موراد قەرەیلان، ئەندام جە کۆنسەو ڕاۋەبەری (پارتیا کارکەرێن کوردستانێ-پەکەکە)ی، ٢٧و تەمووزو ئیساڵی جە ڕاو بێتەلی ئاژەو ئارۆ وو ئایندەو کوردستانی و تورکیا و ناوچەکێش پەی گەریلای هۆرسەنگنان و ڕاڤە کەردەن و ئاماژەش بە ئی مژارە گرنگا دان:

٭کۆبیەو دەسەو وەزیرا تورکیای جە دمای هۆرۋچناکا ٢٤و حوزەیرانی ۋیەردەی، دەستنیشانکەردەی کابینەو جەنگی بێ. بەڵام بە دڵنیایی سیستمی تاکە پیایی کە پەشتیش بە جەنگی بەستێنە هۆرشنیۆۋە و سەر نمەگێرۆنە.

٭ دەستکەوتێ شۆڕشگێڵیێ کە بە خەبات و کوشای ٤٥ ساڵەی بە دەسۋزیێنێ، نەک تەنیا جە کوردستان بەڵکو جە وەرکەوتی دلین، شۆڕشەکەماش کەردەن بە ئاژە. جە ۋەراۋەرەنە جەنگی قورس و بێ ئامانو ڕژێمە فاشیستەو تورکیای دژ بەشۆڕشی ۳ ساڵێش دەرباز کەرد، کە چا ماۋەنە ئامانجو ئاکەپە-مەهەپەی شکستدای شۆڕشی بیەن، تا ئەنجامێ بەدەس بۋزانە. جەی چوارچێۋەنە هەمە جۆرە ڕێبازێ وڕەرێ و تێکدەرانێ و چەپەڵێ فاشیزمانێشا بەکاربەردێ. دژ بە ڕێبەر ئاپۆی جەنگی فرە قورشسا کەرد، کە هیچ یاسا و ڕێسا و مافێۋەنە و جە هیچ یاگێۋە ڕاش نمەبۆۋە و نمونش نەبیەن.

٭ سپاکەو تورکیای جە زەمینەنە گەریلای شکستدان و زەمینگیرش کەردەن و بەزنانش. ڕژێم پەی شارای ئانەیە پەناش بەردێنە پەی بەکارئاۋردەی نوتەرین تەکنەلۆژی و تەرفەندێ سەربازیێ هامچەرخی و ملیاران دۆلارێش جە دژایەتی گەریلای خەرج کەردەن، بەڵام دیسان شکستش واردەن، جە ئەیلول-و ۲۰۱٦ی کە زاناشا شکست دریێنێ و دەرەقەت و چنەبەرو گەریلای نمەیانە، زیاتەر جە ڕاو ئاسمانی پەرەشا بە جەنگی دا.

٭ گوایا بەرپرسێ تورکیای ۋاچێنێ: "جە دمای نیسان-و ۲۰۱۷ی ئیتر کەس باس جە پەکەکەی نمەکەرۆنە و نامێ پەکەکەی ۋزانە لاپەڕەکا مێژووی. وەڵتەر جە ۲۰۰۷ کاتێۋ کە فڕۆکەی بێفڕۆکەۋانی ئەمەریکیشا دژما بەکارئاۋرد، یاشار بیوک ئانت، سەرۆک ئەرکانو وەختو سپاو تورکیای واتەبێش، بارگە و بنکەکا پەکەکەی ئیتر بێنێ  پێسەو وینای یانێۋی ئاسایی و بە ئاسانی چەمدرایشا مەکەرێمنە. ۋەرپەرسەکێ تەرو ئاکەپە-یچ هەر پاسەشا ۋاتەبێ و جەختشا کەردەبێ، کە ئیتر پەکەکەی دلێنە مەبەرانە و کۆتاییش پنە مارانە".

٭ جمیەرەکەو پەکەکەی، وەڵێ گرد چێۋی پەشتیش بە ڕاسینەو گەلێۋی کە ڕۆحش بە جستەو مێژوویەرە کەردەن بەستەن. پۆکەی تاکو ڕەگ و ڕیشەو گلێرگەو کوردستانی سەرو ئی خاکەیە ئامادەگیش بۆنە، بێگومان تیئۆری و فەلسەفەکەو ڕێبەر ئاپۆ-یچ زینڎەن  بەردەۋامیش بۆنە. چونکە ئا هەرفەلسەفە بێ کە خولیاکێ گلێرگە (کۆمەڵگە)یش خوڵقنێ و کۆمەڵگەش یاۋنا بە ئاستو ئیسەی.

٭ئانە کە ئارۆ ئینا ئاژە (ڕۆژەڤ)نە، پاکتاۋکەردەو ئێمە یان پاکتاۋکەردەی پەکەکەی نییەن، بەڵکو ئاڎێ (نەیارەکێ)جە پاکتاۋبیەو ۋێشا مەتەرسانە، هەر پۆکەی هەمە جۆرە هێرش مەکەرانە و پەلامارەما مڎانە.

٭ ئاکەپە–مەهەپە و ئەرگەنەکۆن، ۋەڵتەر دژو یۆی بێنێ، کە چی ئارۆ دژ بە کوردی و پەی بەرژەوەندی وێشا هامپەیمانێنێ و جەنگی قورس و بێئامان دژ بە کوردی بەرانەڕاۋە. چونکە بە دیدو وێشا ئەگەر پاسە نەکەرانە وێشا پاکتاۋێ مەبانە. پۆکەی نەک تەنیا جە تورکیا، بەڵکو بڕیارشادا کە جەنگەکەیشا دژ بە پەکەکەی و دەستکەوتەکا گەلی، پانیشت(باشور) و وەرنیشت(ڕۆژئاڤا) کوردستانی بگێرۆۋە. جەنگەکەشا نامێ نیا "جەنگو سەربەوێیی تورکیای" یان "جەنگو مەنەی و نەمەنەی"، کەچی دیسان بێ ئەنجام بێ و وێشا دزانشا نیاپۆرە کە ئانە پەکەکە نییەن پاکتاۋ کریۆنە، بەڵکو ئانە کە پاکتاۋ کریۆنە پیلانەو دیکتاتۆری ئەرۆغانی و سیستم-و دەوڵەت-نەتەوە-یەنە.

٭ دەوڵەتو تورکیای کە نەتاۋاش بەرەنگارو گەریلای ببۆۋە و سەربگنۆنە، هێرشش دژو عەفرین ۋستەنە ئاژە، تا شکستو وێش بشارۆۋە. ئەجێشا بە بۆردومانی ئاسمانی بە ۳ ڕۋێ عەفرینی گێرارە و پانێچە ۋەرو وێشا بەرز مەکەراۋە. بەڵام جە عەفرین ڕوو بە ڕوو مدرامانی مێژوویی و سەردەمی بیێۋە، نزیک بە ۳ هەزارێ سەربازێ و چەتێشا کوشیێ، پۆکەی عەفرین نەک نەبی بە ورە و وزەبەخش و ڕانتی سیاسی پێشا، بەڵکو پێچەۋانەکەش ڕاست بێ و ئابوریەکێچشا زیانی فرەش پنە یاۋا. ڕاسەن ئیسە عەفرین-شا گێرتەنەرە، بەڵام شەڕڤانێ جە مدرامانی بەردەۋامێنێ، بە کۆشای ئازادی جە سەرجەمو کوردستانی، داگیرکەری نەتەوە-دەوڵەتەکەو تورکیای فاشستی ڕووەو هۆرشنیای ملۆنە.

٭ خەتێۋە کە دەوڵەتو تورکیای گێرتێنەش ۋەر، هەمان خەتەو ئیتحاد و تەرەقی-یەنە، کە ۳ ڕێبازێ جە وێ مەگێرۆنە، کە بریتیێنێ جە: تورک-بیەی، ئیسلامی-بیەی و عوسمانی-بیەی، پانێچە هەوڵشادا تا کۆمەڵگەی خەڵەتنانە و گوایا وەرگیری جە هۆرشنیای ئیمپاراتۆری عوسمانی بکەرانە. بەڵام عەقڵیەتو دەوڵەت-نەتەوەی ئیتر سەرشیەن و ڕوو بەهۆرشنیایەن، ئیسە دیسان گەرەکشانە خاو و خولیای عوسمانی تازە بەدی باۋەرانێۋە و ئەنجامێ بەدەس بۋزانە. هەر پێسەو ئیتحاد و تەرەقی، سەرجەم نۆرم و پیمانە و بەها و مافەکا مرۆڤی چێر پا منیانە و کەردێ و تاۋانێ دڕندانی ئەنجامێ مڎانە. بەڵام هەر چنی ئەنوەر پاشا و تەلعەت پاشا بیێ چێرو خولیا ڕزگارکەردەی ئیمپاراتۆری عوسمانی-ـەۋە، هەمان  چارەنویس چەمەڕا ئەردۆغانی و باخچەلی و خلوسی ئاکاری مەکەرۆنە. چارەنویسەکە ئەنجامێۋی سروشتی و هورقوڵیا جە ڕەوتو مێژوویەن و کەسیچ نمەتاونە ۋەرش چنە گێرۆنە. دەرەنجام بە ۋنەکۆشای ئازادی کوردی و گەلە ڕەنجدەرکا تورکیای، سیستمو فاشیستی دەوڵەت-نەتەوەی شکست بڎریۆنە.

٭ ئیسە جە ناوچەکە جەنگ هەن، ئەردۆغان قورسایش ۋستەن سەرو لایەنی هەڵەو جەنگەکەی، پیلانەو ئانێشە متەرە تا چنی ئەلقاعدەی و بەرەو نوسرەی و داعشی خەباتو ئازادی کوردی سەرکوت بکەرۆنە و دەرنجام سوریای کۆنترۆڵ بکەرۆنە. بەڵام پیلانەکێ پێچەۋانی بیە و سەرو وێشەرە مەڕیاۋە و ئارۆ و ئیسە باجی گەۆرەو ئانەیە مڎۆنە. گەرەکشەن بە پەشتیۋانی ڕووسیای یاگە و جایێ پەی وێش مسۆگەر بکەرۆنە. بەڵام جە درێژ مەودانە دەسۋەردای جە ڕۆژاڤاو کوردستانی و سوریای بۆنە بە زەلکاۋە پێشا و دلێشەنە نوقمێ مەبانە. جە جەنگەکەنە کورد و جمیەرە ئازادیەکەش بیێنێ بە ئاکتۆری بنەڕەتى و سەرەکی.

٭ جە بارودۆخو ئارۆیەنە، ئیتر کەس نمەتاونە کوردی پەی ساڵا ۱۹۲۰ دمارە گێڵنۆۋە. سنگەر و قەڵا و دەسکەوتەکێ بە کۆشش و خەباتی ئازادی بەدەس ۋزیێنێ و بەهێزێ و هێقم-ێنێ. کورد جە ئاستێۋی گرنگەنە ژیۋێۋی ئازادیش چی دێرینە خاکەنە خوڵقنان. هێز و هێرشو ئەردۆغانی نمەتاوانە ئا ڕاسییە فاڕانە، جە کوردستان هەڵمەتەو شۆڕشگێڵی ڕێبەر ئاپۆی دەسش پنە کەردەن و یاۋان ئاستێ کە ببۆنە بە شۆڕشی هەرێمایەتی.

٭ سەرەڕا ناڕەزایەتی نیمەوکۆمەڵگەی، کابینە تازەکێ دەسەڵاتەکەو ئەردۆغانی، کابینێ جەنگی و تاکە پیایی و تاکە کەسی بڕیار دایەنە و ئاشکران جەی دماتەریچ ئەردۆغان جەنگەکەی قورستەر مەکەرۆنە. ئەندامەکێ کابینەی ئا کەسێنێ کە دژبەرێ کوردی و جمیەرەکەیشەنێ، وەزیرو ۋەرگیری (بەرگری) کەسێۋی نەژادپەرست و ڕێکۋزو جەنگەکەیەن. جەی دماۋە بە بێ وچانە دێژە بە هێرشەکاشا پەی سەرو کوردی و ئۆپۆزسیۆنی چەپ، عەلەوی و سۆسیالیستی مڎانە.

٭ گەل و جمیەرە ئازادیەکەش بشۆم چا ڕاسیە بیاوانە کە پەی قۆناخێ ئایندەی وێشا ئاماڎێ بکەرانە و بە شێۋازێ جەنگەکەی ڕێک بۋزانە تا دوژمن زیاتەر شکست بڎریۆنە. ئانێچە مدرامانی بنەڕەتی و ئاستو تازەو مدرامان-یەن. ئەگەر ئەزموونی ۳٤ ساڵەو گەریلای و ڕێبازەکا جەنگی فاڕیاشا چنە ئەنجام بڎێمێ و بە دورسی کەردەییشا بکەرمێنە، بێگومان متاومێنە دوژمنی پارچە پارچە و پەرتەۋازە و سەرگەران بکەرمێنە.

٭ دەوڵەتو تورکیای جە ۳٤ ساڵێ ۋیەردێنە، ڕێباز و جەنگ نەمەندەن دژما تاقیش نەکەرۆۋە و سەرنەکوتەن، ئیسە ئیتر بەشێ گرنگ جە سپاو تورکیای ۋزیان بەرو جەنگەکەی. میلیشاکێ کە بە پوڵ و زەڕ جەنگیا یاگێش گێرتێنێ و جەنگەکەی بەراڕاۋە. دەوڵەت چەنی خانەوادەو میلیشیاکا ڕێککەوتەشا ئیمزا کەردەن کە ئەگەر کوڕەکەشا جەنگەنە کوشیا باسش نەکەرانە و پەرسەش پەی نەنیارە. سەرەڕا ئانێچە ڕژێم بەشێ جە چەتەکا ئەلقاعدەیش جە سوریاۋە ئاردێنێ کوردستان و پی شێۋە هەوڵ مڎانە ئا بۆشایە کە جە پەراۋێز ۋستەی سپای دورس بیەن پەڕ بکەراۋە. قورسایی جەنگی و خەتەو پارێزنای دلێ وڵاتی ۋزیان ئەستۆشا. ڕاسەن ئیسە دەوڵەتو تورکیای ئینا کورستانەنە، بەڵام پێسە دەوڵەتێۋی داگیرکەی ئامادەگیش هەن، جە بارودۆخێ چامنەنە چەنی متاونە کوردستانەنە بمەنۆۋە و وێش پارێزۆنە. بنکە سەربازیەکێشا پێسەو قەڵایا سەخت دروسێ کەرێنێ، پەشتو دیۋارە کۆنکرێتەکا و جە بورجە مەحکەمە بەرزەکا و جە ئاسمانەۋە بە فڕۆکێ چەمداری و کۆنترۆڵو ناوچەکا مەکەرانە. هێزەکێشا بە زێپۆشێ و ماشینێ و تانکێ سەربازیێ و بە کارۋان زەمینەنە هامۆشیە مەکەرانە. ئینە نیشانەو چێشیەن؟ ئەگەر دەوڵەتێۋ جە وڵاتێۋنە دۆخێۋە پاسنێنە بۆنە یانی کۆتاییش ئامان و شکستش واردەن. یانی دەوڵەتی داگیرکەر بە زۆر و هێزی سەربازی و چەکی بیەیش هەن. بەڵام ئیسە پانێچە نمەتاونە بیەیش پارێزنۆنە. تاکە ئامرازێ جەنگی کە وێش سەرو پەیاۋە پنە بازۆۋە ئا تەکنەلۆجیا سەربازی و سیخوڕیە وڵەکەوتەنە کە هەنش. بەڵام دیسان پا شێۋێچە نە جە باکو و نە جە باشور و نە جە ۆژئاڤا نمەتاوانە هێرش سەرو گردێۋێ بکەرۆنە.

٭ڕژێم خاس چانەیە حاڵی بیەن کە بە داگیرکەردەی سەرنیش(باکور)و کوردستانی سەرکوتەیش مسۆگەر نییەن، پۆکەی پەلامارو پارچەکا تەرو کوردستانی مڎۆنە تا لاۋازی وێش بشارۆۋە و هێز و هازی بە وێش بەخشۆۋە. بەڵام ئانە زیاتەر نوقمو زەلکاوێش مەکەرۆنە. سەرەڕا ئانەیە کە ئەزموون و ڕێبەر ئاپۆ و جمیەرەکەما سەلمنانشا کە ڕژێمو تورکیای بە دوژمنایەتی چنەبەر و دەرەقەتو کوردی نمەیۆنە، بەڵام دیسان ئەردۆغان پەی ئەۋەمەنی ۋێش و دەسەڵاتەکەیش سورەن سەرو دوژمنایەتیەکەی، کە دەرنجامەکەش بنبەست و شکستەن و هیچ جە ڕاسیەکەی نمەفاڕۆنە.
 
٭ مەرجەو سەرکەوتەی جە گرد بوارەکانە، خاس ئەۋەوەنەی قۆناغەکەیەن، ئا کاتە بە جەنگی شۆڕشگێڵی سەرکەوتەی مسۆگەر مەکریۆنە و شەپۆلە فاشیستە پاکتاوکار و قڕکەرەکەو ئاکەپە–مەهەپە و ئەرگەنەکۆنی شکست مڎریۆنە. ڕوودایێ و ڤیەرەکێ کە جە تورکیا مەگناۋە، ڕا پەی فاڕیای و دیموکراسی و قۆناغەو شۆڕشگێڵی هەم جە تورکیا هەم وەرکەوتی دلین مەکەراۋە.