هەینی ۱۹و ئۆکتۆبەری جە کامپ-و زانستگەو شارو قامشلۆی كۆنفڕانسۊ زاستگە و ئەکادیمیاکانو ڕۆژئاڤاو کوردستانی و وەرهۆرز و سەرنیشتو سوریای دەستش پنەکەردەن و ئارۆچ جە دووەمین ڕۆچشەنە بەردەۋامەن. جە کۆنفڕانسەکەنە زانستگەکێ ڕۆژئاڤای، کۆبانێ، عەفرینی و ئەکادیمیاو میزۆپۆتامیای و دەیان ئەکادیمیسیەنێ و مسیارێ و دەستەکێ پەرۋەردەی ۋێسەری دیموکراتی بەشدارێنێ.
 
جە یەکەم ڕۆچو کۆنفەڕانسەکەیەنە ئاڵدار خەلیل ۋەرپرسیاو کاروباری دبلۆماسی(ته‌ڤده‌م)ی و عه‌بدولكه‌ریم سارۆخان هامسه‌رۆكو ئه‌نجومه‌نو قانوون-نیارەی جە كانتۆنو جزیرەی ئامادێ بیێ.  ئاڵدار خەلیل پەی بەشداریەکان قسێش کەردێ و ۋاتش: "جە پرۆسەو شۆڕشیەنە هەم دژ بە داگیرکاری و داعشی مدرامانمان کەردەن و هەم سیستەمی نوی پەروەردەیمان بونیات نیان، بەڵام ئینە هەنگامە سەرەتایەکێ شۆڕشیەنێ و زانستیانە هەنگامێ گەورەتەرێ پەی خزمەتکەردەی بە گەلی منیمێ. سیستەمی نو دژ بە زهنیەتە هەڵەکان مەرزیانەرە و بە زۋانی ئەڎایی کوردی و ئەتنیکەکان دەستش پنەکەرد. جە ئیسەنە هەزاران مسیارێ زانستگەکانە فێرۋازێنێ. ئا کەس و لایەنێ کە هیزی ۋاچێنێ، با ڕژێم بوڕۆنە ئارۆ دژایەتی وەنەی بە زۋانی ئەڎایی مەکەرانە و مەۋاچانە؛ ۋەرۊ ئانەیە ئایندەو زارۆڵەکامان نە فۆتیۆنە، کیانمێشان پەی فێرگە عەرەبیەکانو ڕژێمی. پۆکەی بەستەی ئەی کۆنفڕانسەیە گرنگەن و هیۋا سەرکەوتەیش پەی مەۋازوونە".

دماتەر کار و بەرنامەو کۆنفڕانسی بە گفتوگۆکەردەی دەربارەو پڕۆژەو وەنەی باڵای و گرفتەکێ جە زانستگە و ئەکادیمیەکان و مەرجەکێ هۆرگێرتەو وانکار (مسیار)ی درێژەش پنە دریا. جە پڕۆژەکەنە بە بنەماگێرتەی هۆرۋچنای و دروستکەردەی ئەنجومنە جیاۋازەکان جە زانستگە و ئەکادیمیا و فێرگەکانە جەختش سەر کریاۋە. یۆتەر جە  ئامانجەکانو کۆنفڕانسی یەکۋستەی سیتەمو وەنەیەن جە ڕۆژئاڤاو کوردستانی و وەرهۆرز و سەرنیشتو سوریای و جەی چوارچێۋەنە بە فراۋانی قسێ و باسێ کریێ و پێشنیارێ ۋزیێ ڕووە.

ئارۆچ شەممە جە دووەم ڕۆچو کۆنفڕانسەکەیەنە ڕاپۆرتێ زانستگەکان وانیێۋە و گفتوگۆشان سەر کریا. هەرپاسە ژمارێۋ ئەکادیمسیەنێ جە بەرو وڵاتێ بە سکایپ بەشدارێ کۆنفڕانسی بیێ و دید و پەیلۋای و پێشنیارێ وێشان پەی وڵێۋستەی سیستەمو وانای ۋست ڕووە و پێشنیارێ و سەرنجەکێشان بە هەند وەرگیریێ. بڕیارەن ئارۆ وێرەگا کۆنفڕانسەکە کۆتاییش پنە بێنە و ئەنجامنامەکەشپەی ڕایی گردی ۋەڵا بکریۆۋە.