هامسەرۆکەو گردیی هەدەپەی پەرۋین بوڵدان، جە کۆبیەو فڕاکسیۆنو پارتەکەیشەنە جە پارلەمان تورکیایکە ئەڎێ شەممەی و نمایندێ چنڎ سەندیکێ تورکیای و پارلەمانتارێ پارتەکەیش و دەزگاکێ یاوۋەری ئامادێش بیێ ، دمایین بارودۆخ و تورکیای و کوردستانی و ناوچەکەیش هۆرسەنگنان و ستاییش و چالاکی هەفتانەو ئەڎایانو شەممەیش کەرد و جارێ تەر دژ بە گۆشەگیری ئیمرالی ناڕەزایەتیش نیشانە داۋە.

'ئایهان ئایهان کەسێ کۆشەر پەی دیموکراسی بێ'

پەرۋینە سەرەتا یادش جە پارلەمانتەری کۆچکەردە ئیبرایم ئایهانی کەرد و کە جە هەۆلێر کۆچی دماییش کەردە بێ و بە کەسێ کۆشەر پەی دیموکراسی و ئازادی بە نامێش کەرد و سەرەوەشیش جە بنەماڵە و هاۋەڵانیش کەرد و بەڵێنشدا تا درێژەپنەدەرێ ڕێبازەکەیش بانە.

'مشیۆم لەیلا گیوڤەن ئازادە بکریۆنە'

پەرۋین بوڵدان، باس جە دەستگیرکەردەی لەیلا گیوڤەن پارلەمانتارەو هەدەپەی جە جۆلەمێرگ کەرد و بە بەدیل گیریێ بەنامێش کەردە و داۋاش کەرد، بەزوویی ئازادە بکریۆنە. هەرپاسە ۋازیارە بییە ۋەراۋەر دەستگیرکەردەیش هەڵۋێست نیشانە بڎریۆنە. پەرۋینە سڵامش ئاڕاستەو لەیلێ و فیگەن یۆکسەکداغێ و گۆڵتەن کشناکێ و ژەنە بەندکریاکانو تەری کەرد.

'کورسی پارلەمانی کورسی گەل-ین'

پەرۋینە باسش جە قۆڵ بییەی کێشەکانو تورکیای کەرد و ۋاتش: پارلەمانی مەکەرمێنە بە یاگێ چارەسەری و کورسی پارلەمانی مەکەرمێنە بە کورسی گەلی و گرد ناهەقیێ، نادادپەروەریێ، و پاشێلکاریێ جە پارلەمانەنە ۋزمێنە ڕووە و حسابشان چنە مەپەرسمێۋە.

'پیلانو ئاکەپەیمان مایەپووچ کەردەۋە'

پەرۋین بوڵدان، ئاشکراش کەرد: بە هۆرۋچناو ۲٤و حوزەیرانی وبەدەست ۋستەی ٦۷ پارلەمانتاران، هەدەپە هەم سەرکەوت و هەم پیلانو ئاکەپەیش مایەپووچ کەردەۋە. ئێمە ڕامان نەڎا پارلەمان بگنۆ دەستشان. ئاکەپە پارلەمانێ بێ هەدەپەش گەرەک بێ، بەڵام ئێمە ڕاگیریمان چنە کەرد. ئاکەپە و هامشێۋەکێش مشیۆم دەرس جە ۷ حوزەیرانی و ۲٤ و حوزەیرانی هۆربگێرانە. ئەگەر ئاکەپە و هامشێوەکێش پەیامو گەلی خاس نەۋاناۋە، با دڵنیێ بانە چنڎین هۆرۋچنێ و ئەنجامێ هامشێوەو ۷ و ۲٤و حوزەیرانی دووبارێ بباۋە.

'گەلو کوردی قەیوم قەبوڵ نمەکەرۆنە'

پەرۋینە سەبارەت بە قەیومە شارەۋانی داگیرکەرەکانو ئاکەپەی ماچۆنە: جارێ تەر بە هۆرۋچنای شارەۋانیە داگیرکریاکان جە قەیومەکان ڕزگارێ مەکەرمێۋە. ئاکەپە هەر جە ئیسەوە ئامادەکاری پەی بەردەۋامی دایبە داگیرکەردەی شارەۋانیەکان مەکەرۆنە، بەڵام خافڵ چانەیە کە کورد ئیرادەش هەن و هیشتای ئا ئیرادەیەش نەشناسان. بەڵام مشیۆم بزانۆنە، کورد ئیرادەش هەن ئیرادەکەێیچش ڕەۋان. ئێمە جە ئیسەۋە بە شەۋێ و بە ڕۆچ کار و خەبات مەکەرمێنە و دەرەنجام شارەۋانیەکان بەدەست بۋزمێۋە. داۋمان جە گەلی و هێزە دیمۆکراسیۋازەکان هەن تا هامشێوەو ۷و ۲٤و حوزەیرانی، جە ۳۰ ئاداری بەشدارێ هۆرۋچنای بباۋە و سەرکەوتەی تۆمار بکەراۋە.

 'قەیرانەکێ قوڵی مەباۋە و هۆکارەکەشان گۆشەگیری ئیمرالییەن' 

هامسەرۆکەو گردیی هەدەپەی پەرۋین بوڵدان، ئاماژەش بە قوڵتەر بییەی قەیران و کێشەکان جە تورکیا دان و ۋاتەنش: ئێمە مزانمێنە دەسەڵاتدارێ نماتاوانە وڵاتی ڕاۋەبەرانە و کۆتاییشان بە دادپەروەری، دیموکراسی، ئازاددی و مافو مرۆڤی ئاۋردەن و فاشیزمانە حوکم مەکەرانە و وڵاتشان دووچارو قەیرانەکان و ئاڵۆزیەکان کەردەن و ئارامی و ئاشتیشان ناستەن. جە ۳ ساڵی ۋیەردەنە تا دیدارێ و سەردای ئیمرالی و چەمپنەکەوتەی چەنی بەڕێز ئۆجالانی بێنێ، وڵات ئاشتی، ئارامی و ئاشاییش و بێ قەیرانیەنە بەسەر بەرێنە. بەڕێز ئۆجالان هیچ کاتێ تەنازولش جە ئاشتی نەکەرد و پەی دیموکراتی-بییەی تورکیای و ئاشتی و چارەسەری کۆشا. بەڵام دەسەڵاتدارێ تورکیای ئانەشا بە ئاستەنگی دی و پۆکەی جە ۲۰۱٥ۋە گۆشەگیرشان جە ئیمرای بە سەختەر جە جاران سپاناۋە سەرو ئۆجالان-یەرە و جەنگشان دەست پنە کەردەۋە. ئیتر دمای ئانەیە وڵات ڕووبەڕوو قەیران و کێشە و ئاڵۆزیەکان بییەۋە. جە ڕاستییەنە بە گۆشەگیری ئیمرالی گردو تورکیای ۋزیانە گۆشەگیری. پۆکەی پەی کۆتایی-ئامای بە قەیرانی و جەنگی، چارەسەری دمایی-ئاۋردەیەن بە گۆشەگیر ئیمرالی و دەست پنەکەردەی سەردای و چەمپنەکەوتەکان چەنی بەڕێز ئۆجالانی. ئەگەر چەمپنەکەوتەی چنی ئۆجالانی ئەنجام بدریۆنە، ئاشتی و چارەسەری شۆنیشەرە مەیۆنە و قەیران و کێشەکێ و ئالۆزیەکێ جە تورکیا دماییشان مەیۆنە. جەی سۆنگەۋە ئاشکرا مەبۆنە کە دژبەری پەی گۆشەگیر چنڎنە گرنگەن و چی مشیۆم گرد کەس و لایەنێ ڕووبەرووش بمدرۆۋە. مشیۆم لابەردەی گۆشەگیری بە جەهەپە-یچەۋە، ببۆنە ئاژەو گرد کەسی و لایەنێ ئازادیۋازی جە هەر کۆیەیێ ببۆنە.