ئارۆ ۳ شەممە هامسەرۆکو گردی هەدەپەی سەزای تەمەللی و کیاستێۋی یاۋەرش سەردای شارۊ جۆلەمێرگ-یشان کەرد. تەمەللی و کیاستەی یاۋەرش جە دەروازەو شاری جەماۋەریانە پێشۋازیشیان ۋنە کریا و بە کارۋانێۋی دوور و درێژ دەربازێ دلێ شاری بیێ. سەرەتا سەردای شارەۋانی جۆلەمێرگ-یشان کەرد کە جەلاو ئاکەپە-یەۋە داگیرکریان و دماتەر چەنی چینە جیاۋازەکێ گەلی کۆبیێۋە و دمایین ئاژە و بارودۆخو کوردستانی و تورکیاشان هۆرسەنگنا.

جە ۋەردەمو شارەۋانی جۆلەمێرگ-یەنە، کە بە پۆلیسێ و هێزە ئەمنیەکان گەمارۆ دریابێ، تەمەللی قسێش پەی جەماۋەری کەردێ و ۋاتش: "شارەۋانیەکەتان داگیرکریان، ئانا ئارۆچ بە چەکدارێ گەمارۆ دریان، ئەشیەی ئارۆ ئاکەسێ چێبیێنێ کە شمە هۆرتانۋچنێ، تەماشە کەردێ ڕا نمەڎانە گەل سەردای شارەۋانیەکەیش بکەرۆنە، شارەۋانیەکە داگیرکریان، بەڵام ئی بارودۆخە هەر پێسە بەردەۋام نمەبۆنە، دڵنیا بێدێ تا ٥ مانگێ و نیمی تەر بارودۆخەکە بە تەمامی مەفاڕیۆنە، یانی پێۋەرە بە بەشداری-کەردەی جە هۆرۋچنای شارەۋانیەکان فاڕمێنەش و شارەۋانیەکان ڕزگارێ مەکەرمێۋە".

تەمەللی دۋاش جە جۆلەمێرگیەکان کەرد، تا هامکارێش بانە و خەباتی هامبەش ڕاۋەبەرانە. جە ۋەراۋەرەنە جۆلەمێرگیەکێ بەڵێنشان دا پێسەو ۋیەردەی پەشتیۋانێ هەدەپەی بانە و ۋاتشان: " ئێمە مللەتێۋی ۲۷ ملیۆنی-یەنمێ، جە کەسی نمەتەرسمێنە و بە ئیرادەی ئازادمان ئایندەمان نەخشنمێنە".