سەرچەمەکێ هەۋاڵی جە خورماتوو ۋەڵاشان-کەردەۋە، ئارۆ شەممە سەعات ۱۳:۳۰ دەیەقی نیمەڕۆی، جە هەمبارێ چەک و تەقەمەنی حەشدی شەعبی کە نزیکو ڕاۋەبەری پۆلیس-یەن ئەوەتەقای ڕووەش دێنە و جە ئاکامشەنە ۲۱ کەسێ بریندارێ بیێنێ کە ژەنی و زارۆڵێ ئینێ دلێشانە و زیانی ماددی گەورەش دمارە ئامان. بریندارەکێ ڕەوانەو نەوەشخانەی کریێنێ و زانیا چنڎ بریندارێشان برینەکێشان سەختێنێ.

جە چنڎ مانگێ ۋیەردێنە پەیاپەی جە هەمبارەکانو چەک و تەقمەنی جە هەۆلێر، سلێمانییە، دهۆک و کەربلا ئەوەتەقای ڕووەشان دێنە و سەرەڕاو بریندرابییەی چنڎ کەسان، زیانی ماددی فرەشان ونە کەوتەنەوە کە بە ملیۆنان دۆلارێ مەزەندە کریان.

چنڎ سەرچەمێ میدیایێ جە ئێراق و پانیشتو کوردستانی، ئەوەتەقای هەمبارەکان بە ئەنقەست مزانانە و شیمانە مەکەرانە پەی پەردەپۆش-کەردەی ۋرەتەی چەک و تەقەمەنی چا کۆگا و هەمبارانە ئەنجام دریێ بانە و ژمارێۋ بەرپرسیارێ حزبیێ و حکومیێ پەشتیشانەۋە بانە.