ئارۆ جە بەرلین-ن، پایتەخت-و ئەڵمانیای، جەمال نەبەز پڕۆفیسۆر و ڕۆشنۋیر و نۋیسەری نامی کوردی، یۆ جە ئەرەمەرزنەرانو "کۆمەڵەی ئازادی و ژیانەوە و یەکێتیی کورد"ی کە بە (کاژیک) ئەشناسیان، جە ۸٥ ساڵی تەمەنیشەنە بە نەوەشی جە نەوەشخانەنە کۆچی دماییش کەرد.
  
جەمال نەبەز جە ۱۹۳۳ جە سلێمانییە جەئەڎێ بییەن و سەرەتا وانایش جە حوجرە و مزگییەنە بییەن و دماتەر قۆناغەکێ سەرەتایی و ئامادەیی و زانکۆیش جە بوارەکانو فەلسەفەی، دەروونناسیی، فیزیا و بیرکاریى بڕیێنێ. دمابەدمای بێئومێد بییەی جە بارودۆخ و شۆڕشی جە پانیشتو کوردستانی، جە ۱۹٦۲ بەیەکجاری وڵاتش ئاستەن جیا و ڕووەش نیان ئەڵمانیا و جەی وەختەۋە تا کۆچی دماییش کەردەن چاگە نیشتەجا بییەن.

جەمال نەبەز جیا جە خەبات و کۆشای ئازادی و نەتەوەیی کوردی دەیان پەڕتوکێ و سەدان وتارێش جە بواری مێژوویی، سیاسیی، زمانەۋانی و زانستیی و ۋنەکۆڵایی  نۋیستێنێ.
نامبریا چەنی ژمارێۋ جە هاۋەڵانیش جە بەرو وڵاتی "یەکێتیى نەتەوەیى و خوێندکارانى کورد"ی کە بە (Nuks) ئەشناسیان مەرزنانەرە و جە ڕاشەۋە کاری خەباتی سیاسیی و نەتەوەییشان کەردەن.

جەمال نەبەز پڕۆفیسۆر و ڕۆشنۋیر و نۋیسەری نامی کوردی، دەرەنجام دمای مانگێ جە نەوەشی و چێرو چەمداری پزشکییەنە جە یۆ جە نەوەشخانەکانو بەرلینی گیانش ئەسپارد و پەی هەمیشەی کۆچی دماییش کەرد.