ئاماری فەرمی ئێران-ی بێكاری جە ئێران نزیک بە ۱۱٪ و جە وەرهۆرزو کوردستانی نزیک بە ۲۰٪ دەستنیشان کەردەن، بەڵام ئامارێ نافەرمیێ ڕێژەکەشان جە ئێران بە ۳۰٪ و جە وەرهۆرزو کوردستانی بە ٤٥٪ وستەن ڕووە و هەڵبەتە بێکاریەکە چەنی ئامای کۆرۆنا-ی فرە زیاتەر بییەن.
میانگەو فەرمی ئامارو ئێرانی سەبارەت بە ڕێژەو بێکاری جە ئێرانەنە ئامارش وەڵاو کەردەنەوە و جە میانشەنە ئاشکرا کریان: " بێکاری و بێهەرمانی جە ئێران-ـەنە ڕوو بەهۆرکێشیایەن و میانگینو بێکاری یاوان بە ۱۰٫٦٪".
بەڵام هەمان ئامار بێکاریش جە پارێزگاکێ ئیلام-ی و سنە-ی سەر بە وەرهۆزۆ کوردستانی بە ۲۰٪ دەستنیشان کەردەن کە ڕێژەکە ۲ جارێ زیاتەرەن جە پارێزگاکێ تەرێ ئێرانی.
بەپاو هەمان ئاماری جە بێکاریەنە پارێزگاکێ تەرێ کوردستانی چوون، ئورمیە و کرماشان بارودۆخشان جە پارێزگاکێ تەرێ ئێرانی فرە خراپ تەرەن و دمای سنەی و ئیلامی ڕیزبەندەنە یاگێشان گێرتێنە.
بەڵام ئامارێ نافەرمیێ ڕێژەو بێکاریەکەیشان جە ئێران بە ۳۰٪ و جە وەرهۆرزو،کوردستانی بە ٤٥٪ وستەن ڕووە.
هەمان ئامارێ نیشانەش مڎانێ کە جەوانێ تەمەن ۱۸ تا ۳٥ ساڵانێ کە هازی سەرەکی کار و هەرمانێنێ ۳۰٪شان بێهەرمانێنێ. هەر پاسە ٥۰٪و بێکارەکان ئا کەسێنێ کە وانایشان تەمامنان و خاوەن بڕوانامێ قۆناخە جیا جیاکانو وانایەنێ و دەرفەتەکێ کارکەردەیشان پەی فەراهەمێ نەکریێنێ.
هەڵبەتە ئامارەکە باسش جە بێکاری تەنها تا پایزی ویەردەی کەردەن و بێگومان جە ئیسەنە و دمای سەرهۆردای و تەشەنەکەردەی نەوەشی (کۆرۆنا)ی ئامارەکەی فرە زیاتەر بییەن.
