ئارۆ، سەعدی ئەحمەد پیرە، ۋاچەری فەرمی یەکێتی نیشتمانی کوردستانی-"یەنەکە"، جە کۆنگرێ ڕۆچنامەۋانیەنە سەبارەت بە کۆبیەی پارتەکیشان و ئاژە و بڕیارەکێ کۆبیەکەی زانیاریش دا و ئاشکراش کەرد:

دکتۆر بەرهم ساڵح، سەرۆکو هامپەیمانی پەی دیموكراسی و دادپه‌روه‌ری، کە ۋەڵتەر هاریکارو سکرتێرو گردیی یەنەکەی بیەبێ و جیابیەبێ، بەنامێۋ فەرمی داۋا ئەۋەگێڵایش پەی دلێ یەنەکەی کەردەن و داۋاکەش قبوڵ کریان. 

پیرە ۋاتەنش: جە کۆبیەکەنە بەرهەم ساڵح ئامادەبیەن و وێش پەی پۆستو سەرۆک کۆماری ئێراقی کاندیدا کەردەن و بە فرە دەنگی سەرکردایەتی یەنەکەی کاندیدایەکەش قبوڵ کریان. هاموەخت یەنەکە و هامپەیمانی پەی دیموكراسی و دادپه‌روه‌ری ئینێ گفتوگۆنە تا پەیۋەندی میانیشان ڕۆشن بکەراۋە.

سەعدی ئەحمەد پیرە، ۋاچەری فەرمی یەکێتی نیشتمانی کوردستانی-"یەنەکە"، ۋاتەنیچش: داۋاکاری (پارتو دیموكراتو كوردستانی-پەدەکەی) پەی پۆستو سەرۆک کۆماری ئێراقی یاگێ سەرسامی بیەن پەی یەنەکەی و داۋا جە پەدەکەی مەکەرانە تا چەنی یەنەکەی بە ۲ کاندید نەلانە بەغڎا (بەغداد).

 هەر دما بەدمای کاندیدا-کەردەی بەرهەم ساڵح-ی، هامپەیمانی بنیات-نیای کە جە لیستو فه‌تحی و ده‌وڵه‌تو یاسای دروست بیەن سەر بەحەشدی شەعبی و نوری مالکی-یەن و نزیکەن جە ئێرانی، پەشتگیریش پەی بەرهەم ساڵحی بەرۋست و بە شایستەو سەرۆک کۆماریش زانان.

هەر سەبارەت بە ئەۋەگێڵای بەرهەم ساڵحی پەی دلێ یەنەکەی و کاندیداکەردەیش پەی سەرۆک کۆماری ئێراقی، هامپەیمانی دیموکراسی و دادپەروەری كه‌ به‌رهه‌م ساڵح جە دمای وازئاردەیش جە یەنەکەی مەرزنابێشەرە و سەرۆکایەتیش مەکەرێنە، بەیاننامێش دان و ئاشکراش کەردەن: بەرهەم ساڵح و ژمارێ جە ئەندامان ۋازنامەشان دان بە بە هامپەیمانی و قبوڵ کریان.

جە بەیانامەکەنە ئامان: هامپەیمانیەکە پێسە پڕۆژێۋی سیاسی و مەدەنی بەردەۋامیش بۆنە و پی زووانە کۆبیەی فراۋان کریۆنە و چارەنویس و ئایندەو هامپەیمانی پەی دیموکراسی و دادپەوەری یەکلایی مەکریۆۋە.