زلار ستێرکە، ئەندامە جە کۆنسەو سەرۆکایەتیى گردیی کۆما جڤاکێن کوردستانی-کەجەکە، جە دێمانێنە چەنی بەرنامە"رۆژەڤا ژن" کە جە ستێرک تیڤى پەخش مەبۆۊ، ئاژەو ئارۆ تورکیا و ئێرانی و سیاسەتە دژە کوردیەکانشان و هۆکارەکێ سەرهۆردای قەیرانەکانشان، ڕاڤە کەردێنێ.

ستێرکە واتەنش: "٢٠ ساڵێ جەی وەڵتەر عەبدوڵا ئۆجالان، رێبەرو گەلو کوردی بە پیلانگێڵی میاندەوڵەتی بەدیل گیریا و هێزە میاندەوڵەتیەکێ جە پیلانگێڵیەکەشانە چەمەڕێ بێنێ کوشای ئازادی کوردی کۆتاییش بێنە، بەڵام بە مدرامان جە ئیمرالی و پلانەو جمیەری ئازادی بە قورسی ئا ئامانجەشان پووچ کریاۋە و هاموەخت کۆشای ئازادیچش فراۋان و پتەوتەر کەرد و جە چوار  لاو جیهانی بی بە خاوەن دۆست و هاۋەڵێ".
 
ستێرکە سەبارەت بە پەشتیۋانی کۆنفیدراسیۆنو یەکێتیى سەندیکاکانو بەریتانیای (TUC) پەی ئازادیى ئۆجالانی قسێش کەردێنێ و دەستنیشانش کەردەن: "کۆنفیدراسیۆنو یەکێتیى سەندیکاکانو بەریتانیا ٦ ملیۆن ئەندامێش هەنێ و جە ١٥٠هەمین کۆنگرەشەنە بە پڕۆژە پەشتیوانیىش جە کەمپەینو 'ئازادی پەی ئۆجالان' کەردەن. جمیەرو ئازادی کوردی سەرەڕاو ستاییش کەردەی ئی هەنگامێ و جەخت مەکەرۆۋە کە هەرگیز پەشتیۋانکارەکانش و دۆستەکانش جە ۋیر نمەکەرۆنە".

ستێرکە ئاماژەش بە ئاژەو ئێرانی دان و ئاشکراش کەردەن: "جە دماو کۆبیەو ئێران، تورکیا، ڕووسیا جە تاران، ۳ زیندانیێ سیاسیێ کوردی جەدار دریێ و هێرشی موشەکی کریا سەرو حدک و حدکای  جە باشور. ئا هێرش و جەداردایە پەیوەندیش بە تورکیای هەن. بەڵام ئیتر ئێران بە سیاسەتی دژە دیموکراسی توانا دەربازکەردەی و چارەسەرکەدەی قەیرانە سیاسی، ئابوری و ڕۆشنۋیریەکانش نییەن، ئیتر گەلانو ئێرانی ئاوەزو قبوڵکەردەی ئا سیاسەتەیشانە نییەن".

زلار ستێرکە، ئەندامە جە کۆنسەو سەرۆکایەتیى گردیی کەجەکەی، قەیرانە سیاسیێ و ئابوریکێ ئێرانی و تورکیایش هۆرسەنگنێنێ و واتەنش: " ئا دۋە دەوڵەتە جە قەیرانەکانشانە چەۋاشەکاری مەکەرانە و هۆکارەکەیش پەی ئەمەریکای مەگێڵناۋە و ئاڎشان کەردەن بە بەهانە و ڕاستی قەیرانەکان جە گلێرگەی مەشارانێۋە. جە ڕاستییەنە هۆکاری بنەڕەتی قەیرانەکانشان چارەسەر نەکەردەی کێشەکانو گلێرگەیەن، نەک ئەمەریکا. تورکیا گرد دەرفەت و هێز و تواناش پەی ئەۋەسڕیەی و دلێنەبەردەی کوردی بەکاربەرۆنە و بە زەڕو گەلی جەنگ مەبەرۆنە ڕاۋە. بەڵام تا دۆزو کوردی چارەسە نەکەرۆنە و چەمپنەکەوتەی چەنی ڕێبەر ئاپۆی ئەنجام نەڎۆنە نمەتاۊنە قەیرانەکانش چارەسەر بکەرۆنە. جە ۋەراۋەرەنە مشیۆم گەلێ تورکیای دژ بە سیاسەتە چەۋاشەکاریەکانو دەوڵەتی سەرهۆدای بکەرانە".

زلار ستێرکە ئاشکراش کەردەن: "قەیرانەکێ بە تایبەتی قەیرانی ئابوری، زیاتەر کاریگەریشان جە زارۆڵان و ژەنێ کەردەن. چینێ کە زیاتەر متاۊنە بە خاستەرین شێۋاز کۆشش بکەرۆنە و ببۆنە بە هێزو بنەڕەتی فاڕیای، ژەن-یەنە. پۆکەی ژەنی کە جە ۋیەردەنە خۆڵقنەرو ژیۋای و تێکەڵ بیەی چەنی سروشتی و ئابوری بیێنە،  ئارۆچ پەی چارەسەرکەردەی قەیرانەکان و شکستدای فاشیزمی مشیۆم پێشەنگایەتی گلێرگەی بکەرۆنە".