قەرەیلان: گەریلا شکست نمەڎریۆنە، بەڵام هەر ئانە ۋەسێ نییەن، بەڵکو مشیۆم گەریلا ببۆنە بە هێزو سەرکەوتەی. جەی چۋارچێۋەنە ئێمە پڕۆژەمان هەن و پڕۆژەکە ڕوو بە کۆتاییەن و گەریلا تورکیاش شکست دان و ڕووبەڕوو قەیرانیش کەردەنەۋە.
موراد قەرەیلان، ئەندام جە کۆنسەو ڕاۋەبەری پارتو کارگەرانو کوردستانی-پەکەکە، جە ۳٤مین قەڵەمبازو ۱٥و ئابی بەشداریش جە بەرنامەی تایبەت جە ستێرک تیڤی کەردەن و ڤییەرەکێ و ئاژەو ئارۆ کوردستانی و تورکیای و ناوچەکەیش ڕاڤە کەردەن.
قەرەیلان ۋاتەنش: جە دمای کۆمەڵکوشی ساڵەو ۱۹۳۸و دێرسیمی، دەوڵەتو تورکیای جە سەرنیشت(باکور)و کوردستانی پەی ماۋێۋی دوور و درێژی کۆمەڵکوشی (سفیڎ)چەرمەش ئەنجام دا، پەی جۆرە گلێرگە (کۆمەڵگە)ی بە کوشتاری جەستەیی و ڕۆشنۋیری بەرەو مەرگ بەرێنە. جە کوردستان دڕندەیی فرە گەورە ئەنجام دریێ، کوردستان بیەبێ بە زیندانێۋی گەورە. جە ۋەراۋەرەنە پەکەکە سەرش هۆردا و قەڵەمبازو ۱٥و ئابی دەستش پنە کەرد و بی بە ڕۆشنایی و دڕش بە تاریکی دا، کە جە دمایەنە پەی بییەی گەلو کوردی بی بە هەڵمەتو مدرامانی و خاوەنداریکەردەی جە وێ. بێگومان بناغەو هەڵمەتەکێ پەی تێز و فەلسەفەو ڕێبەری ئاپۆی و مدرامانەکەو زیندانو ئامەدی مەگێڵۆۋە. قەڵەمبازو ۱٥و ئابی بە پێشەنگی هەڤاڵ عەگیدی و دەستێ جە گەریلاکان دەستش پنە کەرد. ئاڎێ دەستێ ۋیچکلە بێنێ، بەڵام دڵ و ئامانج و ڕێبازشان فرە گەورە بێ.
موردا قەرەیلان ئاماژەش بە گرنگی مدرامانی ٦ ساڵەی جە دمای قەڵەمبازو ۱٥و ئابو ۱۹۸٤ی دان و ۋاتەنش: ساڵانو ۱۹۸۰کانی، جە (پانیشت) باشورو کوردستانی، ئەنفال ئەنجام دریا، جە ۱۹۸۸ هەڵەبجە کیماۋاران کریا و کۆمەڵکوشی ئەنجام دریا، دەرەنجام جە باشور جەنگ کۆتاییش ئاما. جە ۋەرهۆرز (ڕۆژهەڵات)و کوردستانی خەبات و کۆشای کوردی پاشەکشێنە بێ، جەی سەروەختەنە جە باکور کە تا وەختە بێدەنگ بێ، گەریلا ئامانە مێڎان و جەنگش بە فراۋانی دەست پنە کەرد، تیجیار(ڕۆشنایی)و ئانێچە سەرجەم کوردستانش گێرتەۋە و گەلەکەما جە باکور پنەش ژیۋاۋە و زینڎەبیەۋە. دماتەر جە ۱۹۹۰ کانە گەل شەقامەکێش تەنێۋە، هەر پۆکەی ئێمە بە ۱٥و ئابی و ڕووەدایەکان کە شونیشەرە ئامێنێ ماچمێنە (شۆڕشو ئەۋەژیۋای)، چونکە جە ۱۹۳۸ تا ئا وەختە ٤٦ ساڵێ بێ کە سیاسەتو تاۋنای و قڕکەردەی بریابێ ڕاۋە و ئا بێدەنگییە دروست بیەبێ، کە پەکەکە و قەڵەمبازەکێش جە ۱٥و ئابو ۱۹۸٤ی پەی هەمیشەی بێدەنگییەکەشان ماڕانە و هیۋا و ئیرادەشان بە گەلی بەخشاۋە و جە گرد ڕوویێ گلێرگەی کوردی-شان فاڕا.
قەرەیلان، ئاماژەش بە گاریگەری قەڵەمبازو ۱٥و ئابی کەرد و واتش: قەڵەمبازەکە، هەنگام بە هەنگام کاریگەری گەورەش جە کوردستان دروست کەرد، ڕامانێ نووش ئاۋرد ئارا، خەتو ئازادی ژەنێ، خەتو دیموکراسی و پەیلۋای شۆڕشگێڵی هامچەرخیش خوڵقنا. تایبەتمەندی کلاسیک، فیئۆداڵ، دەرەبەگانە و دماکەوتانەش ڕەخنە کەرد و کۆتاییش پنە ئاۋردێ. چەنی وێش عەقڵیەت و هۆشمەندی کۆمەڵایەتیش وەڵێ ۋست و ڕۆحی نەتەوەیش دروست کەرد.
قەرەیلان باسش جە گۆشەگیرکەردەی ڕێبەرو گەلو کوردی، عەبدوڵا ئۆجانی کەردەن و ۋاتەنش: هیچ هەۋاڵ و زانیاریێمان جە ڕێبەرایەتی و هاوەڵەکانش جە ئیمرای نییەن. ڕەفتارێ پەی جۆرە جە جیهانەنە نموونش نەبیەن و نییەن. ئانێچە بەفرمانو ئەردۆغانی و ئاکەپەی سەپیان. وەڵێ ئەردۆغانی و ئاکەپەی ئیمرالی بییەن، بەڵام بەشێ جە یاساکان ئەگەر بەکەمیچ بیەبۆنە پیادە کریێنێ و پارێزەرێ فرە تا کەم سەردای ئیمرالی کەرێنێ، کتێبێ و ڕۆچنامێ پەی بریێنێ. بەڵام ئەردۆغان و ئاکەپە ئانێچشا ناست. جە دیدو ئەردۆغانی مشیۆنە کورد و سەرۆکەکەش دلێنە بریانە. جە کەسایەتی ڕێبەر ئاپۆ-یەنە کۆتایی بە کوردی باۋەرانە.
موراد قەرەیلان، زوڵم و ستەمێ کە جە ئیمرالی هەن، بە سیاسەتو ئەۋەسڕیەی و دلێنەبەردەی کوردی و ڕێبەرەکەیش بەنامێش کەرد و ۋاتش: ئەنیاۋای جەی سیاسەت و ڕەفتارەیە گرنگەن و گەرەکەن گەلەکەمان زیاتەر جە جارانی دژ بە سیاسەتەکەی بمدرۆۋە و خاوەنداری جە ڕێبەرەکەیش بکەرۆنە، چونکە خاوەنداری جە ڕێبەر ئۆجالانی، خاوەنداریەن جە وێش و ئایندەکەیش.
موراد قەرەیلان سەرنجش دان سەرو گرنگی خاوەنداریکەردەی جە رێبەر ئۆجالانی و واتەنش: مشیۆنە گرد کورد و کوردستانیێ بە رۆحی فیداکارانەو ۱٥و ئابی خاوەنداری جە ڕێبەر ئاپۆی بکەرانە. ئەردۆغان پەی ئانەیە ئایندەو گەلەکەیمان تاریک بکەرۆنە، جە ئیمرالی گۆشەگیری سەختش سەرو ڕێبەر ئاپۆ-یەرە سەپنان. پۆکەی فرە گرنگەن دژ بە سیستم و ئەشکەنجە و ستەمێ کە جە ئیمرالی هەن گۆڕ بە خەبات و کۆشای ئازادی بڎێمێ.
موراد قەرەیلان، ئەندام جە کۆنسەو ڕاۋەبەری پارتو کارگەرانو کوردستانی-پەکەکە، سەبارەت بە قەیران و ئەرەتەپای ئابوری تورکیای واتەنش: چی ئیسە ئابوری تورکیای تووشو قەیرانی بیەن؟ چونکە ڕۆچانە ٥۰ تا ٦۰ فڕۆکێ جەنگیێ سەرو ئاسمانو عەفرین و کوردستان-یەرە سوڕیێنێ و سوڕیاۋە. جە عەفرین ئەرتەش زیانی فرەش ۋنە دریا. جە خواکورک، زاگرۆس و گرد ناوچەکانو سەرنیشتو کوردستانی ڕۆچانە گورزی قورسش ۋنە مڎریۆە. پەی وێ قوتارکەردەی جە گورزواردەکەی، ڕۆچانە فڕۆکێ بێفڕۆکەۋانێ، فڕۆکێ، هەلیکۆپتەرێ و دەیان هەزار سەربازێ و ٥۰ هەزار چەتێ بەکار بەرانە، ئانێچە گرد زەڕ و دارایی فرەش گەرەکەن، سەرەڕا هامکاری دارایی قەتەری، بەڵام تورکیا دەرەقەت و چنەبەرو ئا خەرجیە فرەیە نمەیۆنە. بە کورت و کرمانجی هۆکارو قەیرانی و ئەرەتەپای ئابوری تورکیای ئا جەنگ و گورزدای گەریلایەن جە ئەرتەشو تورکیای. قەیرانەکە پەیوەندیش بە کەمی و فرەیی زەڕ و دراو و دۆلاری کاشی نییەن. ئانە کە ڕووە مڎۆنە دەرەنجامەکەن، کە ئامادێ نیەنێ دزان پا ڕاستیەیەرە بنیانێ. بەڵام ئیتر ڕاستیەکە ئاشکرا بیەن و نمەشارێۆۋە.
کاریلان سەبارەت بە هەڕەشێ تورکیای دژ بە باشورو کوردستانی، واتەنش: جە باشور، تورکیا بە تەنیا نمەتاونە وەڵێ بگنۆنە، هەر مەۋاچان؛ ملمێ فڵان شۆن و یاگێ و گێرمێشەره، بەڵام ڕۆچانە ناچارێنێ باس جە چالاکی گەریلای جە دەریای سیاۋی بکەرانە، ئیسە جەتەمامو ناوچەکانو کوردستانی گەریلاو سیستمەکەش هەنو باڵا دەستەن، ڕاستەن جەنگی قورس هەن و ئێمە شەهیدێ مڎێمێنە، بەڵام جە هیچ جایێ نمەتاوان سیستمو گەریلای ماڕا شکست بڎانە. شۆن و جایێ نییەن کە هاڵی بۆنە و گەریلاش نەبۆنە چنە. گەریلا گرد لێۋە هەن و چالاکەن، هێزو دوژمنی نمەتاونە بێنە مێڎانو جەنگی، تەنیا بە فڕۆکەی جەنگی و بێفڕۆکەوان جەنگمان چەنی مەکەرانە.
قەرەیلان ئاشکراش کەرد، جە لێلیکان، گۆڤەند، بارزان، تەپەى خودێ و عادل بەگ کە سەر بە پانیشت(باشور)و کوردستانیەنێ، ڕۆچانە سەربازەکێ تورکیا گورزی قورسشان ونە مڎریۆنە و گەریلا مەکەرۆنەشان ئامانج و سەڎانشان کوشیێنێ. بەڵام تورکیا ڕاستیەکەی جە مەدیاکان و ڕایگردی مەشاراۋە. دەوڵەتو تورکیای یان چا ناوچانە مەکێشیۆۋە یان گەریلا ەزۆر پاشەکشێش پنە مەکەرۆنە. بەردەوام ماچانە، ملمێ قەندیل، بەڵام جورئەت نمەکەرانە نزیکش بانێۋە، بەڵام تورکیا بە تەنیا ئانەشە پنە نمەکریۆنە و یاردی و هامکاریش پێویستەن. ئەگەر تورکیا بە تەنیا ڕووە جە قەندیلی بنیۆنە، ئەوەگێڵایش پەی نییەن. پۆکەی ئیسە شۆنو ڕا و ڕێبازی تەریەرە مەگێڵۆنە تا وێشا جە دۆخەکەی قوتار بکەرانە.
