دلێگەو یاۋنەری یەکینەکانو پارێزنای گەلی-یەپەگە بە ۋەڵاکریای سەربازی ئاشکراش کەرد: "جە ۱٦ ئۆکتۆبەری جە ناوچەو شێراۋاو عەفرینی داگیرکریای، شەڕڤانەکێشان دژو تاقمە چەتەکانو فرقەت ئەلحەمزەی چالاکیشان ئەنجام دان و جە ئاکامشەنە ٤ چەتێ کوشیێنێ و ۳ تەریێچ بریندارێ بیێنێ. یەپەگە نامێ ۳ جە چەتە کوشیاکانش پی جۆرە ۋەڵێ کەردێنێ؛ (عەبدوڵا مارێ، محەمەد سلێمان و ئەبو یەعقوب حەمزە). چەتە کوشیێکێ کارا بەشدارێ کوشتوبڕی و تاڵانکەردەی و کۆچبەرکەردەی عەفرینیەکان بیێنێ".

یەپەگە دەستنیشان کەردەن: "جە ۱۷ ئۆکتۆبەری جە دەگاو کەفرنەبۆی کە سەر بە شێراۋایەنە، شەڕڤانەکێشان چالاکیشان دژو ماشینێۋی سەربازی تاقمە چەتەکانو فەیلەق ئەلشامی ئەنجام دان. جە چالاکییەکەنە ۲ چەتێ کوشیێنێ و ۲ تەرێچ بریندارێ بیێنێ و ماشینەکەێچ دلێنەبران".

چالاکییەکێ شەڕڤانەکانو یەپەگەی و یەپەژەی، هەر جە دمای داگیرکەردەی عەفرینی جەلاو تورکیا و تاقمە چەتەکانشەۋە، جە چوارچێۋەو دووەمین قۆناغ جە مدرامانو سەردەمی دەستشان پنەکەردەن و تا ئیسە بەردەۋامیشان هەن. بە گردی جە چالاکییەکانە سەدان چەتێ و سەربازێ تورکیای کوشیێنێ و سەدانی تەرێچ بریندارێ بیێنێ. یەپەگە و یەپەژە بەڵێنشان دان تا ئازادکەردەی یەکجاری عەفرینی دەستبەردارێ چالاکییەکانشان نمەبانە و تۆڵە جە سەرجەم داگیرکەران و هامکارەکانشان مەکەرانێۋە.