شەۋێ ۋیەردێ، جە هەرێمو مەتینای، کە سەر بە هەرێمەکانو پارێزنای مەدیا-یەن، فڕۆکە جەنگییەکێ تورکیای داگیرکەری بۆردومانشان کەردەن و کۆمەڵکوشیشان ئەنجام دانەۋە.
سەرچەمە هەرێمیەکێ ئاشکراشان کەردەن، بۆردومانەکە کانی بۆتکێ نزیک بە دەگاو ئەرەدنا-یشان کەردەن ئامانج و جە ئاکامشەنە ۳ هاموڵاتیێ هەنگەۋانێ شەهیدێ بیێنێ کە شناسنامەکێشان پی جۆرە ئاشکرێ کریێنێ:

رەمەزان محەمەد عەبدولڕەحیم
ئیسماعیل حەسەن
دلۆڤان ساڵح حەسەن

کە هەر یەرە شەهیدەکێ خەڵکو ئەردەنایەنێ و جە کۋیسانو کانی بۆتکێی سەرقاڵێ هەنگەۋانی بیێنێ. دمابەدمای بۆردومانەکەی ئارۆ سەرسەبای خەڵکو ئەردەنای لۋێنێ کانی بۆتکێ و تەرمێ ۳ هاموڵاتیەکەیشان بەردێنێۋە و بە مەراسیمی جەماوەری ئەسپەردێشان کەردێنێ.

ناوچە بۆمباران-کریاکە نە جە دوور نە جە نزیک هیچ بنکە و بارەگایێ جمیەری ئازادی کوردی و گەریلایش چنە نەبیەن و ئانێچە جەلاو هاموڵاتیانو دەڤەرەکەی پەی دەزگاکانو یاۋنەری پەشتڕاست کریانەۋە. کەچی سەرەڕاو ئانەیە، بەنام ۋەزارەتو پارێزنای تورکیای بانگەشەش کەردەن، بۆردومانەکە ئەنبارو چەک و تەقەمەنی و جبەخانەو ڕێکۋستەی (پەکەکە)یش کەردەن ئامانج و ٤ تەرۆریستێ کوشیێنێ!

فڕۆکە جەنگییەکی سوپا داگیرکەرەکەو تورکیای، ئینە یەکەم جار نییەن کە مەدەنییەکان مەکەرانە ئامانج و کۆمەڵکوشێشان مەکەرانە، بەڵکو جە ۋیەردەن چنڎین کۆمەڵکوشیێ تەرێشان ئەنجام دێنێ و دەیان هاموڵاتیی مەدەنیشان کەردێنێ قوربانی و ڕووبەرێ فراۋان جە ژیوگە و دارستانێ کوردستانیشان وێران کەردەن و سۆچنێنێ. پسپۆڕێ و شارەزێ بوارەکەی هۆکارو سەرەکی بە ئامانج گێرتەی مەدەنەکان پەی بێدەنگی حکومەت، پارلەمان، پارت و لایەنەکان جە پانیشتو کوردستانی و گلێرگەو میاندەوڵەتی مەگێڵناۋە و ماچانە: تا ئا بێدەنگییە بەردەۋام ببۆنە، بە ئامانج گێرتەی و کۆمەڵکوشکەردەی مەدەنیەکانیچ بەردەۋامیش ببۆنە و هامکات ڕژێمە داگیرکەرەکەو تورکیای زیاتەر هانی بڎۆنەتا هاموڵاتیی زیاتەر کۆشتوبڕ بکەرۆنە و ژیۋگەی بکەرۆنە وێرانە.