دمابەدمای ئانەیە کە جە شارو پاوە-ی و دەوروبەریشەنە چەنڎین هاموڵاتیێ تێستو کۆرۆنا ڤایرۆسی کریێ و تێستەکێشان ئەرێنیێ بیێ، ژمارێو چالاکوانێ وێبەخشێ شاری پەی ڕووبەڕووبییەی ڤایرۆسەکەی و زیاتەر تەشەنە نەکەردەیش (کەمپەین دژ بە کۆرۆنای یان وێبەخشێ ژیوای)یشان دەست پنەکەردەن.

جەی بارەوە (پەلیانەو پاوە پرێس)ی وەڵاوشکەردەنەوە؛ چالاکوانە وێبەخشەکێ سەدان لیترێ دەرمانی دژە ڤایرۆسشان پەیڎا کەردەن و قۆناخ بە قۆناخ دەستشان کەردەن بە دەرمان شانی جە دامودەستگایەکێ شاری و دەوربەریشەنە و سەرەتا جە گەورە نەوەشخانەو شاریەوە دەست بەکارێ بیێنێ و سەراپاو نەوەشخانەکەی و دەوربەریشان دەرمان-شانی کەردەن.
دماتەر جە دەگاو شمشێر-ی، بانکە ئەلکترۆنیەکێ (عابر بانکێ)، بەنزیخانەکێ (پمپ بەنزینێ)، فروشگاکێ، یانێ ژمارێو جە کەسە نەوەشەکان، یاگە گردیێ و شۆلۆغەکانە هەمان کارشان کەردەن کو دەرمان شانایەکە هەر ۲٤ سەعاتێ جارێو ئەنجام مڎریۆنە. هامکات ئەندامێ کەمپینەکەی سەبارەت بە ڕاکارەکێ وەرگیری و وێپارێزی جە کۆرۆنا ڤایرۆسی زانیارێ بە هاموڵاتیان مەڎانێ و جە مەتەرسیەکانو نەوەشیەکەی کە بییەن بە پەتا و بە خێرایی ئێران، کوردستان، هەورامان و جیهانەنە وەڵاو مەبۆنەوە وشیارێشان مەکەرانێوە.

 هاموەخت هەر هاموڵاتیێو پەنەوازیش بە دەرمانی دژ ڤایرۆسی ببۆنە، ئەندامێ کەمپینەکە بەبێ بەرامبەر و بەبێ پوڵ مەڎانشان پنە تا وەرگیری جە وەڵاوبییەی کرۆرۆنا ڤایرۆسی بکەرانێ و ژیوگێوی پاکژ پەی هاموڵاتیان فەراهەم بکریۆنە.

ئەندامێ (کەمپەین دژ بە کۆرۆنای یان وێبەخشێ ژیوای) پێکێ ئامانێ جە:

"موختار خەندانی، ئاشنا حەسەن زاده، سوهەیب وەیسی، یوسف قادریان، سەعید ئەحمەدی، مەتین مەقسودی، جونەید هدایەتی، وەحید نقشی‌نیا، دیاری سەفەری، سیامەک سەیاف، مادح نوری، ئارمان یامەولا، ئامانج سەلیمی، خیام زارعی، هەمایون فەیزی، موعین مورادی، ئاکو شەریفی، عمران ئەحمەدی، بەشیر مورادی، سوهەیل نادری و فروزان رەسولی".

یاگێ باسیەنە هاموڵاتیێ پاوەی ودەوروبەریش شادمانێ و سپاسگوزارێنێ بە دەست پنەکەردەی کەمپینەکەی و ساتییشش مەکەرانێ و بایەخ و گرنگی فرە بە ڕانمایەکێ ئەندامێ کەمپینەکەی مەڎانێ و وازیارێنێ تابنەبڕکەردەی پەتاکێ کامپینەکە بەردەوامیش ببۆنە و شار و شارچێ و دەگایەکێ تەرێ هەورامانی و کوردستانیەنە کەمپینێ هامشێوێ ئەنجام بڎریانێ.