو هەوڵ و تەقەلاوە، ۱٥ پارلەمانتاری پارلەمانی نوشتالی گەڵاڵە پێشنیارێکیان خستەڕوو. گەڵاڵەپێشنیارەکە  لە کۆی ۱۱۳ پارلەمانتار،  ۹٨ یان بە بەڵێ  و ۲ شیان بە نا دەنگیان پێدا و ۱٤ پارلەانتاریش بێلایەنییان هەڵبژارد و بەو شێوە ڕەوانەی پارلەمانی فەدراڵی کرا.

ئەمەو پارلەمانتارانی نوشتالی داوایان کرد ژیانی مەدەنیەکانی عەفرین پارێزراو بێت و داواش لە ڕژێمی تورکیا کرا، هەرچی زووە هێرشەکانی بۆ سەر عەفرین ڕاگرێت. بانگیش لە حکومەتەکانی کانتۆنەکان و حکومەتی فەدراڵی سویسرا کرا، لە بەرامبەر هێرشی تورکیا بۆ سەر عەفرین هەڵوێستی هەبێت و بۆ چارەسەری ئاشتیانەی پرسی کورد ڕۆڵ بگێڕێت.

هـ.هـ