لە بەردەوامی چالاکیی ڕێپێوانی درێژی ٢٦ ڕۆژە، کە بۆ شەرمەزارکردنی پیلانگێڕی نێونەتەوەیی سەر ڕێبەر ئاپۆ دەستپێکراوە، ئەمرۆ گەیشتە شاری ستراسبۆرگ.

ڕێپێوانکاران لەلایەن کوردستانیانەوە پێشوازییان لێکرا و دواتر لە گۆڕەپانی کلبیر تا ناوەندی کۆمەڵگەی دیموکراتیکی کوردی ستراسبۆرگ، بە وتنەوەی درووشم و هەڵکردنی ئاڵای ڕێبەر ئاپۆ ڕێپێوانێک ئەنجام درا.

ڕێپێوانەکە بە گەیشتنیان بە پێش ناوەندی کۆمەڵگەی کوردی دیموکراتیکی ستراسبۆرگ گۆڕدرا بۆ گردبوونەوە.

لە گردبوونەوەکەدا پەڕلەمانتاری یەکێتی ئەورووپا ئیمانوێل فێرانتیس قسەیکرد و ئاماژەی بەوەدا موخاتەبی گەلی کورد ڕێبەر ئاپۆیە. ناوبراو جەختی کردەوە لەوەی دەبێت دەستبەجێ ئازادی جەستەیی ڕێبەر ئاپۆ مسۆگەر بکرێت.

لە بەردەوامییدا ئیمانوێل فێرانتیس، هێرشە داگیرکارییەکانی دەوڵەتی تورکی لەسەر هەرێمەکانی باکوور و ڕۆژهەڵاتی سووریا شەرمەزاکرد و گوتی: "ئامانجی ئەم هێرشانە بۆ لەناوبردنی مۆدێلی ئیدارەی خۆبەڕێوەبەرییە، کە لەسەر بنەمایی پارادایمەکانی ڕێبەر ئاپۆ دامەزرێندراوە."

لە کۆتایی قسەکانییدا ئیمانوێل فێرانتیس، بانگەوازی بۆ بەشداربوونی بەهێز لە ڕێپێوان و گردبوونەوەی ١٥ی شوباتی ستراسبۆرگ کرد.