جە وەردەمو باڵەخانەو کۆنسەو ئەوروپای جەشارو ستراسبۆگ-و فەڕەنسای، ٦ ساڵێن چالاکی ئێشکگری پەی ئازادی ڕێبەرو گەلو کوردی عەبدوڵا ئۆجالانی بە شێۋازی نۆبەتی ئەنجام مڎریۆنە. جە ۳۲٦ مین هەفتەنە، چالاکییەکە جەلاو دەستێ جەکوردانو شارو ئیڤری وڵاتو فەڕەنسای جە ئەستۆ گیریان و هەر یۆ جە "خانم ئۆزدەمیر، دۆغان چەلیک و فاتمە عەلی" بەشدارێش بیێنێ.

 بەشداربیەکێ پەیۋەست بە بارودۆخو ئۆجالانی و گۆشەگیرکەردەیش ڕەخنەشان جە هەڵۋێستێ نادادپەروەرانێ کۆنسەو ئەوروپای و کۆمیتەو جیهانیى دژ بە ئەشکەنجەی (سی پی تی) و ڕێکۋزیاکانو مافو مرۆڤی گێرتەن و ۋاتەنشان: ۲ ساڵێ زیاتەرەن کە هیچ هەۋاڵێ جە ئۆجالانی نییەن و چارەنویسش نادیارەن و ئانێچە مایەو قبوڵی نییەن.

ئێشکگێرەکێ دەستنیشانشان کەردەن: هاموەخت چەنی گۆشەگیرکەردەی و چارەنویس نادیاری ئۆجالانی، دەوڵەتە داگیرکەرەکێ کوردستانی فشارەکێشان سەرو کوردی زیاتەرێ کەردێنێ و سیاسەتو قڕکەردەی پەیڕەو مەکەرانە.

ئا ئێشکگێرێ داۋاشان جە دەوڵەتان و ڕێکۋزیا ئەوروپی و جیهانیەکان کەردێنە تا بەخێرایی شاندێ ڕەۋانەو ئیمرالی بکریۆنە و سەبارە بە ئۆجالانی هەۋاڵێ باۋەرانێۋە. چونکە ئۆجالان ڕای ڕاستیەش گێرتێنە و کوردیچ بە ڕێبەرو وێش قبوڵش کەردەن و تا چارەنویسش ڕۆشن نەبۆۋە و ئازاد نەکریۆنە، کورد و دۆستەکێش دەستبەردارێ چالاکی نمەبانە.